Sóknarleikur var í aðalhlutverki þegar ÍA og Njarðvík mættust í kvöld í 3. umferð Bónusdeildar karla í efstu deild Íslandsmótsins í körfuknattleik.
Úrslitin réðust í framlengingu og höfðu gestirnir frá Suðurnesjum betur 130:119.
Þetta var fyrsti sigur Njarðvíkurliðsins á tímabilinu en ÍA er með 1 sigur og 2 töp – og var þetta fyrsti tapleikur ÍA á heimavelli í rúmt ár.
Staðan var 32-30 eftir fyrsta leikhluta, staðan í hálfleik var 55:53 fyrir ÍA. Njarðvík komst yfir eftir þriðja leikhluta, 83:80. Staðan var 109:109 að loknum venjulegum leiktíma. Njarðvík náði góðum tökum á leiknum þegar mest á reyndi og skoraði 21 stig gegn 10 í framlengingunni.
Miðherjinn Gojko Zudzum og skotbakvörðurinn Josip Barnjak voru bestu leikmenn ÍA. Zudzum var með 30 stig og 9 fráköst og Barnjak skoraði 29 stig, gaf 9 stoðsendingar og tók 6 fráköst.
Bandaríkjmaðurinn Darnell Cowart sýndi einnig hvað í honum býr en hann skoraði 34 stig – en varnarleikur hans var langt undir meðallagi – líkt og í undanförnum þremur leikjum.
Styrmir Jónasson og Lucien Thomas Christofis voru góðir í vörn og munaði mikið um að Styrmir var utan vallar með 5 villur þegar mest á reyndi á lokakaflanum.
