Uppsjávarskipið Venus NS 150 kom til hafnar í dag á Akranesi með um 530 tonn af loðnu. Þetta er í fyrsta sinn í þrjú ár sem loðnufarmi er landað á Akranes en Venus er í eigu Brims og er skipið skráð á Vopnafirði.
Aflinn fer í hrognavinnslu og samkvæmt heimildum Skagafrétta er loðnufarmurinn góður hvað hrognavinnsluna varðar.
![](https://skagafrettir.is/wp-content/uploads/2021/03/venusjpg-1000x670.jpg)
Sævar Freyr Þráinsson, bæjarstjóri Akraness, færði áhöfninni veglega rjómatertu að þessu tilefni. Bergur Einarsson skipstjóri tók við tertunni fyrir hönd áhafnarinnar.
„Við á Akranesi fögnum því sérstaklega að sjá loðnuna vera landað á Akranesi. Það var einstaklega gaman að líta við á Venusi og tóku skipverjar sem ég hitti á mjög vel á móti mér. Léttur og skemmtilegur andi um borð.
Áhöfnin hyggst njóta rjómatertunar með kaffinu í dag en Alfreð Freyr í Kallabakarí græjaði hana ásamt sínu flotta fólki,“ skrifar Sævar Freyr á fésbókarsíðu sína.
Brim hf. var stofnað 13. nóvember árið 1985 við sameiningu Bæjarútgerðar Reykjavíkur og Ísbjarnarins. Hét fyrirtækið fyrst Grandi hf. síðar HB Grandi hf. Árið 2019 var nafninu breytt í Brim hf.
![](http://localhost:8888/skagafrettir/wp-content/uploads/2021/03/155987626_3691449030931798_8058714807515242715_o-1024x768.jpg)
![](http://localhost:8888/skagafrettir/wp-content/uploads/2021/03/155801665_3691442950932406_2977675299700480360_o-1024x768.jpg)