Blæði- og kælitankar á rúntinum á Akranesi

Glöggir vegfarendur á leið sinni um Neðri-Skaga í morgun tóku eftir stórtækum flutningum í lögreglufylgd af Grenjum yfir á hafnarsvæðið.

Þar voru á ferðinni þaulvanir menn frá ÞÞÞ með tanka af stærri gerðinni.  

Það eru starfsmenn Skagans 3X á Akranesi sem eru að ljúka smíði tveggja tanka fyrir laxasláturhús Arctic Fish er nú rís á hafnarkantinum í Bolungarvík. 

Í morgun voru tankarnir fluttir frá verksmiðjudyrum Skagans 3X á Akranesi um borð í danska fóðurflutningaskipið Vermland sem flytur þá til Bolungarvíkur. Þetta kemur fram í tilkynningu frá fyrirtækinu. 

 Að sögn starfsmanna Skagans 3X er um að ræða tvo 100 m3 RoteX skrúfutanka. Annars vegar er það RoteX blæðitankur sem tryggir jafna blæðingu fisksins eftir slátrun og hins vegar RoteX tankur sem ofurkælir fiskinn með SUB-CHILLING™ tækni þeirri sem starfsmenn Skagans 3X hafa þróað á undanförnum árum.

Tankarnir eru þeir stærstu sem fyrirtækið hefur framleitt til þessa og afkasta þeir um 30 tonnum á klukkustund. Tankarnir sjálfir vega um 23 tonn hvor og er stærð þeirra slík að aðeins fyrrum húsnæði skipasmíðastöðvarinnar Þorgeirs & Ellerts gat hýst smíðina.

SUB-CHILLING tm tæknin ryður sér mjög til rúms í fiskvinnslu. Með henni gefst kostur á að snöggkæla og pakka fiskinn í -1°C án þess að hann frjósi. Með því lengist talsvert geymsluþol afurðarinnar, engan ís þarf til flutningsins sem um leið lækkar verulaga flutningskostnað.

Vermland leggur úr höfn á Akranesi síðdegis en þar sem veðurspá er slæm er óvíst hvenær skipið kemur til Bolungarvíkur.