Daníel Ingi Jóhannesson hefur skrifað undir samning við danska úrvalsdeildarliðið FC Nordsjælland. Danska félagið kaupir Daníel af Knattspyrnufélagi ÍA. Daníel Ingi útskrifaðist úr 10. bekk Grundaskóla í síðustu viku en hann er fæddur árið 2007 og er því 16 ára.
Daníel Ingi mun búa í Kaupmannahöfn fyrst um sinn hjá eldri bróður sínum – en Ísak Bergmann Jóhannesson leikur með FCK í Kaupmannahöfn.
Í viðtal við danska vefinn Sport.dk segir Ísak Bergmann að það verði gaman að fá bróðir sinn inn á heimilið. „Það er ekki langt frá Kaupmannahöfn og til Farum. Hann mun búa hér hjá okkur. Daníel Ingi er duglegur leikmaður og ég hef trú á því að hann fái tækifæri í dönsku úrvalsdeildinni eftir 2-3 ár,“ segir Ísak Bergmann.
FC Nordsjælland var ekki eina félagið sem sýndi Daníel Inga áhuga. Hann fór í þrígang til FCK þar sem hann æfði með félaginu. FC Nordsjælland var sett á laggirnar árið 1991 þegar Farum Idræts Klub og Stavnsholt Boldklub sameinuðust undir nýju nafni. Farum Idræts Klub var stofnaður árið 1910 og Stavnsholt Boldklub árið 1974.
Liðið leikur heimaleiki sína á Right to Dream Park leikvanginum sem tekur um 10 þúsund áhorfendur. Það er einnig fyrsti völlurinn í Danmörku þar sem leikið var á gervigrasi. Til samanburðar komast um 9.500 þúsund áhorfendur á Laugardalsvöll.
FC Nordsjælland hefur einu sinni sigrað í dönsku úrvalsdeildinni, tímabilið 2011-2012. Dönsku bikarkeppnina hefur félagið unnið tvívegis, 2010 og 2011.