Formlegur fundur með hugsanlegum fjárfestum um uppbyggingu gagnavers á Akranesi fór fram þann 25. september s.l.
Þetta kom fram í máli Sævars Freys Þráinssonar bæjarstjóra á fundi bæjarstjórnar í gær.
Fundurinn fór fram í Frístundamiðstöðinni við golfvöllinn á Akranesi. Alls voru 7 einstaklingar á fundinum frá fimm mismunandi aðilum.
![](https://skagafrettir.is/wp-content/uploads/2019/02/Loftmyndir-Akranes-Baldur-Ólafsson-2018-5-1132x670.jpg)
Sævar Freyr sagði að fundurinn hafi verið vel undirbúinn og erlendu gestirnir höfðu mikið gagn af þessari heimsókn. Verkefnið er unnið í samvinnu við Landsvirkjun og áhugi Akraneskaupstaðar er fyrst og fremst að fá fjárfesta sem hafa áhuga á uppbyggingu á hefðbundnum gagnaverum.
Í frétt mbl.is frá því byrjun árs 2018 segir að fjárfestingahópar frá Kína og Þýskalandi hafi sýnt þessu verkefni áhuga.
Horft er til uppbyggingar á nýju iðnaðarsvæði Akurnesinga, hinu svokallaða Flóasvæði, rétt utan bæjarins, við afleggjarann í átt að Borgarnesi. Hugmyndir um gagnaver eru ekki nýjar af nálinni á Akranesi. Fyrir sjö árum lá fyrir viljayfirlýsing við Akranesbæ um slíka uppbyggingu, en ekkert varð af þeim áformum á þeim tíma.
![](http://localhost:8888/skagafrettir/wp-content/uploads/2019/10/72170445_1472232842901227_3534778245184487424_n.jpg)