Dómsmálaráðherra hefur skipað Gunnar Örn Jónsson, lögreglustjóra á Norðurlandi vestra í embætti lögreglustjórans á Vesturlandi frá 7. apríl næstkomandi. Þetta kemur fram í tilkynningu á vef Stjórnarráðs Íslands en þrír sóttu um embættið.
Gunnar Örn tekur við af Úlfari Lúðvíkssyni sem hafði gegnt þessu embætti frá því í ársbyrjun 2015 – en Úlfar tók nýverið við embætti lögreglustjórans á Suðurnesjum.
Gunnar Örn var frá árinu 2015 yfirmaður ákærusviðs við embætti lögreglustjórans á Suðurlandi og staðgengill lögreglustjóra, þar til að hann tók við embætti lögreglustjóra á Norðurlandi vestra árið 2017.
Gunnar Örn útskrifaðist sem lögfræðingur árið 2003. Hann starfaði sem löglærður fulltrúi sýslumannsins á Selfossi frá 2004 til ársins 2014, þar af sem staðgengill sýslumanns frá 2008.
Þau sem sóttu um starfið:
• Arnfríður Gígja Arngrímsdóttir – aðstoðarsaksóknari
• Birgir Jónasson – Löglærður fulltrúi í greiningardeild ríkislögreglustjóra og stundakennari við Háskólann á Akureyri
• Gunnar Örn Jónsson – Lögreglustjóri á Norðurlandi vestra