Garðar H. Guðjónsson blaðamaður og Guðni Hannesson ljósmyndari opna áhugaverða sýningu föstudaginn 23. mars í gömlu lögreglustöðinni við Kirkjubraut 10 á Akranesi.
„300 Brunahanar – stúdía í máli og myndum,” er nafnið á sýningunni sem samanstendur af myndum af öllum brunahönum Akraneskaupstaðar.
![](https://skagafrettir.is/wp-content/uploads/2018/03/Screen-Shot-2018-03-21-at-12.25.54-PM-942x670.png)
Garðar og Guðni, sem eru báðir fæddir árið 1963, hjóluðu um Akranes sumarið 2017 og mynduð alla brunahana bæjarins.
Þessi könnunarleiðangur skilaði af sér áhugaverðum staðreyndum á borð við að sjö tegundir af brunahönum eru í bænum og verða fulltrúar þeirra allra til staðar á sýningunni.
Hverri mynd fylgja margvíslegar upplýsingar um viðkomandi brunahana, svo sem um uppruna, sögu, staðsetningu, vatnsþrýsting, rennsli, fjölda viðkomandi tegundar í bæjarlandinu og fleira. Í sýningarskrá er gerð grein fyrir heildarfjölda brunahana á Akranesi og hve margir hanar eru af hverri tegund í póstnúmerinu 300.
Höfundar verða á staðnum og geta upplýst gesti um efni sýningarinnar. Guðni er ljósmyndari og starfsmaður Landmælinga Íslands en Garðar er blaðamaður og ráðgjafi í kynningar- og útgáfumálum.
Opnun fer fram föstudaginn 23. mars kl. 17-19 og verður sýningin opin 24. og 25. mars kl. 13-17.
Allir eru velkomnir.