Ísak Bergmann Jóhannesson leikmaður 3. fl. karla í knattspyrnu er þessa stundina staddur í Hollandi þar sem hann mun æfa með stórliði Ajax. Ísak Bergmann er fæddur árið 2003 en með honum í för er Heimir Eir Lárusson sem er annar af tveimur þjálfurum ÍA í 3. fl.
Ísak Bergmann mun æfa með Ajax út vikuna. Í apríl mun Ísak halda út til Englands þar sem enska úrvalsdeildarliðið Everton hefur boðið Skagamanninum efnilega að til æfinga.
Heimir Eir mun fylgjast með æfingum hjá Ajax sem hefur á að skipa einu öflugasta unglingastarfi í Evrópu. Á heimasíðu ÍA segir að það sé mikill heiður fyrir Ísak Bergmann og ÍA að hann fái boð til að æfa og skoða aðstæður hjá þessu sögufræga stórliði.
