[sam_zone id=1]

Tímamótasamningar hjá Fimleikafélagi Akraness


Það eru bjartir tímar framundan hjá Fimleikafélagi Akraness. Nýtt fimleikahús er í byggingu við Vesturgötu og nýverið voru gerðir tímamótasamningar við iðkendur í meistaraflokki félagsins.

Þetta er í fyrsta sinn sem slíkir samningar eru gerðir hjá fimleikafélaginu.

Um er að ræða iðkendur sem eru 18 ára og eldri.

„Félagið er virkilega stolt að því að hafa þessar ungu og efnilegu stelpur í okkar hóp og með þennan áfanga í sögu félagsins. Í þessum hópi eru Aþena Ósk Eiríksdóttir (f. 2001), Harpa Rós Bjarkadóttir (f. 1997), Marín Birta Sveinbjörnsdóttir ( f. 2001), Sóley Brynjarsdóttir (f. 2001), Sylvía Mist Bjarnadóttir (f. 1997), Valdís Eva Ingadóttir (f. 2002) og Ylfa Claxton (f. 2001),— segir í tilkynningu frá félaginu.

Friðbjörg Eyrún Sigvaldadóttir formaður FIMA og Þórdís Þráinsdóttir yfirþjálfari FIMA skrifuðu undir samninginn fyrir hönd félagsins.

Laugardaginn 15 febrúar keppir meistaraflokkur á GK mótinu á Selfossi, en Fimleikafélag Akraness, ÍA, er eitt af þremur félögum landsins sem á meistaraflokk í A deild.