Vel á sjötta þúsund sýni voru tekin á Íslandi í gær vegna Covid-19 sem er metfjöldi frá því að byrjað var að skima fyrir Covid-19 veirunni á Íslandi. Fjölmennur hópur frá Akranesi fór í skimun en 175 einstaklingar voru í sóttkví á Akranesi eftir að smitaður einstaklingur fór í líkamsræktarsalinn í síðustu viku á Jaðarsbökkum.
Alls greindust 57 ný Covid-19 smit innanlands í gær, þar af 54 í einkennasýnatökum, tvö í sóttkvíar- og handahófsskimun og eitt hjá Íslenskri erfðagreiningu. Þetta kemur fram á mbl.is.
Alls voru 49% í sóttkví við greiningu, eða 28 manns.
Á Vesturlandi hefur einstaklingum í sóttkví fækkað umtalsvert en í dag eru 93 í sóttkví og 11 eru í einangrun.
