Uppbygingarsjóður Vesturlands „mokaði“ út styrkjum í fjölbreytt verkefni á Akranesi

Uppbyggingarsjóður Vesturlands úthlutaði á dögunum 95 styrkjum til verkefna sem efla munu atvinnuþróun og menningu í landshlutanum.

Heildarupphæð styrkja tæplega 47.6 milljónum kr.

Alls bárust 127 umsóknir og í heildina sóttu verkefnin samanlagt um rúmlega 224 mkr.

Þetta er áttunda árið sem sjóðurinn úthlutar styrkjum til annars vegar menningarverkefna og hins vegar atvinnu- og nýsköpunarverkefna í samræmi við Sóknaráætlun Vesturlands.

Þetta var fyrri úthlutun ársins en síðsumars verður aftur úthlutað í flokki atvinnu- og nýsköpunarstyrkja.

Alls hlutu 72 verkefni á sviði menningar styrki sem námu 29.2 milljónum kr., og 17 verkefni hlutu styrki til atvinnuþróunar upp á alls 13.5 milljónum kr. og þá voru veittar tæplega 5 milljónir kr. til 6 stofn- og rekstrarverkefna á sviði menningar.

Mikill fjölbreytileiki er í verkefnunum og það kveður við nýjan tón í nýsköpunarverkefnum þar sem umsóknir er varða líftækni bárust sem er áhugaverð þróun og stefnir í mikla grósku á því sviði.

Áfram er mikill kraftur og frjó hugsun hjá listafólki og þeim sem starfa í menningartengdum greinum sem mun efla menningu á Vesturlandi.

Fjölmargir aðilar á Akranesi fengu styrki fyrir ýmis verkefni.

• Nýstofnuð líftæknismiðja Breiðar þróunarfélagsins fékk 2 milljónir.
• Verkefnið „Sæmeti tilraunaframleiðsla úr þara á Skipaskaga“ – Gunnar Ólafsson hjá ALGÓ einnig 2 milljónir
• Muninn Film fékk fyrir Docfest heimildamyndahátíðina 2 milljónir.
• Muninn fékk einnig 1 milljón fyrir Icedoc útibíó.
• Verkefnin „Hlaðan“ og „Sigurður málari“ samtals 750 þúsund.
• Sara Blöndal og Heiðar Mar hjá Muninn fengu 300 þúsund króna styrk til að halda verkefnið, „Jólagleði í Garðalundi“.
• Sara fékk auk þess ásamt Byggðasafninu að Görðum 500 þúsund til að klára grunnsýningu Byggðasafnsins.
• Ársæll R Erlingsson og Lovísa Lára Halldórsdóttir hjá Frostbiter fengu 500 þúsund til hryllingsmyndahátíðar.
• Hlédís Sveinsdóttir matarfrumkvöðull fékk 500 þúsund til verkefnisins „Sætir sauðir“
• Í samstarfi við Ólaf Pál Gunnarsson fékk Hlédís einnig 500 þúsund
  fyrir verkefnið „Skaginn syngur inn jólin“
• Menningarstarfsemi á Smiðjuloftinu, Valgerður Jónsdóttir, fékk 700 þúsund.