Verður Arnar þriðji Skagamaðurinn sem þjálfar A-landslið karla í knattspyrnu?

Skagamaðurinn Arnar Bergmann Gunnlaugsson er líklegastur til þess að taka við íslenska A-landsliðinu í knattspyrnu karla.

Arnar er þjálfari Víkings í Reykjavík en samkvæmt heimildum mbl.is eru forráðamenn KSÍ í viðræðum við Víkinga – en Arnar á eftir eitt ár af samningi sínum við félagið.  

Arn­ar, er 51 árs og fundaði hann með KSÍ á dögunum, en KSÍ ræddi einnig við tvo aðra þjálfara. 

Ef Arnar verður ráðinn sem þjálfari A-landsliðs karla verður hann þriðji Skagamaðurinn sem ráðinn er aðalþjálfari liðsins. 

Ríkharður Jónsson var fyrsti Skagamaðurinn sem tók þetta verkefni af sér árið 1962 og hann tók á ný við liðinu sem þjálfari á árunum 1969-1971. 

Guðjón Þórðarson tók við A-landsliði karla árið 1997 og gegndi hann því starfi til ársins 1999.

Framund­an hjá karla­landsliðinu eru tveir um­spils­leik­ir gegn Kó­sovó um sæti í B-deild Þjóðadeild­ar­inn­ar og fara þeir fram í mars.