Í byrjun ársins 2023 verða tveir strætisvagnar í akstri fyrir íbúa Akraness og gesti – og verða báðir vagnarnir rafmagnsknúnir.
Þetta kemur fram í frétt á heimasíðu Akraness. Hópferðabílar Reynis Jóhannssonar ehf. átti lægsta tilboðið í verkefnið sem stendur yfir til ársins 2029.
Nýverið var skrifað undir samning við fyrirtækið um þjónustuna en þrjú fyrirtæki buðu í verkefnið. Hópferðabílar Reynis Jóhannssonar ehf. hafa sinnt þessari þjónustu frá árinu 2009 og hefur einn vagn verið í notkun á akstursleiðinni.
Skagaverk og Vestfirskar Ævintýraferðir buðu einnig í verkefnið.
Fram kemur í fréttinn á vef Akraneskaupstaðar að á tímabilinu verður strætisvagnaþjónusta við íbúa aukin með því að bæta við einum vagni. Hópferðabílar Reynis Jóhannssonar munu taka í rekstur tvo nýja rafmagnsvagna sem eru væntanlegir um næstu áramót.
|
 |
 |
|