ÍA fagnaði sigri á REY-CUP í 3. flokki kvenna – úrslitin réðust í vítaspyrnukeppni


ÍA fagnaði sigri í 3. flokki kvenna á Alþjóðlega knattspyrnumótinu REY CUP sem lauk í dag. ÍA lék gegn norska liðinu Gjelleråsen IF í úrslitaleiknum sem fram fór á sjálfum Þjóðarleikvangi Íslendinga, Laugardalsvellinum.

Lilja Björg Ólafsdóttir skoraði fyrir ÍA af 40 metra færi og jafnaði metin eftir að norska liðið hafði skorað fyrsta mark leiksins.

Staðan var jöfn að loknum venjulegum leiktíma og úrslitin réðust í vítaspyrnukeppni. Skagakonurnar skoruðu úr öllum þremur vítaspyrnum sínum en norska liðið klikkaði á einni.

Þetta var fyrsti tapleikur norska liðsins í mótinu en liðið hafði fyrir úrslitaleikinn sigrað örugglega í öllum sínum leikjum.