Karlalið ÍA í körfuknattleik hefur keppni á Íslandsmótinu n.k. föstudag þegar Hrunamenn koma í heimsókn á Akranes. Leikið verður í íþróttahúsinu við Jaðarsbakka.
Lið ÍA er í næst efstu deild Íslandsmótsins og er liðinu spáð 7. sæti af alls 12 liðum. Leikin verður tvöföld umferð á Íslandsmótinu í 1. deild karla. Liðið sem endar í efsta sæti eftir deildarkeppnina fer beint upp í Subway deildina, efstu deild, en liðin í sætum 2-9 leika til úrslita um eitt laust sæti til viðbótar í efstu deild.
Deildin verður áhugaverð þar sem að lið KR leikur í næst efstu deild en KR er eitt sigursælasta félag allra tíma í körfubolta í karlaflokki. KR er spáð efsta sæti og ÍR, sem féll einnig úr úrvalsdeildinni s.l. vor, er spáð öðru sæti.
Lið ÍA hefur fengið góðan liðsstyrk í sumar. Skagamennirnir Aron Elvar Dagsson og Styrmir Jónasson snúa til baka á heimaslóðir – og er endurkoma þeirra mikil lyftistöng fyrir félagið. Jónas Steinarsson er kominn frá ÍR og Srdan Stojanovic frá Álftanesi.
Lucien Christofis leikur á ný með ÍA en hann var einn af lykilmönnum ÍA í fyrra – og hinn bráðefnilegi Þórður Freyr Jónsson hefur einnig samið á ný við ÍA.
Nebosja Knezevic er þjálfari liðsins – en hann er að hefja sitt annað tímabil með liðið.
Komnir:
Jónas Steinarsson frá ÍR
Aron Elvar Dagsson frá Breiðablik
Styrmir Jónasson frá Selfossi
Srdan Stojanovic frá Álftanesi
Farnir:
Gabriel Adersteg til ÍR
Endursamið:
Lucien Christofis
Þórður Freyr Jónsson
Spá fyrirliða, þjálfara og formanna félaga 1. deild karla er hér fyrir neðan.
