Akranes stendur best og Hafnarfjörður verst þegar fjárhagur stærstu sveitarfélaga landsins er borinn saman. Þetta er niðurstaða greiningar Samtaka atvinnulífsins. Samtökin telja að góður rekstur sveitarfélaga skili sér í lægri skattheimtu. Frá þessu er greint á vef RÚV.
Samtökin skoðuðu fjárhag tólf stærstu sveitarfélaganna, eða þeirra sem eru með yfir fjögur þúsund íbúa. Þau skoðuðu níu mismunandi þætti í rekstri sveitarfélaganna, svo sem eiginfjárhlutfall, skuldir, tekjur, útgjöld og aðra þætti.
Sveitarfélögin fengu svo einkunn fyrir frammistöðu í hverjum lið fyrir sig. Heilt yfir kom Akranes best út, næst kom Seltjarnarnes og svo Garðabær. Í þremur neðstu sætunum eru hins vegar Reykjanesbær, Reykjavík og Hafnarfjörður sem rekur lestina.