Hákon Arnar Haraldsson og Glódís Perla Viggósdóttir voru í dag útnefnd sem knattspyrnufólk ársins 2023.
Þetta er í annað árið í röð sem Hákon Örn og Glódís Perla fá þessa viðurkenningu hjá Knattspyrnusambandi Íslands.
Á heimasíðu KSÍ kemur fram að kjörið hafi verið afgerandi í báðum tilfellum.
Hákon Arnar er fæddur á Akranesi og lék með yngri flokkum ÍA og meistaraflokki áður en hann fór til FCK í Kaupmannahöfn. Hann er leikmaður franska liðsins Lille sem keypti Hákon frá FCK fyrir tæplega 3 milljarða kr. Hann er næst dýrasti knattspyrnumaður Íslands frá upphafi.
Knattspyrnumaður ársins: Hákon Arnar Haraldsson
Hákon Arnar Haraldsson er Knattspyrnumaður ársins í annað sinn og annað árið í röð. Hákon hefur fest sig í sessi sem lykilmaður í íslenska landsliðinu og lék hann 8 af 10 leikjum Íslands í undankeppni EM á árinu. Hann hefur alls leikið 15 A-landsleiki og skorað í þeim 3 mörk. Hákon var máttarstólpi í liði FC Köbenhavn í Danmörku á liðnu tímabili og fagnaði danska meistaratitlinum í vor sem leið, lék 29 leiki í deildinni, skoraði 4 mörk og lagði upp 4, auk 6 bikarleikja og 8 leikja (1 mark) í Meistaradeild UEFA. Um sumarið flutti Hákon sig um set þegar hann var seldur til franska úrvalsdeildarliðsins LOSC Lille. Þar hefur hann komið við sögu í 12 leikjum í deild og 6 leikjum í Sambandsdeild UEFA það sem af er tímabilinu.
2. sæti: Jóhann Berg Guðmundsson
3. sæti: Hákon Rafn Valdimarsson
Knattspyrnukona ársins: Glódís Perla Viggósdóttir
Glódís Perla Viggósdóttir er Knattspyrnukona ársins í annað sinn og annað árið í röð. Hún hefur sem fyrr verið fastur hlekkur í vörn Bayern München og íslenska landsliðsins á árinu og gegndi lykilhlutverki með báðum liðum. Glódís fagnaði þýska meistaratitlinum með Bayern í vor sem leið, lék allar mínútur í öllum 22 leikjum liðsins og skoraði þrjú mörk. Þá lék hún einnig 9 leiki með liði sínu í Meistaradeild UEFA þar sem Bayern féll úr leik í 8-liða úrslitum og 4 leiki í bikar. Á yfirstandandi tímabili hefur Glódís leikið alla leiki Bayern hingað til og er einn af fyrirliðum liðsins. Glódís, sem hefur leikið 120 A-landsleiki og skorað 10 mörk, er fyrirliði A landsliðs kvenna og lék hún alla leiki liðsins í Þjóðadeildinni og skoraði eitt mark, auk þess að leika sex af sjö vináttuleikjum ársins.
2. sæti: Karólína Lea Vilhjálmsdóttir
3. sæti: Sveindís Jane Jónsdóttir
