Aðsend grein:
Nú eru ekki nema ellefu dagar í kjördag og framboðin keppast að sjálfsögðu við að kynna sín stefnumál. Uppbygging íþróttamannvirkja og aðstöðu er eitt af þeim fjölmörgu málum sem brenna á kjósendum.
Á því kjörtímabili sem nú er að ljúka og því síðasta hefur verið framkvæmt fyrir um sex milljarða í íþróttamannvirkjum. Nýtt íþróttahús við Jaðarsbakka, fimleikahús, reiðhöll, golfskáli og endurbætur á íþróttahúsinu við Vesturgötu. Þrátt fyrir þessa miklu uppbyggingu á síðustu árum er ljóst að þörf er fyrir áframhaldandi uppbyggingu á næstu árum. Framkvæmdir við nýja innilaug og afþreyingarmöguleika henni tengdri, æfingarvöllur og nýr aðalvöllur á Jaðarsbökkum, stækkun golfvallar í 27 holur og svo mætti lengi telja.
Starf bæjarfulltrúa felst einkum í því að taka ákvarðanir um forgangsröðun verkefna. Það sjá allir að síðustu ár hefur einkum verið forgangsraðað í þágu skóla og íþrótta og er það vel. Hins vegar gætu einhverjir kosið að forgangsröðun fjármuna hefði verið með öðrum hætti enda sýn íbúa og þarfir misjafnar.
Það skiptir miklu máli að bæjarfulltrúar sjái heildarmyndina og hugsi til framtíðar þegar að teknar eru stórar ákvarðanir með fjármuni bæjarfélagsins. Þetta hefur fengið mig til þess að leiða hugann að því hverju íþróttir skili til samfélagsins, þar með talið til hagkerfisins okkar á Akranesi. Það eru líklega flestir sammála um að íþróttir og hreyfing séu ein af undirstöðum líkamlegrar og andlegrar heilsu og jafnframt að þær gegni stóru hlutverki í félagslegum þroska. Til lengri tíma skilar þessar fjárfestingar sér í lægri kostnaði sveitarfélagsins þar sem hún dregur úr álagi á velferðar- og félagskerfið og stuðlar að betri lífsgæðum fyrir alla. Íþróttir eru einnig stór þáttur í sjálfsmynd samfélags okkar Skagamanna.
Hvað skagahagkerfið varðar þá skiptir íþróttahreyfingin einnig miklu máli, þar með talið þjónustustigið á Akranesi. Ef rennt er í gegnum ársreikninga íþróttafélaganna má sjá að félögin eru að skila um 60 til 70 milljónum í útsvar til bæjarsjóðs, aðildarfélög ÍA eru nefnilega töluvert stór vinnuveitandi.
Mjög varlega áætlað má gera ráð fyrir því að á bilinu 50.000 og 60.000 gestir sæki bæinn heim árlega á hina ýmsu viðburði íþróttafélaganna. Hér höfum við iðkendur á öllum aldri, forráðamenn, fjölskyldur, stuðningsmenn og allt þar á milli, allir þessir gestir þurfa á fjölbreyttri þjónustu að halda.
Með áframhaldandi uppbyggingu í kringum metnaðarfullt og fjölbreytt íþróttastarf 20 aðildarfélaga ÍA má auðveldlega sjá fyrir sér að þessi gestafjöldi geti vaxið gríðarlega. Þetta skiptir sköpun við uppbyggingu gistimöguleika, veitingahúsa, verslunar, fjölbreyttrar þjónustu og afþreyingar.
Íþróttaferðaþjónustubærinn Akranes, hljómar það ekki vel?
Ragnar Sæmundsson:
Höfundur er bæjarfulltrúi og skipar 1. sæti á lista Framsóknar og frjálsra á Akranesi
