ÍA tryggði sér í kvöld sæti í 16-liða úrslitum Mjólkurbikarkeppni karla í knattspyrnu með 5-3 sigri gegn Sindra á Höfn í Hornafirði. Þetta er í fyrsta sinn sem liðin mætast í mótsleik utanhúss
Heimamenn, sem leika í 3. deild á Íslandsmótinu eða fjórðu efstu deild, komust yfir á 9. mínútu með marki frá Abdul Bangura.
Steinar Þorsteinsson jafnaði metin fyrir ÍA undir lok fyrri hálfleiks og staðan var jöfn í hálfleik. Sorie Barrie kom Sindra yfir á ný með marki á 52. mínútu og Gunnar Orri Aðalsteinsson, leikmaður Sindra, setti boltann í eigið mark tíu mínútum síðar og jafnaði metin fyrir ÍA.
Kaj Leo Í Bartalstovu kom ÍA í 3-2 á 67. mínútu og Guðmundur Tyrfingsson bætti við fjórða markinu á 79. mínútu, staðan 4-2 fyrir ÍA.
Ivan Eres hleypti spennu í leikinn tveimur mínútum síðar með þriðja marki Sindra en Gísli Laxdal Unnarsson tryggði sigurinn hjá ÍA með fimmta marki liðsins fjórum mínútum fyrir leikslok.
Eins og áður segir er þetta í fyrsta sinn sem liðin eigast við utanhúss en eina viðureign félaganna fyrir leikinn í kvöld var á Íslandsmótinu innanhúss árið 2004 þar sem að ÍA sigraði 5-2.
Sindri er í fjórðu efstu deild, 3. deild, en liðið mætti Kára nýverið þar sem að leikurinn endaði með jafntefli 1-1. Káramenn mæta stórliði FH á morgun, miðvikudag á Kaplakrikavelli í Hafnarfirði.
Karlalið ÍA hefur sigrað 9 sinnum í bikarkeppni KSÍ en KR er sigursælasta liðið í keppninni með 14 titla og Valur er í öðru sæti með 11 titla.
32-liða úrslit
Þriðjudagurinn 24. maí
Höttur/Huginn – Ægir á Fellavelli kl. 17:00
Sindri – ÍA á Sindravöllum kl. 18:00
Selfoss – Magni á JÁVERK-vellinum kl. 18:00
Vestri – Afturelding á Olísvellinum kl. 18:00
HK – Grótta í Kórnum kl. 19:15
Grindavík – ÍR á Grindavíkurvelli kl. 19:15
Hvíti Riddarinn – Kórdrengir á Malbikstöðinni að Varmá kl. 19:15
Dalvík/Reynir – Þór á Dalvíkurvelli kl. 19:45
Miðvikudagurinn 25. maí
Fylkir – ÍBV á Würth vellinum kl. 18:00
FH – Kári á Kaplakrikavelli kl. 19:15
Keflavík – Njarðvík á HS Orku vellinum kl. 19:15
Stjarnan – KR á Samsungvellinum kl. 19:45
Fimmtudagurinn 26. maí
Fram – Leiknir R. á Framvelli kl. 14:00
KA – Reynir S. á KA-velli kl. 16:00
Haukar – Víkingur R. á Ásvöllum kl. 19:15
Breiðablik – Valur á Kópavogsvelli kl. 19:45
         |
|
|
|