[sam_zone id=1]

Smelltu hér ef þú vilt styrkja Skagafréttir

Kristín Þórhallsdóttir, sem keppir fyrir Kraftlyftingafélag Akraness, náði frábærum árangri á Íslandsmeistaramótinu í klassískum kraftlyftingum – sem fram fór um s.l. helgi. 

Kristín keppti í +84 kg. opnum flokki kvenna – þar sem hún varð meistari og hún varð einnig stigahæsti keppandi mótsins. Þar með tryggði hún sér einnig Íslandsmeistaratitilinn í kvennaflokki 2026. 

Fyrr á þessu ári varð hún Evrópumeistari í þessum þyngdaflokki í annað sinn á ferlinum. 

Hún setti fjölmörg Íslandsmet í opna flokknum og einnig í mastersflokki 1. 

Besti árangur hennar á þessu móti var eftirfarandi: 

Hnébeygja: 225 kg. (Ísl.met í opnum flokki og M1)
Bekkpressa: 130 kg. (Ísl.met í M1)
Réttstöðulyfta: 225 kg. (Ísl.met í opnum flokki og M1)

Samanlagt: 580 kg sem gefa 105,7 GL IPF stig

Kristín var efst í kjörinu á íþróttamanneskju ársins hjá ÍA 2020, 2021 og 2022. Hún skrifaði sögu á Akranesi árið 2020 þegar hún varð fyrsti einstaklingurinn sem stundar kraftlyftingar til þess að hljóta þennan titil hjá ÍA. 

Kristín keppir eins og áður segir í klassískum kraftlyftingum (einnig kallað „á kjötinu“), þar sem keppendur lyfta án sérstaks stuðningsbúnaðar eins og lyftingasloppa eða sérstakra búa, en mega nota belti og hnéhlífar.

Smelltu hér ef þú vilt styrkja Skagafréttir

Markús Páll Ellertsson, leikmaður ÍA, var valinn efnilegasti leikmaður Bestu deildar karla hjá KSÍ. Það eru leikmenn deildarinnar sem standa að þessu kjöri í samvinnu við KSÍ. 

Framherjinn kom til ÍA í mars á þessu ári eftir stutta dvöld hjá ítalska liðinu Trieste en hann er uppalinn hjá Fram. Markús Páll, sem er fæddur árið 2006, skoraði alls 15 mörk – í 27 leikjum. Hann var næst markahæsti leikmaður Bestu deildarinnar 2026. 

Pálmi Haraldsson, stjórnarmaður KSÍ, afhenti Markúsi Páli viðurkenninguna fyrir lokaleik ÍA í deildinni gegn Keflavík sem fram fór s.l. laugardag í Akraneshöllinni. 

Smelltu hér ef þú vilt styrkja Skagafréttir

Skagamaðurinn Þórður Þorsteinn Þórðarson var í dag útnefndur sem besti dómarinn í Bestu deild karla í knattspyrnu. 

Þorvaldur Örlygsson, formaður KSÍ, afhenti verðlaunin í dag. Arnar Ingi Ingvarsson var valinn besti dómarinn í Bestu deild kvenna. 

Það eru leikmenn Bestu deildarinnar sem standa að þessu kjöri í samstarfi við KSÍ. 

Þórður Þorsteinn hefur þrívegis verið valinn besti dómarinn í Bestu deild kvenna hjá KSÍ, 2022, 2023 og 2025.

Í ár dæmdi hann aðeins í Bestu deild karla og er þetta í fyrsta sinn sem hann fær þessa viðurkenningu í efstu deild karla. 

Smelltu hér ef þú vilt styrkja Skagafréttir

Þórður Páll Sölvason var nýverið valinn í lokahóp U-15 ára landsliðs Íslands í knattspyrnu sem keppir á UEFA Development móti í Austurríki. 

Mótið fer fram dagana 27. okt – 3. nóvember og þar leikur Ísland gegn Austurríki, Grikklandi og Spáni. 

Ómar Ingi Guðmundsson er þjálfari liðsins en alls eru 20 leikmenn í hópnum sem fer á mótið. 

