Hulda upplifir nýtt ævintýri Noregi – spennandi tímar framundan

Auglýsing



„Hugmyndin kom upp í júní í fyrra, ég fór í júlí að skoða húsnæði og við fluttum í september. Þetta gerðist mjög hratt en við erum ánægð með niðurstöðuna,“ segir Skagakonan Hulda Margrét Brynjarsdóttir við Skagafréttir sem er nú búsett í Hönefoss í Noregi ásamt sambýlismanni sínum og tveimur dætrum þeirra.

Hulda Margrét situr ekki auðum höndum í Noregi en hún skrifaði nýverið undir samning hjá knattspyrnuliði Hönefoss sem mun leika í næst efstu deild þar í landi.

Hulda Margrét hefur leikið knattspyrnu með ÍA frá því hún var barn en hún er 26 ára gömul og stundaðar 50% háskólanám samhliða því að vera í fæðingarorlofi.  En eins og allir vita stendur það orlof alls ekki undir væntingum – að ala upp barn er ekkert frí eða orlof.

Aðspurð segir Hulda Margrét að ævintýraþráin hafi leikið stórt hlutverk í því að rífa sig upp frá Akranesi. Sigursteinn Orri Hálfdánarson er sambýlismaður Huldu en hann er í vinnu í Hönefoss.

„Við mátum stöðuna þannig að það væri tækifæri að fara erlendis og upplifa eitthvað nýtt samhliða því að stunda nám og vinnu. Ég er í 50% háskólanámi, eldri stelpan okkar er 50% í leikskóla en að öðru leyti er ég með báðar stelpurnar okkar heima.  Það var stærsti kosturinn að okkar mati, ég get verið með þeim mikið heima, í stað þess að koma þeim í vistun. Eldri stelpan okkar er í leikskóla hálfan daginn og hún mun án efa læra norskuna betur á undan okkur.“

Eins og áður segir ætlar Hulda Margrét að leika með liði Hönefoss í næst efstu deild í Noregi á næstu leiktíð.

„Ég vildi komast inn í samfélagið og að vera hluti af fótboltaliði er góð leið til þess. Ég mun læra tungumálið með því að vera í kringu norsku fótboltakonurnar.“

Hulda náði að kynnast norska fótboltanum s.l. haust þar sem hún lék tvo leiki með HBK í 2. deildinni.

„Það hefur gengið vel hjá HBK eða Hönefoss undanfarin ár. Liðið var í 4. deild fyrir fjórum árum og er nú í 1. deild. Liðið var stofnað fyrir fimm árum og það hefur því margt gerst á stuttum tíma.

Hér í Hönefoss þykir það stórfrétt hversu vel liðinu hefur gengið og í raun er mjög vel fylgst með liðinu í allri sýslunni, Ringerike.

Það kom mér á óvart hversu lítill stuðningur er við liðið – miðað við það sem ég hef kynnst á Íslandi.“

Keppnistímabilið hefst þann 13. apríl og það er að sjálfsögðu besti dagur ársins að mati Huldu. „ Ég á afmæli á þessum degi en fram að því verð ég á fullu að koma mér í stand fyrir tímabilið. Tímabilið verður án efa krefjandi en vonandi næ ég að spila sem mest.

Ég ætla samt sem áður að setja fjölskylduna í forgang, dætur okkar eru það ungar, að ég get ekki gert allt sem ég vil. Ferðalögin eru löng í þessari deild. Við þurfum stundum að fara í keppnisferðir norður í land sem tekur tvo daga. En ég hlakka til og þetta verður án efa skemmtileg upplifun.“

 

Ættartréð:

Hulda Margrét Brynjarsdóttir er fædd árið 1993 og hún á tvær dætur sem heita Emilía Ósk Sigursteinsdóttir (fædd í júní 2016) og Andrea Karen Sigursteinsdóttir (fædd maí 2018).

Sambýlismaður Huldu Margrétar er Sigursteinn Orri Hálfdánarson.

Foreldrar Huldu eru Þyrí Stefánsdóttir hjúkrunarfræðingur og Brynjar Sæmundsson, golfvallasérfræðingur og framkvæmdastjóri GrasTec.

Auglýsing



Auglýsing