Hér á þessari mynd má sjá pramma frá Running Tide sem var dreginn inn í Hvalfjörðinn í dag. Eldgos á Reykjanesskaga er í aðalhlutverki á myndinni og segir allt sem segja þarf um þau öfl sem búa í náttúrunni.
Bandaríska loftslagsfyrirtækið Running Tide hóf starfsemi í Nýsköpunarsetrinu Breið á Akranesi fyrir rétt rúmlega tveimur árum. Rannsóknir og framleiðsla á þörungum til kolefnisbindingar í hafi er rauði þráðurinn hjá líftæknifyrirtækinu. Forsvarsmenn fyrirtækisins telja að Ísland hafi alla burði til að verða miðstöð kolefnisbindingar í heiminum. Pramminn er hluti af verkefni Running Tide þar sem að stórþörungar eru nýttir til að binda kolefni í stórum stíl.
Eldgosið sem hófst á Reykjanesskaga í gær losar gríðarlegt magn af koldíoxíði (CO2) út í andrúmsloftið. Árlega losar mannkynið um það bil 37 milljarða tonna af koldíoxíði (CO2) út í andrúmsloftið með því að brenna kolum, olíu og gasi.
Running Tide er nýstárlegt fyrirtæki sem þróar og nýtir tækni og aðferðir sem örva náttúruleg ferli sjávarins í að grípa, binda, og geyma kolefni til langs tíma. Hluti lausnarinnar sem Running Tide vinnur að byggist á að rækta stórþörunga sem binda kolefni í stórum stíl á sérhönnuðum baujum á hafi úti. Þörungarnir og baujurnar vinna einnig gegn súrnun sjávar. Lausnir fyrirtækisins á sviði kolefnisbindingar bæta þannig lífríki hafsins og skila ávinningnum til sjávarplássa og vistkerfa heimsins. Þróun og framleiðsla á þörungunum sjálfum er staðsett á Akranesi.