Þórður Páll Sölvason var í lykilhlutverki í frábæru liði 3. flokks karla í sumar en liðið vann bæði Íslandsmeistara – og bikarmeistaratitilinn, auk þess að sigra á alþjóðlega mótinu Rey Cup. 

Á þessu ári hefur Þórður Páll æft með meistaraflokki ÍA og verið í leikmannahóp í Bestu deildinni. 

Hópurinn er þannig skipaður: 

  • Agnar Nóel Hallsson – Breiðablik
  • Benjamín Nói Svavarsson – FH
  • Fannar Helgi Kristinsson – FH
  • Guðmundur Árni Guðrúnarson – FH
  • Jón Mikael Gestsson – FH
  • Víkingur Hrafn Þórhallsson – FH
  • Adam Árnason – Getafe
  • Markús Allan Bett – HK
  • Ómar Snær Ívarsson – HK
  • Sölvi Rafn Einarsson – HK
  • Þórður Páll Sölvason – ÍA
  • Atli Hrafn Hlynsson – KA
  • Hermann Hrafn Guðlaugsson – KA
  • Novak Tufegdzic – Malmö FF
  • Unnar Jóhannesson – Selfoss
  • Guðni Bent Helgason – Tindastóll
  • Guðmundur Brynjar Wehmeier – Valur
  • Víkingur Otri Andersen – Valur
  • Franciszek August Dabrowski – Völsungur
  • Jóel Ingi Eysteinsson – Völsungur

Smelltu hér ef þú vilt styrkja Skagafréttir

Elkem og Landsvirkjun hafa skrifað undir nýjan samning um raforkukaup fyrir starfsemi Elkem á Grundartanga. Fyrri samningur fyrirtækjanna var til 2029 en sá nýi gildir til 2039.

Samningsmagn er óbreytt eða 127 MW. Þetta kemur fram í tilkynningu. 

Álfheiður Ágústsdóttir, forstjóri Elkem, segir í færslu á fésbókinni að erfitt sé að lýsa því hversu ánægjulegt það sé að hafa náð þessum áfanga. Samningurinn er lokaverkefni Álfheiðar í hlutverki leiðtoga fyrirtækisins en hún hefur verið forstjóri Elkem frá árinu 2020 – en hún mun hefja störf hjá sem aðstoðarforstjóri Travel Connect sem er eitt stærsta og öflugasta ferðaþjónustufyrirtæki á Íslandi og í Norður-Evrópu.

Hér fyrir neðan má sjá færslu Álfheiðar. 

„Það er erfitt að lýsa því hversu ánægjulegt það er að sjá þennan mikilvæga áfanga nást. Með nýjum raforkusamningi til ársins 2039 er kominn traustur grunnur að framtíð Elkem á Grundartanga, grunnur sem skapar tækifæri til áframhaldandi uppbyggingar, þróunar og verðmætasköpunar. Þessi samningur er mér sérstaklega hjartfólginn enda fékk ég að leiða verkefnið fyrir hönd Elkem ásamt frábæru fólki. Það er líka á vissan hátt táknrænt að þetta hafi verið mitt síðasta verkefni hjá félaginu.

Að fá að ljúka þeim kafla með því að leggja grunn að framtíðinni er ótrúlega dýrmætt. Að baki liggur mikil vinna, ótal samtöl, þrautseigja og umfram allt trú á að hægt væri að finna farsæla lausn. Ég er innilega þakklát öllum sem komu að verkefninu, lögðu sitt af mörkum og höfðu trú á því, líka þegar á móti blés.

Og það sem gerir þennan áfanga enn ánægjulegri er að vita hvaða fólk tekur nú við keflinu. Ég hef óbilandi trú á þessum frábæra hópi og getu hans til að nýta þau tækifæri sem fram undan eru og leiða Elkem inn í framtíðina.
Innilega til hamingju, kæru vinir hjá Elkem og Landsvirkjun! Þetta er stór dagur og ég gæti ekki verið stoltari af því sem við höfum áorkað saman.

