Körfuknattleiksfélag Akraness lagði nýverið fram óskir til bæjarráðs Akraness að keyptir verði tveir öflugir LED skjáir í íþróttahúsið við Vesturgötu.
Slíkir upplýsingaskjáir eru til staðar í flestum íþróttamannvirkjum í dag og uppfylla þær kröfur sem gerðar eru til framkvæmda körfuboltaleikja á vegum Körfuknattleikssambands Íslands.
Í greinargerð frá félaginu kemur fram að slíkir LED upplýsingaskjáir geti nýst í margvísleg verkefni – þar á meðal morgunstund Brekkubæjarskóla.
Bæjarráð samþykkti nýverið tillögu frá skóla – og frístundaráði þess efnis að kaup á LED skjám fari í ferli. Bæjarstjóra hefur verið falin úrvinnsla málsins.
Í upplýsingum frá Körfuknattleiksfélaginu kemur fram að stærri LED skjárinn sé um 15 fermetrar að stærð – og sá minni er um 6 fermetrar.
Kostnaðurinn við þessa framkvæmd er áætlaður á bilinu 5 – 7 milljónir kr.
