Aðsend grein:
Þegar ný gjaldskrá var kynnt til sögunnar á Akranesi árið 2023 var dregið upp nýtt tól úr verkfæraskúffu bæjarins: innviðagjaldið. Á pappírunum hljómar orðið vel, enda vilja allir búa í samfélagi með traustum og góðum innviðum. En þegar rýnt er á bak við fallegu orðin blasir raunveruleikinn við íbúum. Þetta svokallaða gjald er ekkert annað en skattur á byggingariðnaðinn til þess eins að brúa bilið og bjarga hallarekstri sveitarfélagsins.
Hér er mikilvægt að greina á milli grunnhugtaka í fjármálum. Gatnagerð og uppbygging nýrra hverfa er ekki hefðbundin rekstrarframkvæmd – hún er fjárfesting. Í reikningsskilum sveitarfélaga á slík fjárfesting að eignfærast og fjármagnast með sérstökum gatnagerðargjöldum af nýbyggingum og langtímalánum, sem greiðast niður á löngum tíma. Með því að kasta innviðagjaldi ofan á reglulega gjaldskrá er bærinn að nota fjárfestingarverkefni sem afsökun til að innheimta skatt í daglegan rekstur.
Afleiðingarnar af þessari stefnu blasa nú við okkur öllum. Það hafa hreinlega aldrei verið jafnmargar lóðir lausar til umsóknar á Akranesi og einmitt núna. Kaupendur og byggingaraðilar halda að sér höndum. Vissulega er vaxtaumhverfið ekki að hjálpa til en að herja á íbúa með nýjum innviðasköttum hefur bænum tekist að gera uppbyggingu hér ófýsilegri en áður. Í stað þess að laða að nýja íbúa og fjármagna innviðina með eðlilegum hætti, situr bærinn uppi með auðar lóðir og reynir að neyða núverandi íbúa til að borga brúsann fyrir tóman fasteignamarkað. Það er dýrt að láta heilt hverfi standa autt í langan tíma.
Lóðirnar á Akranesi eru einfaldlega orðnar allt of dýrar, hvort sem litið er til Skógahverfis eða á Sementreitnum, sem hækkar upphafskostnað framkvæmda upp úr öllu valdi. Þegar lóðir eru afskammtaðar á okurverði þorir enginn að hefja ný verkefni, sem skapar dýr stopp fyrir byggingariðnaðinn, ógnar lífsviðurværi fólks og hrekur dýrmætar skatttekjur yfir flóann. Bærinn á ekki að nota lóðasölu sem gróðrabragð í bæjarsjóð heldur sem tæki til að laða að nýja íbúa og tryggja vinnu fyrir iðnaðarmenn á Akranesi. Það er hagur allra Skagamanna að hér sé boðið upp á samkeppnishæft lóðaverð sem gerir staðbundnum fyrirtækjum kleift að byggja á ábyggan og hagkvæman hátt.
Það er ekkert eðlilegt að byrja verkefni á að leggja út 102 milljónir fyrir lóð undir 6 íbúðar raðhús
Það er ekkert eðlilegt að byrja verkefni á að leggja út 372,549,530 kr fyrir lóð undir fjölbýli sem er með 44 íbúðum
Nú á laugardaginn göngum við til sveitarstjórnarkosninga. Maður skyldi ætla að á tímum þar sem rætt er um álögur og afkomu heimila, myndi pólitískur vilji standa til þess strika yfir svona skatt, því þetta snýst um atvinnuöryggi fyrir okkur iðnaðarmenn á Akranesi.
Óli B. Jónsson.
Höfundur er Húsasmíðameistari og verkefnastjóri hjá SF Smiðum ehf.
s
s
s