Smelltu hér ef þú vilt styrkja Skagafréttir

Lárus Orri Sigurðsson er hættur sem þjálfari karlaliðs ÍA knattspyrnu.

Þetta kemur fram í tilkynningu frá félaginu sem var birt eftir að ÍA gerði 4:4 jafntefli gegn Keflavík í lokaumferð Bestu deildar karla 2026. 

ÍA endaði í 4. sæti deildarinnar sem er besti árangur liðsins frá árinu 2007 þegar liðið endaði í 3. sæti. 

Lárus Orri tók við liðinu um mitt síðasta ár og náði liðið að halda sæti sínu í deild þeirra bestu eftir mikla fallbaráttu á lokakafla Íslandsmótsins. Hann gerði tveggja ára samning við ÍA um þjálfun liðsins í lok október í fyrra og átti samningurinn að renna út í lok keppnistímabilsins 2027. 

Lárus Orri ólst upp á Akranesi og lék með yngri flokkum ÍA við góðan orðstír allt þar til hann flutti til Akureyrar á unglingsaldri. Þar lék hann með meistaraflokki Þórs í nokkur ár.

Hann átti magnaðan atvinnumannaferil í Englandi sem spannaði 10 ár þar sem hann lék með Stoke og WBA, bæði í Championship deildinni og Ensku úrvalsdeildinni.

Hann á að baki 42 A landsleiki og spilaði auk þess með öllum yngri landsliðum Íslands.

Lárus Orri á farsælan 10 ára feril að baki í þjálfun meistaraflokka Þórs á Akureyri og KF.

Tilkynning ÍA er hér fyrir neðan: 

Skagamenn héldu sigurgöngu sinni áfram í 1. deild Íslandsmótsins í körfuknattleik karla í kvöld með 104:94 sigri gegn Þór frá Þorlákshöfn. Leikurinn fór fram í Þorlákshöfn en bæði liðin voru taplaus eftir fyrstu þrjár umferðirnar. 

Með sigrinum er ÍA áfram á toppi deildarinnar ásamt liði Hauka úr Hafnarfirði en bæði liðin hafa unnið alla fjóra leiki sína fram til þessa. 

Sigurinn var afar mikilvægur fyrir ÍA – sérstaklega í ljósi þess að liðin eiga án efa eftir að berjast um efsta sæti deildarinnar ásamt liði Hauka. Það lið sem er efst eftir að deildarkeppninni lýkur tryggir sér sæti í Bónus deildinni á næsta tímabili en liðin þar fyrir neðan leika í úrslitakeppni um eitt laust sæti til viðbótar í efstu deild. 

Bandaríkjamaðurinn Marcus Tsohonis sýndi hvað í honum býr í þessum leik – en hann skoraði 18 stig og tók 14 fráköst. 

Gojko Sudzum var stigahæstur með 23 stig, 4 fráköst og 6 stoðsendingar. 

Leikstjórnandinn efnilegi Sölvi Ólason var enn og aftur í stóru hlutverki hjá ÍA – og var stigahæstur með 25 stig, 4 fráköst og 8 stoðsendingar. 

Framherjinn Þórarinn Gunnar Óskarsson, sem kom til ÍA í haust líkt og Sölvi, átti sinn besta leik til þessa fyrir ÍA. Hann skoraði 18 stig, tók 7 fráköst og skotnýting hans fer í sögubækurnar – 100% nýting. 

Aðstoðarþjálfarinn Igor Maric lék í 30 mínútur sem er það mesta sem hann hefur leikið á þessu tímabili – og hinn þaulreynda skytta skoraði 10 stig og tók 7 fráköst. 

Næsti leikur ÍA er á heimavelli þann 27. okt. n.k. gegn liði KFG sem er í fjórða sæti deildarinnar. KFG er í samstarfi við Stjörnuna úr Garðabæ og er liðið vel mannað leikmönnum sem eiga flestir rætur að rekja í Stjörnuna. 

