[sam_zone id=1]

Brynhildur „nýliði ársins“ – mótsmet og miklar bætingar


Brynhildur Traustadóttir, sundkona frá Akranesi, stendur sig vel með skólaliðinu University of Indianapolis þar sem hún stundar háskólanám.

Um síðustu helgi fékk Brynhildur viðurkenninguna „Nýliði ársins“ þegar hún keppti á „The Great Lakes Valley Conferance Championships.“

Brynhildi hefur gengið vel með keppnisliði sínu og er hún í lykilhlutverki á mótum með skólaliðinu. Lið hennar setti m.a. mótsmet og skólamet á umræddu móti í 4×200 metra boðsundi.

Brynhildur bætti árangur sinn um 17 sekúndur í 1000 yarda skriðsundi þar sem hún kom í mark á 10 mínútum, átta sekúndum og 59 hundraðshlutum úr sekúndu. Hún endaði í 5. sæti en 1000 yardar eða stikur eru 914.4 metrar.

Í 500 yarda skriðsundi (457.2 metrar) bætti hún árangur sinn um 7 sekúndur og endaði í 6. sæti. Í 200 yarda skriðsundi (182.88 metrar) bætti Brynhildur sig um 1,5 sekúndur og endaði hún í 7. sæti.

Skagakonan keppti einnig í 1650 yarda sundi í fyrsta sinn (1508.76 metrar) og kom hún í mark á 17 mínútum, 4 sekúndum og 61 hundraðshlutum úr sekúndu – hún endaði í 5 sæti.