Að undanförnu hefur Akraneskaupstaður unnið að áhugaverðu verkefni í samstarfi við veitingaaðila í bæjarfélaginu.
Niðurstaða er komin í málið og verður Skagapassinn keyrður áfram sem tilraunaverkefni út árið 2020.
Passinn gengur út á það að fullorðnir einstaklingar geta keypt sér passa á aðeins 1.500 kr. og fá með passanum aðgang fyrir einn að Jaðarsbakkalaug, Akranesvita og Byggðasafninu í Görðum.
Þess má geta að aðgangur er ókeypis fyrir einstaklinga undir 18 ára aldri að þessum þremur stöðum. Jafnframt gefur passinn handhafa 15% afslátt af mat á fimm veitingastöðum á Akranesi gegn framvísun hans.
Til að byrja með verður passinn til sölu í Akranesvita, Jaðarsbakkalaug og á Byggðasafninu og hefst sala miðvikudaginn 17. júlí.
Veitingastaðirnir sem um ræðir eru Gamla Kaupfélagið, Galito, Kallabakarí, Galito Bistro og Skagakaffi sem opnar um næstu mánaðarmót við Akratorg.
