Sonur handboltastjörnu semur við ÍA

Skagamenn halda áfram að semja við unga og efnilega leikmenn. Nýverið gekk Bjarki Steinn Bjarkason í raðir ÍA en hann hefur leikið með Aftureldingu. Bjarki er fæddur árið 2000 og lék hann 10 leiki með Aftureldingu í 2. deildinni s.l. sumar og skoraði 2 mörk. Hann er miðjumaður og hefur leikið með U17 og U18 ára landsliðum Íslands.

Bjarki Steinn sagði í samtali við skagafrettir.is að hann væri ánægður með að vera kominn á Skagann á ný. „Ég er fæddur á Sjúkrahúsinu á Akranesi og gul ÍA húfa var það fyrsta sem ég fékk á höfuðið eftir að ég fæddist,“ sagði Bjarki Steinn en hann samdi til tveggja ára við ÍA.

Þess má geta að faðir hans var einn besti handboltamaður Íslands, Bjarki Sigurðsson, sem lék 228 landsleiki og skoraði í þeim 575 mörk. Bjarki eldri er áttundi markahæsti leikmaður íslenska landsliðsins í handbolta frá upphafi.

 

„Það er mjög jákvætta að fá Bjarka Stein loksins til félagsins. Bjarki Steinn er ungur og efnilegur leikmaður og sem styrkir okkur mikið. Hann er líka með mikinn metnað til að ná langt í fótbolta og það er það sem við leitum af í leikmönnum hér á Skaganum, svo hann á bara eftir að vaxa og dafna og gera frábæra hluti í framtíðinni. Hann á framtíðina fyrir sér,“ segir Jóhannes Karl þjálfari Skagamanna á vef Knattspyrnufélagsins.