Aron, Júlíus, Styrmir og Þórður valdir á úrtaksæfingar U-20 ára landsliðsins í körfu

Fjórir leikmenn úr röðum ÍA hafa verið valdir í æfingahóp U-20 ára landsliðs karla í körfuknattleik. Liðið mun æfa saman um miðjan desember – en Pétur Már Sigurðsson er þjálfari liðsins. 

Aron Elvar Dagsson, Júlíus Duranona, Styrmir Jónasson og Þórður Freyr Jónsson fá tækifæri í desember til að láta ljós sitt skína á úrtaksæfingu U-20 ára landsliðsins. Í byrjun næsta árs verður fækkað í æfingahópnum fyrir komandi verkefni.

U-20 ára landslið Íslands leikur á Norðurlandamótinu í lok júní á næsta ári, og í kjölfarið keppir liðið í A-deild Evrópumóts landsliða hjá FIBA. U-20 ára landslið Íslands er eitt af 16 sterkustu landsliðum Evrópu.