Arnór Sigurðsson er orðaður við rússneska liðið CSKA frá Moskvu. Hinn 19 ára gamli Skagamaður hefur leikið sem atvinnumaður hjá Norrköping í Svíþjóð undanfarin tvö tímabil. Hann samdi við sænska liðið vorið 2017.
Samkvæmt heimildum fréttavefsins fotbolti.net hefur CSKA Moskva lagt á ný fram tilboð í leikmanninn en félagið hefur sýnt Arnóri áhuga á undanförnum mánuðum.
Samkvæmt sænska dagblaðinu Expressen er CSKA Moskva tilbúið að greiða um 355 milljónir kr. fyrir Arnór og upphæðin gæti farið upp í 500 milljónir kr. Ef af þessu verður væri um met að ræða hjá sænska liðinu og yrði Arnór dýrasti leikmaðurinn sem félagið hefur selt.
Arnór hefur skorað þrjú mörk í 16 leikjum á þessari leiktíð. CSKA endaði í öðru sæti deildarinnar í fyrra en landsliðsmaðurinn Hörður Björgvin Magnússn er meðal leikmanna liðsins.
Ef af þessu verður gæti Knattspyrnufélag ÍA fengið uppeldisbætur fyrir Arnór. Upphæðin er um 1,5% af kaupverðinu. Ef hann verður seldur fyrir allt að 500 milljónir kr, fengi ÍA um 7,5 milljónir kr. og Norrköping fengi 5 milljónir kr. í uppeldisbætur.
Félög sem hafa alið upp leikmenn á aldurstímabilinu 12-15 ára fá 0,25% af kaupverðinu fyrir hvert ár.
Eftir 15 ára aldurinn fer hlutfallið upp í 0.5% fyrir hvert ár fram til 23 ára aldurs.
Uppeldisbætur eru aðeins greiddar ef leikmenn eru seldir á milli landa.
Auglýsing