Smelltu hér ef þú vilt styrkja Skagafréttir

Tónlistarhátíðin HEIMA-SKAGA fékk í dag menningarverðlaun Akraneskaupstaðar árið 2026 fyrir framúrskarandi framlag til menningarlífs bæjarins.

Þetta kemur í tilkynningu frá Akraneskaupstað. 

Þar kemur eftirfarandi m.a. fram: 

„Frá því hátíðin var fyrst haldin árið 2019 hefur HEIMA-SKAGI fest sig í sessi sem einn af eftirtektarverðustu tónlistarviðburðum bæjarins. Hátíðin hefur vaxið jafnt og þétt og orðið ómissandi hluti af Vökudögum, þar sem hún laðar að sér tónlistaráhugafólk nær og fjær og auðgar menningar- og mannlíf bæjarins.

Á bak við hátíðina stendur Ólafur Páll Gunnarsson, sem hefur af eldmóði, metnaði og ástríðu fyrir tónlist leitt verkefnið frá upphafi. Með skýrri sýn og óþreytandi vinnu hefur honum tekist að skapa vettvang þar sem fjölbreytt tónlist fær að njóta sín og þar sem áhorfendur upplifa tónlist í einstakri nálægð við flytjendur. Undir hans stjórn hefur HEIMA-SKAGI þróast í rótgróinn og virtan viðburð sem hefur styrkt menningarlíf á Akranesi ár eftir ár.“

Nánar á akranes,is.

Eftirtaldir hafa fengið Menningarverðlaun Akraneskaupstaðar: 

2025: Ægisbraut Records
2024: ÍATV
2023: Ice Docs
2022: Kellingar
2121: Flosi Einarsson, Gunnar Sturla Hervarsson og Einar Viðarsson
2020: Árbók Akurnesinga
2019: Útvarp Akranes
2018 Ásmundur Ólafsson
2017: Guðbjörg Árnadóttir
2016: Club 71
2015: Vitinn, félag áhugaljósmyndara á Akranesi
2014: Heiðrún Hámundardóttir tónmenntakennari
2013: Guðmundur Sigurðsson hagleiks- og hugsjónamaður
2012: Vinir hallarinnar fyrir menningar- og listalíf
2011: Lárus Sighvatsson fyrir starf sitt sem skólastjóri Tónlistarskólans
2010: Flosi Einarsson tónlistarmaður
2009: Þjóðlagasveit Tónlistarskóla Akraness
2008: Bókaútgáfan Uppheimar
2007: Haraldur Sturlaugsson og Ingibjörg Pálmadóttir vegna Haraldarhúss

Smelltu hér ef þú vilt styrkja Skagafréttir

Skagamaðurinn Guðjón Sigurðsson náði frábærum árangri í Bakgarðshlaupinu sem lauk í dag. Hér fyrir neðan er hægt að hlusta á viðtal við Guðjón þegar hann lauk keppni fyrr í dag.  

Guðjón hljóp 455 kílómetra eða 68 hringi – sem er besti árangur sem hann hefur náð. Guðjón bætti fyrri árangur sinn um 20 hringi eða um 134 km. 

Til samanburðar þá er vegalengdin sem Guðjón hljóp nálægt vegalengdinni frá Akranesi á Höfn í Hornafirði eða á Grímsstaði á Fjöllum. 

Gunnar Lárus Karlsson kláraði 69 hringi og tryggði sér Íslandsmeistaratitilinn – og keppnisrétt á HM einstaklinga. 

Bakgarðshlaupið var hluti af Heimsmeistaramóti landsliða í bakgarðshlaupum 2026. Alls tóku 60 þjóðir þátt en árið 2022 tóku 38 þjóðir þátt. Hver þjóð keppti á sínum heimavelli og hófst keppnin á sama tíma á öllum 60 stöðunum.

Keppnin stóð yfir í tæpa þrjá sólarhringa. Keppendur fá 60 mínútur til þess að ljúka við 6,7 km. hring. Keppendur eru ræstir út á heila tímanum og ef þeir ná ekki að ljúka hringnum á 60 mín. eru þeir úr leik. Það er því keppikefli keppenda að ljúka hringnum á sem stystum tíma til þess að fá hvíld fyrir næstu törn. 

