Menningar-, nýsköpunar- og háskólaráðherra hefur lokið við úthlutun styrkja til hagnýtingar og innleiðingar íslenskrar máltækni fyrir styrkárið 2024.
Styrkirnir, sem voru auglýstir undir heitinu Skerfur, eru hluti af máltækniáætlun 2. Alls voru 12 verkefni styrkt eða 52% umsókna.
Fyrirtækið Grammatek á Akranesi fékk úthlutað styrkjum – fyrir tvö verkefni eins og sjá má í listanum hér fyrir neðan.
Markmið Grammateks er að þróa framúrskarandi talgervilsraddir og talgervilslausnir fyrir íslensku en fyrirtækið er í fararbroddi í mótun og þróun íslenskrar máltækni.
Anna Björk Nikulásdóttir og Daniel Schnell eru frumkvöðlarnir á bak við Grammatek sem er með aðsetur í nýsköpunarsetrinu Breið.
Alls bárust verkefnastjórninni 23 umsóknir fyrir samtals rúmlega 193 m.kr.
Til úthlutunar á styrkárinu voru 60 m.kr. skv. máltækniáætlun.
Skerfur veitir styrki til verkefna sem fela í sér innleiðingu og/eða hagnýtingu á íslenskri máltækni í samræmi við máltækniáætlun 2. Styrkirnir eru ætlaðir til að styðja við þróun og innleiðingu hagnýtra endalausna sem byggja á máltækni. Styrkveiting er háð því að verkefni styðji við meginmarkmið máltækniáætlunar um að gera íslensku gjaldgenga í stafrænum heimi og stuðli að aukinni notkun á íslensku í tæknivörum og hugbúnaði.
Hér er yfirlit yfir verkefni sem hlutu styrk frá Skerfi fyrir styrkárið 2024:
- Landspítali: Talgreining á samtölum við sjúklinga
Styrkur: 14.590.000 kr. - Iris Edda Nowenstein: ALDA – máltækni fyrir talmeinafræðinga
Styrkur: 7.000.000 kr. - Sundra ehf.: Sjálfvirk textun og þýðingar fyrir íslensk myndbönd
Styrkur: 6.580.000 kr. - Ríkisútvarpið: Sjálfvirk textun beinna útsendinga
Styrkur: 6.050.000 kr. - Grammatek: Ljóslestur fyrir talgervingarforritið Símaróm
Styrkur: 5.062.000 kr. - Bara tala: Spjallmenni fyrir íslenskukennslu
Styrkur: 4.750.000 kr. - Grammatek: Nýjar talgervilsraddir fyrir Símaróm
Styrkur: 4.500.000 kr. - Hljóðbókasafn Íslands: MathCAT Íslands – hugbúnaður sem gerir talgreinum kleift að lesa STEM-formúlur
Styrkur: 3.842.575 kr. - Miðeind: Málstaður – samantekt og einföldun á texta
Styrkur: 2.250.000 kr. - Miðeind: Erlendur – þýðingarkerfi innleitt í kerfi Landspítala
Styrkur: 2.250.000 kr. - KatlaCode: Sjálfvirknivæðing klínískrar kóðunar hjá Landspítala
Styrkur: 2.000.000 kr. - Miðeind: Málrýnir innleiddur í ritstjórnarumhverfi RÚV
Styrkur: 1.125.000 kr.
