Knattspyrnufélag ÍA óskaði nýverið eftir rekstrarleyfi á Aggapalli fyrir veitingastað í flokki II – E kaffihús. Umsóknin fékk grænt ljós á síðasta fundi bæjarráðs Akraness og þar áður hafði skóla – og frístundaráð samþykkt umsóknina.
Í afgreiðslu bæjarráðs kemur m.a. fram að bæjarráð leggi áherslu á að KFÍA gæti vel að því að tryggja ásættanlega umgjörð rekstrarins m.t.t. til þeirrar starfsemi sem annars fer fram í íþróttamannvirkjum Akraneskaupstaðar. KFÍA þarf einnig að huga að salernismálum sbr. athugasemdir heilbrigðiseftirlitsins.
Á fundi skóla- og frístundaráðs 29. júní 2021 afgreiddi ráðið erindi bæjarráðs og gerir ekki athugasemdir við veitingu vínveitingaleyfis.
Í fundargerð skóla -og frístundaráðs er einnig lögð áhersla á að leyfið afmarkast við Aggapall og leggur áherslu á góða umgengni og viðeigandi gæslu.
Sýslumaðurinn á Vesturlandi hafði áður óskað eftir umsögn bæjarráðs vegna umsóknarinnar.
Veitingastaðir sem eru í flokki II – E kaffihús eru skilgreindir sem umfangslitlir áfengisveitingastaðir þar sem starfsemin er ekki til þess fallin að valda ónæði í nágrenninu, svo sem með háværri tónlist, og afgreiðslutími er ekki lengri en til kl. 23 og kalla ekki á mikið eftirlit og/eða löggæslu.
Í umsókninni kemur framn að afgreiðslutími væri frá 12-22 virka daga og frá 9-23 á frídögum. Það sama á við afgreiðslutíma útiveitinga.
Aggapallur er nefndur eftir Agnari Sigurðssyni sem starfaði alla sína tíð hjá sömu fjölskyldunni, fjórum ættliðum, fyrst í verslun Böðvars Þorvaldssonar við Bakkatún, síðan hjá Haraldi Böðvarssyni, í Sandgerði og á Akranesi.
Þann 10. mars 2011 var fyrsta skóflustungan tekin að útivistarpallinum fyrir aftan stúkuna á Jaðarsbakkavelli og var pallurinn nefndur Aggapallur. Þar er afar gott skjól á fallegum sumardögum og bein tenging við áhorfendastúkuna við Norðurálsvöllinn.