Miklar breytingar á framboðslista Sjálfstæðisflokksins – Líf nýr oddviti

Framboðslisti Sjálfstæðisflokksins á Akranesi fyrir bæjarstjórnarkosningarnar í maí 2022 var samþykktur einróma á fundi Fulltrúaráðs sjálfstæðsfélaga á Akranesi í gær. Uppstillingarnefnd flokksins lagði fram tillögu um röðun á listann og var sú tillaga samþykkt.

Miklar breytingar eru á lista Sjálfstæðisflokksins og Líf Lárusdóttir er nýr oddviti Sjálfsstæðisflokksins á Akranesi.

Sjálfstæðisflokkurinn náði inn fjórum bæjarfulltrúum í síðustu kosningum en þrír af þeim ætla ekki að gefa kost á sér að nýju.

Rakel Óskarsdóttir, sem var oddviti flokksins í síðustu kosningum og Ólafur Adolfsson eru í tveimur neðstu sætum listans og Sandra Sigurjónsdóttir gefur ekki kost á sér. Einar Brandsson skipar annað sætið á listanum en hann hefur setið í bæjarstjórn frá árinu 2014. Þórður Guðjónsson skipar fimmta sæti listans en hann hefur verið varamaður í bæjarstjórn.

Eins og áður segir er Líf Lárusdóttir markaðsstjóri í efsta sæti, Einar Brandsson tæknifræðingur í öðru sæti, Guðmundur Ingþór Guðjónsson framkvæmdastjóri hjá ÞÞÞ er í þriðja sæti og Sigríður Elín Sigurðardóttir sjúkraflutningakona er í fjórða sæti.