Hrönn er þriðja konan sem kjörin er formaður ÍA

Eins og áður hefur komið fram á skagafrettir.is er Hrönn Ríkharðsdóttir nýr formaður Íþróttabandalags Akraness, ÍA.

Hrönn er þriðja konan sem gegnir þessu embætti frá því að ÍA var stofnað árið 1946. Hrönn fetar í fótspor föðurs síns, Ríkharðs Jónssonar, sem var formaður ÍA á árunum 1971-1977.

Hrönn er 18. einstaklingurinn sem tekur að sér þetta sjálfboðaliðastarf fyrir hönd íþróttahreyfingarinnar á Akranesi. Helga Sjöfn Jóhannesdóttir var fyrsta konan sem kjörin var formaður ÍA árið 2016 og Marella Steinsdóttir var sú önnur í röðinni.

Fram að kjöri Helgu höfðu 14 karlar gegnt þessu embætti. Guðmundur Sveinbjörnsson er sá sem hefur oftast verið formaður ÍA, eða í 16 ár samtals. Guðmundur var formaður á árunum 1951-1961 og tók á ný við formennsku á árunum 1965-1970. Sturlaugur Sturlaugsson er með lengsta samfellda setu í formannsembættinu en hann var í 15 ár samfellt formaður ÍA á árunum 1999-2013.