Þrír fyrrum leikmenn ÍA, og fyrrum þjálfari ÍA, komu við sögu í glæstum 4-1 sigri A-landsliðs Íslands í knattspyrnu gegn Ísrael í gærkvöld.
Leikurinn fór fram í Búdapest í Ungverjalandi – og með sigrinum er Ísland einum sigri frá því að komast í úrslitakeppni Evrópumótsins sumarið 2024.
Ísland mætir Úkraínu á þriðjudaginn í næstu viku í úrslitaleik um laust sæti á EM – og fer sá leikur fram í borginni Wroclaw í Póllandi.
Arnór Sigurðsson og Hákon Arnar Haraldsson voru í byrjunarliði Íslands – og Ísak Bergmann Jóhannesson kom inn á sem varamaður í síðari hálfleik. Jóhannes Karl Guðjónsson, fyrrum þjálfari karlaliðs ÍA, er aðstoðarlandsliðsþjálfari.
Eins og áður segir er úrslitaleikurinn á dagskrá á þriðjudaginn í næstu viku – og í þeim leik bætist einn Skagamaður til viðbótar í leikmannahóp Íslands, en Stefán Teitur Þórðarson, var kallaður inn í landsliðshópinn í gær.
