Leikmenn ÍA/Kára og Skallagríms fögnuðu nýverið Íslandsmeistaratitlinum í keppni í
2. flokki karla í knattspyrnu í keppni A og B liða. A-liðið varði Íslandsmeistaratitilinn frá því í fyrra.
Þetta sigursæla lið, ÍA/Kára og Skallagríms tók stórt skref í áttina að bikarmeistaratitlinum í kvöld þegar liðið lagði KA á Akureyri í undanúrslitum bikarkeppni 2. flokks.
Lokatölur í undanúrslitaleiknum gegn KA, 3-0. Mörkin skoruðu Eyþór Aron Wöhler, Sigurður Hrannar Þorsteinsson og Brynjar Snær Pálsson.
Úrslitaleikurinn fer fram miðvikudaginn 26. september en leikstaður hefur ekki verið ákveðinn. Mótherjar ÍA/Kára og Skallagríms verður lið Breiðabliks úr Kópavogi.
ÍA er sigursælasta liðið í bikarkeppni 2. flokks karla frá upphafi en fyrst var keppt árið 1964.
Skagamenn eru með 9 titla alls í þessari keppni. Það eru 15 ár frá því að ÍA sigraði síðast í bikarkeppni KSÍ 2. flokki karla.
Bikarmeistaratitlar ÍA í 2. flokki karla frá upphafi:
2004 ÍA
2001 ÍA
1999 ÍA
1992 ÍA
1975 ÍA
1974 ÍA
1968 ÍA
1965 ÍA
1964 ÍA
