Oliver Stefánsson mun leika með Íslandsmeistaraliði Breiðabliks á næstu leiktíð – en Skagmaðurinn hefur gert samning við félagið út árið 2025.
Oliver er fæddur þann 3. ágúst árið 2002 og verður því 21 árs á þessu ári.
Hann lék með ÍA á síðustu leiktíð þar sem hann var í láni frá sænska liðinu Norrköping. Oliver gerði starfslokasamning við sænska félagið nýverið – en hann gekk í raðir Norrköping árið 2018 – þá 16 ára gamall.
Varnarmaðurinn sterki glímdi við erfið meiðsli og veikindi á meðan hann var í herbúðum Norrköping.
Hann var lánaður til ÍA í byrjun síðasta árs – með það að markmiði að koma sér af stað eftir langa fjarveru frá keppnisfótbolta.
Oliver lék alls 23 leiki með ÍA í Bestu deildinni – en liðið féll úr þeirri deild í lok tímabilsins í fyrra.
Hjá liði Breiðabliks hittir Oliver fyrrum liðsfélaga sinn úr ÍA, Eyþór Aron Wöhler, sem var markahæsti leikmaður ÍA á síðustu leiktíð. Eyþór Aron gerði tveggja ára samning við Breiðablik eftir síðasta keppnistímabil.
Velkominn Oliver Stefánsson❗️
— Breiðablik FC (@BreidablikFC) February 17, 2023
Oliver er 22 ára gamall og kemur frá Norrköping í Svíþjóð.
Samningur Olivers gildir út árið 2025.
Blikar eru virkilega ánægðir með að hafa tryggt sér þennan öfluga liðstyrk fyrir átökin í Bestu deildinni og Meistaradeildinni.
📷 @hhalldorsson pic.twitter.com/W3w3GHPmpM
