Skipulags- og umhverfisráð Akraneskaupstaðar leggur það til við bæjarráð að horft verði til uppbyggingar á fimleikahúsi við hlið núverandi íþróttahúss við Vesturgötu. Þetta kemur fram í fundargerð bæjarráðs frá 2. mars s.l.
Bæjarráð hefur samþykkt að vísa tillögu skipulags- og umhverfisráðs til umsagnar skóla- og frístundaráðs. Einnig verði niðurstöður varðandi skoðun á jarðvegi á svæðinu sendar ráðinu til upplýsinga þegar þær liggja fyrir.
Í framkvæmda- og fjárfestingaáætlun fyrir árið 2017 er gert ráð fyrir byggingu fimleikahúss á árunum 2017-2018. Í því tilliti hefur verið rætt um tvær staðsetningar þ.e. annars vegar við lóð við hlið íþróttahússins við Vesturgötu og hinsvegar á Jaðarsbökkum milli núverandi vallarhúss og Akraneshallar.
Í gögnum frá Andrúm arkitektastofu eru kostir þess að staðsetja fimleikahús við núverandi íþróttahús við Vesturgötu taldir upp.
• Lóðin rúmar vel fimleikahús og þess verður gætt að húsið verði góður granni.
• Rímar vel við starfsemi íþróttahúss og skóla – styrkir svæðið.
• Tækifæri til að móta betur umhverfið og skapa fallega götumynd bæði við Vesturgötu og einkum við Háholt – trjálína, bílastæði, gangstétt.
• Skjólsælt gróðursvæði sunnan við fimleikahús, göngustígur, leiksvæði.
Hér fyrir neðan eru tillögur frá Andrými arkitektastofu að nýju fimleikahúsi við Vesturgötu.
Hér má sjá hugmyndir að fimleikahúsinu við Jaðarsbakka:
