VÍS mun opna þjónustuskrifstofu á Akranesi í sumar. Þetta kemur fram í tilkynningu frá fyrirtækinu.
Skrifstofan verður að Dalbraut 1, í sama húsnæði og Íslandsbanki en stutt er síðan tilkynnt var um samstarf milli VÍS og Íslandsbanka.
Opnunin er liður í stefnu VÍS um að efla enn frekar þjónustu sína á landsbyggðinni en á síðasta ári bættist við ný skrifstofa í Reykjanesbæ.
„Þrátt fyrir að hægt sé að gera mjög margt á netinu tengt tryggingum þá vill fólk hafa valmöguleikann á að tala við aðra manneskju, sérstaklega í flóknari málum. Þá vilja viðskiptavinir okkar geta talað við einhvern sem getur leiðbeint þeim og tekið raunverulegt tillit til aðstæðna þeirra. Í slíkum aðstæðum skiptir sköpum að geta boðið upp á framúrskarandi þjónustu í heimabyggð. Við erum full tilhlökkunar að mæta aftur á Skagann”, segir Guðný Helga Herbertsdóttir forstjóri VÍS.
Ingibjörg Ólafsdóttir, betur þekkt sem Inga Óla, mun veita skrifstofunni forystu en hún hefur nýlega tekið við starfi sem þjónustustjóri VÍS á Vesturlandi. Inga býr yfir mikilli reynslu en hún hefur starfað hjá VÍS í þrjá áratugi og mun hún ásamt samstarfsfólki sínu sjá til þess að viðskiptavinir á Vesturlandi hljóti framúrskarandi þjónustu.
„Ég er stolt af því að leiða þjónustuna á Vesturlandi frá nýrri skrifstofu okkar í mínum heimabæ. Við höfum verið með tímabundnar opnanir síðustu mánuði sem viðskiptavinir og aðrir íbúar tóku mjög vel í þannig að það eru miklar gleðifregnir að hafa fundið varanlegt húsnæði fyrir starfsemina okkar á Akranesi,“ segir Inga Óla, þjónustustjóri VÍS á Vesturlandi.
Starfsmaður VÍS mun sitja í útibúi Íslandsbanka frá byrjun maí en skrifstofa VÍS mun opna á sumarmánuðum.
- Skagafréttir hafa á undanförnum átta árum beint kastljósinu að mannlífinu á Akranesi og flutt mörg þúsund fréttir af Skagamönnum nær og fjær.
- Bæjarfréttamiðill sem er opinn fyrir alla er ekki sjálfsagður hlutur.
- Hefur þú tök á því að styðja við bakið á fréttamiðlinum okkar?
