Eins og fram hefur komið áður á skagafrettir.is náði Brynhildur Traustadóttir úr ÍA góðum árangri á Norðurlandamótinu í sundi sem fram fór í Þórshöfn í Færeyjum.
Íslenskt sundfólk fékk alls fimm verðlaun á mótinu og þar af ein sundkona með sterka Skagatengingu.
Ásdís Eva Ómarsdóttir heitir hún. En Ásdís Eva bætti 11 ára gamalt stúlknamet Hrafnhildar Lúthersdóttur í 50 m bringusundi í flokki þegar hún fékk silfurverðlaun í flokki stúlkna 16 ára og yngri.
Ásdís Eva er með sundgenin í sér því móðir hennar er Skagakonan Sigurlín Þóra Þorbergsdóttir.
Sigurlín var um langt árabil yfirþjálfari hjá ÍA og síðar hjá Óðni á Akureyri. Hún er búsett í Noregi en faðir hennar er Þorbergur Engilbert Þórðarson frá Vegamótum á Akranesi.
Bróðir Ásdísar Evu, Sindri Þór Jakobsson, hefur lengi verið í fremstu röð sundmanna á Norðurlöndum.