Félag framhaldsskólakennara (FF) og Félag stjórnenda í framhaldsskólum (FS) beina þeim tilmælum til menntayfirvalda að ákvörðun um ráðningu skólameistara í Fjölbrautaskóla Vesturlands á Akranesi (FVA) verði flýtt og að þegar í stað verði gerðar ráðstafanir til að leiðrétta laun starfsfólks FVA þannig að þau verði sambærileg og tíðkast í öðrum framhaldsskólum.
Þetta kemur fram í yfirlýsingu sem félögin sendu frá sér í gær, föstudaginn 18. okt. og er birt á vef Kennarasambandsins.
Yfirlýsing frá Félagi framhaldsskólakennara og Félagi stjórnenda í framhaldsskólum um ástand mála í Fjölbrautaskóla Vesturlands á Akranesi
„Félag framhaldsskólakennara (FF) og Félag stjórnenda í framhaldsskólum (FS) hvetja yfirvöld menntamála til að leysa nú þegar það erfiða ástand sem skapast hefur við Fjölbrautaskóla Vesturlands á Akranesi. Félögin beina eftirfarandi tilmælum til yfirvalda menntamála:
- Að mennta- og menningarmálaráðuneytið flýti ákvörðun um ráðningu skólameistara til að ljúka því óvissuástandi sem er í Fjölbrautaskóla Vesturlands á Akranesi.
- Að gerðar verði ráðstafanir strax til þess að kjör starfsfólks verði leiðrétt og þeim tryggð sambærileg laun og tíðkast í öðrum framhaldsskólum.
Stjórnir FF og FS lýsa einnig vilja til samstarfs við menntamálayfirvöld um lausn þessara mála og fara þess á leit að tryggt verði í komandi kjaraviðræðum að tilvik eins og þetta geti ekki átt sér stað.“
