Á síðasta fundi bæjarstjórnar Akraness var samþykkt erindi frá Teiknistofu arkitekta, Árna Ólafssyni, fyrir hönd KFUM og KFUK á Akranesi þar sem óskað var eftir því að tillaga að deiliskipulagi Garðabrautar 1, sem félagið hefur látið vinna, yrði auglýst í samræmi við ákvæði skipulagslaga.
Í tillögunni er lagt til að núverandi samkomuhús KFUM og KFUK við Garðabraut verði rifið.
Í greinargerðinni kemur m.a. fram að með endurnýtingu lóðarinnar að Garðabraut 1 með niðurrifi byggingar, sem lokið hefur hlutverki sínu, og uppbyggingu þéttrar íbúðarbyggðar, sem tekur þátt í mótun bæjarmyndar svæðisins, er stuðlað að framfylgd markmiða í landsskipulagsstefnu. Jafnframt stuðlar uppbygging lóðarinnar að þeim markmiðum sem sett eru í gildandi aðalskipulagi.
Fullbyggð lóð á Garðabraut 1 mun fylla í ákveðið skarð sem er í bæjarmyndinni þar sem nýjar byggingar munu nýta lóðina talsvert betur en núverandi hús gerir.
