Húsið við Vesturgötu 62 á Akranesi hefur verið mikið í umræðunni á Akranesi á undanförum mánuðum.
Bæjaryfirvöld höfðu hug á því að rífa húsið, sem var áður íþróttahús Akurnesinga, en í seinni tíð hefur nytjamarkaðurinn Búkolla verið með starfsstöð þar. Ástand hússins er ekki gott og starfssemi Búkollu var hætt þar sem að húsnæðið uppfyllti ekki kröfur.
![](https://skagafrettir.is/wp-content/uploads/2023/01/vesturgata-62-1132x670.jpeg)
Miðbæjarsamtökin Akratorg hafa barist fyrir því að húsið verði ekki rifið – og það samtal virðist hafa borið árangur.
Á síðasta fundi bæjarráðs var tekin sú ákvörðin að setja húsið í sölu á almennum markaði en með tilteknum kvöðum sem m.a. varða m.a. tímalínu endurbóta, rif á viðbyggingu og hugmynda um fyrirhugaða notkun á húsinu.
Í fundargerð bæjarráðs kemur fram að afla þarf heimildar frá framkvæmdasýslu ríkisins vegna þessa en stofnunin fer með eignarhluta ríkisins í húsinu.
Í nóvember á síðasta ári var lagt til í skipulags – og umhverfisráði Akraneskaupstaðar að leita eftir útboðum í niðurrif á fjórum eignum í eigum Akraneskaupstaðar – og var Vesturgata eitt af þeim húsum.
Húsið við Vesturgötu 62 var byggt sem íþróttahús og var því áður fyrr kallað leikfimishúsið við Vesturgötu. Húsið er stórmerkilegt í sögu bæjarins, sennilega eitt það merkilegasta, því það var fyrsta íþróttamannvirkið sem Akurnesingar reistu og höfðu mikið fyrir því.
![](https://skagafrettir.is/wp-content/uploads/2023/01/Pennagrein_Stjornarfolk-i-Midbaejarsamtokunum-Akratorg_1-1920x1920-1.jpg)