Skagamaðurinn Helgi Laxdal Aðalgeirsson var í stóru hlutverki með íslenska karlalandsliðinu á Evrópumeistaramótinu í hópfimleikum sem lauk í gær í Portúgal.
Helgi Laxdal framkvæmdi m.a. ofurstökk á dýnu sem aldrei áður hefur verið framkvæmt í slíkri keppni – og hann var kjörinn í úrvalslið mótsins. Samsetningin hjá Helga í ofurstökkinu var heil skrúfa, kraftstökk og tvöfalt heljarstökk með beinum líkama og tveimur og hálfri skrúfu.
Árangur Íslands var frábær á mótinu en öll landsliðin sem tókui þátt enduðu á verðlaunapalli.
Kvennalandslið Íslands náði frábærum árangri þegar liðið fagnaði Evrópumeistaratitlinum eftir æsispennandi keppni gegn Svíum. Ísland varð síðast Evrópumeistari árið 2012 í kvennaflokki.
Í karlaflokki sigraði Svíþjóð en Helgi Laxdal og félagar hans úr liði Íslands fengu silfurverðlaun – og er þetta í fyrsta sinn sem Ísland nær slíkum árangri í karlaflokki.
Ættartréð:
Foreldrar Helga Laxdal eru þau Aðalgeir Jónasson og Lilja Lind Sturlaugsdóttir. Systkini Helga eru : Finnbogi Laxdal og Jónas Laxdal.