Skagamaðurinn Bjarni Ármannsson, forstjóri Iceland Seafood International, náði í morgun að standa á hæsta tindi veraldar á fjallinu Everest. Frá þessu er greint á mbl.is.
Bjarni er fæddur árið 1968 fagnaði því 50 ára afmæli sínu á síðasta ári.
Bjarni er níundi Íslendingurinn sem nær á toppinn á hæsta fjalli heims. Á þessum fámenna lista Íslendinga sem hafa náð þessu afreki eru tveir Akurnesingar. Leifur Örn Svavarsson og Lýður Guðmundsson voru einnig á toppi Everest í morgun en Leifur Örn var þar í annað sinn.
Einn af þessum níu sem hafa nú þegar klifið Everest er Skagamaðurinn Ingólfur Geir Gissurarson.
Ingólfur náði tindinum 21. maí árið 2013. Hann stóð þá á fimmtugu og var elsti Íslendingurinn og eini íslenski afinn sem hafði gengið á hæsta fjall heims. Ingólfur er eigandi fasteignasölunnar Valhallar. Hann var í fremstu röð í sundíþróttinni á árum áður og keppti fyrir ÍA.
Ingólfur Geir Gissurarson og Margrét Svavarsdóttir, þegar hann kom heim til Íslands eftir Everest árið 2013. Björn Ólafsson, Einar K. Stefánsson og Hallgrímur Magnússon voru fyrstu Íslendingarnir sem fóru á topp Everest þann 21. maí árið 1997.
Haraldur Örn Ólafsson gekk næstur Íslendinga á þetta hæsta fjall heims og stóð á tindi Everest 16. maí 2002.
Ingólfur Geir Gissurarson náði tindinum 21. maí árið 2013. Hann stóð þá á fimmtugu og var elsti Íslendingurinn og eini íslenski afinn sem hafði gengið á hæsta fjall heims.
Leifur Örn Svavarsson náði tindi Everest 23. maí. Hann er eini Íslendingurinn sem hefur farið norðurleiðina á Everest, en hún er tæknilega erfiðari en suðurleiðin. Leifur Örn hefur einnig komið á báða pólana.
Vilborg Arna Gissurardóttir er eina íslenska konan sem hefur náð á Everest en hún fór á toppinn í maí árið 2017.
Bjarni er eins og gefur að skilja mikill áhugamaður um fjallgöngur og hefur hann meðal annars klifið hæsta fjall Suðurskautlandsins, Mt. Vinson. Nú bætir Bjarni um betur og bætti hæsta fjall heims.
Everest er hæsta fjall jarðar, alls 8.844,43 metrar yfir sjávarmáli samkvæmt opinberum mælingum kínverska ríkisins frá október 2005.
Meira en 4000 manns hafa klifið fjallið en yfir 200 manns hafa látist við það.
