Akranes kom vel út á fyrsta Íslandsmótinu í uppistandi sem fram fór í gær í Háskólabíói.
Greipur Hjaltason stóð uppi sem sigurvegari og fékk hann titilinn Íslandsmeistari í uppistandi og 500.000 kr. verðlaunafé.
Þess má geta að móðir Greips, Ethel Karlsdóttir, býr á Akranesi og Greipur bjó á Skaganum um tíma.
Anna Lilja Björnsdóttir varð önnur en hún tengist Akranesi sterkum böndum í gegnum foreldra sína. Skagamaðurinn Björn Þorri Viktorsson er fæddur á Akranesi og Salvör Lilja Brandsdóttir móðir hennar stundaði nám hér við FVA á sínum tíma. Anna Lilja er í dag búsett á Akranesi.
Í þriðja sæti varð Iddi Biddi eða Ingi Björn Róbertsson blikksmiður hjá Blikksmiðju Guðmunar á Akranesi. Iddi Biddi er fæddur í Borgarnesi en hefur sem betur fer alið manninn og þroskast hér á Akranesi í mörg ár.
![](https://skagafrettir.is/wp-content/uploads/2020/02/Screen-Shot-2020-02-28-at-8.57.51-AM-1088x670.png)
Alls voru því fjórir keppendur af alls tíu í þessari keppni sem tengjast Akranesi með einhverjum hætti.
Lára Magnúsdóttir, eða Lollý Magg, tók einnig þátt. Hún sló í gegn í fyrra í einu af aðalhlutverkunum í Litlu Hryllingsbúðinni sem Skagaleikflokkurinn sýndi í Bíóhöllinni fyrir fullu húsi.
Vel gert og til hamingju Greipur, Anna Lilja, Iddi Biddi og Lollý Magg.
![](http://localhost:8888/skagafrettir/wp-content/uploads/2020/02/Screen-Shot-2020-02-28-at-9.04.37-AM-1016x1024.png)
„Ég hef ekki gerst svo fræg að vera kölluð uppistandari. Ég hef alltaf haft gaman af textasmíði og uppistandi en svosem aldrei gefið mig í það. Þegar ég var yngri hafði ég gaman af því að yrkja skondin kvæði við allskyns tilefni og notaði húmor til þess að takast á við allskyns verkefni daglegs lífs. Í nokkur skipti hef ég verið veislustjóri, kynnir á samkomum og slíkt en aldrei undir þeim formerkjum að ætla að vera fyndin. Í gegnum tíðina hef ég verið svo lánsöm að fá að starfa með flottu fólki og í aðstæðum sem að krefjast þess að tala fyrir framan aðra. Mínir styrkleikar liggja í að búa til góða stemningu á viðburðum/í hópum og létta stemninguna þegar á þarf. Eftir því sem að ég verð eldri bætast sífellt við fleiri atriði og aðstæður í lífinu sem að eru kómískar á sinn hátt og ég myndi segja að minn húmor gangi mest út á það að gera góðlátlegt grín að hversdagslegum hlutum, ákvörðunum og aðstæðum,“ segir Anna Lilja í kynningu á fésbókarsíðu keppninnar.
![](http://localhost:8888/skagafrettir/wp-content/uploads/2020/02/Screen-Shot-2020-02-28-at-9.06.06-AM-1016x1024.png)
![](http://localhost:8888/skagafrettir/wp-content/uploads/2020/02/84971471_180666543343285_7542934475630444544_n.png)
Kynnar keppninnar voru þau Kjartan Atli Kjartansson og Júlíana Sara Gunnarsdóttir en í dómnefnd sátu þau Logi Bergman Eiðsson, Fannar Sveinsson, Gummi Ben, Pálmi Guðmundsson, Steinunn Camilla Sigurðardóttir og Ragna Gestsdóttir.