Í gærkvöldi hélt pilta-hluti Club71 árlegt jólakótelettukvöld. Club71 er félagsskapur úr árgangi fólks fæddum 1971 á Akranesi og ýmsum fylgifiskum þeirra. Þetta kemur fram í tilkynningu.
Markmiðið er að sameina það að gleðjast og láta gott af sér leiða í leiðinni. Kvöldið tókst ljómandi vel þó með árunum séu félagar farnir að sofa töluvert fyrr en gert var á árum áður.
Í vel á annan áratug hefur það verið hefð í klúbbnum að koma saman í upphafi aðventu og snæða saman kótelettur í raspi með tilheyrandi meðlæti. Fjöldi góðra gesta mætti á kótelettukvöldið en hátíðarræðan var í höndum eins af heiðursgestum kvöldsins, Ólafs Adolfssonar Alþingismanns, sem fór yfir ýmsar sögur úr sölum þingsins og búningsklefa Skagamanna á árum áður. Einnig má nefna tónlistarmanninn Jónas Björginsson sem er í árganginum, en hann frumflutti meðal annars nýtt, frumsamið jólalag á hátíðinni.
Eins og jafnan styrkja félagsmenn gott málefni á þessu kvöldi. Það var Hallur Guðjónsson, heiðurspiltur sem hlaut styrkinn að þessu sinni.
Katla Hallsdóttir amma Halls tók við styrknum. Hallur Guðjónsson er fimm ára Skagastrákur sem hefur þurft að glíma við meiri erfiðleika á lífsleiðinni en flestir jafnaldrar hans. Hann er virkilega flottur strákur sem er algjör bílakarl og hefur gífurlegan áhuga á íþróttum. Fjölskyldan þarf á sérhæfðum búnaði að halda, þar á meðal sérútbúnum bíl og hjólastólavæðingu heimilisins, í tengslum við veikindi Halls. Í október voru haldnir styrktartónleikar fyrir hann og þar kemur meðal annars fram:
„Hallur er fimm ára drengur sem fæddist með Spina Bifida, Hydrocephalus og Chiari malformation II fæðingargalla sem hafa áhrif á taugakerfið og krefjast mikillar læknisumönnunar. Við þriggja ára aldur greindist hann einnig með flogaveiki.
Á sinni stuttu ævi hefur hann gengið í gegnum fjölmargar aðgerðir, þurft að dvelja langdvölum á spítala og verið í reglubundnu eftirliti hjá læknum og öðrum fagaðilum.
Þrátt fyrir miklar hindranir hefur Hallur mikla lífsgleði. Hann er ákveðinn, hlýr og góður drengur sem sér alltaf það besta í fólki. Hann lætur hjólastólinn ekki stoppa sig og gerir allt sem hann ætlar sér. Hann á sér stóra drauma um að verða sjúkraflutningamaður, lögreglumaður og bílaviðgerðamaður.
Hallur hefur kennt okkur að það sem skiptir mestu máli er ekki hvað mætir manni heldur hvernig maður mætir því.“
Félagar Club 71 senda Halli og fjölskyldu, sem og landsmönnum öllum bestu aðventu- og jólakveðjur.
Club71 eða árgangur 71 á Akranesi er óvenju samheldinn og hefur staðið fyrir ýmsum góðgerðarmálum og menningarviðburðum á Akranesi síðustu 20 árin eða svo.
Ber þar hæst Þorrablót Skagamanna sem hópurinn kom í gang og sá um í 10 ár samfellt, en þessi viðburður hefur gefið af sér nokkrar milljónir árlega sem runnið hafa óskipt til góðgerðar- og íþróttamála á Akranesi. Einnig mætti nefna Brekkusöng bæjarhátíðarinnar Írskra daga sem er bæjarhátíð Akraness, en þennan viðburð sækja þúsundir manna á ári hverju í boði hópsins og samstarfsaðila.
Ýmsir einstakir viðburðir hafa verið haldnir á vegum félagsskaparins í gegnum tíðina en hópurinn fékk Menningarverðlaun Akraneskaupstaðar árið 2016.
Árið 2021 stóð félagsskapurinn fyrir viðburðinum „Stokkið fyrir Svenna.“ Tilgangurinn var að safna áheitum til kaupa á sérsmíðuðu rafhjóli fyrir einn úr árganginum, Sveinbjörn Reyr, sem lenti í alvarlegu slysi fyrir tveimur árum áður.
Viðburðurinn fór langt fram úr væntingum og 177 stökkvarar stukku í sjóinn af smábátabryggjusvæðinu á Akranesi og settu þar með óopinbert Íslandsmet í sjóstökki. Rúmlega 8 milljónir króna söfnuðust og sumarið 2022 var fjölsóttur viðburður þegar bæjarbúum bauðst að fara í hjólatúr með Svenna á nýja hjólinu og félögum hans um Akranes.
