Auglýsing
Spennuþáttaröðin Ófærð hefur á undanförnum vikum verið ofarlega á forgangslista Íslendinga á öllum aldri.
Þáttaröðin er með gríðarlegt áhorf og vinsælt sjónvarpsefni.
Skagamaðurinn Jakob Þór Einarsson kom við sögu í 4. þættinum sem sýndur var í gær.
Hlutverk Jakobs Þórs er enn sem komið er ekki stórt en hann leikur verslunarstjóra í matvörubúð – sem dundar sér við að prjóna í vinnutímanum.
Eins og áður segir var hlutverk Jakobs Þórs ekki mjög fyrirferðarmikið en það verður spennandi að fylgjast með framvindunni. Jakob Þór hefur í gegnum tíðina leikið stór hlutverk í íslenskum bíómyndum og sjónvarpsþáttum. Má þar nefna kvikmyndirnar Óðal feðranna og Hrafnin flýgur. Hann hefur einnig komið talsetningu á gríðarlegu magni af barnaefni sem sýnt hefur verið í sjónvarpi. Má þar nefna að Jakob Þór er röddin á bak við Póstinn Pál.
Það er aldrei að vita að verslunarstjórinn sem hann leikur hafi eitthvað að gera með þá hryllilegu atburði sem hafa átt sér stað í friðsæla þorpinu norður í landi. Hann er kannski með eitthvað nýtt á prjónunum?
Stóra spurningin sem brennur á okkur Skagamönnum er hvað er verslunarstjórinn að prjóna í vinnutímanum?
Lopavettlinga, trefil, peysu eða sokka? Þeirri spurningu hlýtur að verða svarað í næstu þáttum Ófærðar.
Auglýsing
Auglýsing