Keppnisstaðurinn á Íslandi var í Elliðaárdal og hófst hringurinn við Elliðaárstöð Orkuveitu Reykjavíkur.

Karlalið ÍA í knattspyrnu heldur áfram að gera góða hluti í Bestu deildinni, efstu deild Íslandsmótsins. 

Í gær landaði ÍA 4:2 sigri á útivelli gegn Fram. 

Fram komst yfir snemma leiks en Framarinn Freyr Sigurðsson fékk rautt spjald á 12. mínútu. 

Varnarmaðurinn í liði ÍA, Baldvin Þór Berndsen, skoraði tvívegis áður en Kristófer Konráðsson jafnaði metin fyrir Fram með sínu öðru marki í leiknum. 

Rafael Máni Þorsteinsson og Viktor Jónsson bættu við mörkum fyrir ÍA í uppbótartíma. 

Mörkin og rauða spjaldið má sjá hér fyrir neðan frá vef Vísis. 

Skagamenn eru í 4. sæti deildarinnar með 37 þegar ein umferð er eftir. ÍA tekur á móti liði Keflavíkur í lokaumferðinn á Akranesvelli laugardaginn 24. október kl. 14:00. Norski varnarmaðurinn Erik Tobias Sandberg verður í leikbanni í þeim leik – og Svíinn Johannes Vall mun leika sinn síðasta leik fyrir ÍA en hann hefur leikið með ÍA frá árinu 2022. 

Viktor Jónsson og Markús Páll Ellertsson eru með 14 mörk hvor um sig og deila þeir öðru sætinu á markakóngslistanum á þessu tímabili.

KR-ingurinn Aron Sigurðarson er markahæstur með 21 mark. 

Ágústa Rósa Andrésdóttir er nýr forstöðumaður íþróttamannvirkja á Akranesi.

Ágústa Rósa er frá Akranesi og hefur m.a. verið formaður karatefélags Akraness, setið í stjórn badmintfélags Akraness og í framkvæmdastjórn Íþróttabandalags Akraness. Ágústa hefur starfað sem æskulýðsfulltrúi í Hvalfjarðarsveit, og nú síðast sem  Forstöðumaður Frístundasels Lágafellsskóla í Mosfellsbæ.

Bæjarstjórn Akraness samþykkti ráðningu Ágústu á síðasta bæjarstjórnarfundi. Alls sóttu 17 manns um starfið. Hörður Kári Jóhannesson hefur verið forstöðumaður íþróttamannvirkja á Akranes og var honum þökkuð góð störf á bæjarstjórnarfundinu.

Ágústa er fædd árið 1971 og hún er gift Herði Svavarssyni rafvirkja og þau eiga þrjú börn, Andrés Má,  Aðalheiði Rósu og
Ólaf Elías.

Ágústa Rósa Andrésdóttir.

 

Eftirtaldir sóttu um starfið:

Ágústa Rósa Andrésdóttir
Baldvin Bjarki Baldvinsson
Daisy Heimisdóttir
Ellert Baldur Magnússon
Eyrún Ída Guðjónsdóttir
Finnbogi Rafn Gudmundsson
Guðbjartur Máni Gíslason
Helena Rúnarsdóttir
Helgi Magnússon
Indriði Jósafatsson
Ingimar Elí Hlynsson
Magnús Gísli Sveinsson
Óli Þór Júlíusson
Pétur V. Georgsson
Ragnheiður Smáradóttir
Sturlaugur Sturlaugsson
Valdimar Leó Friðriksson

Eva Björg Ægis­dóttir frá Akranesi fékk í dag afhent spennu­sagna­verð­launin Svart­fuglinn fyrir bókina Marrið í stiganum.

Eliza Reid, forsetafrú, af­henti verðlaunin.

 

Yrsa Sigurðar­dóttir og Ragnar Jónas­son eru hug­mynda­fræðingarnir að baki verð­laununum sem ætluð eru höfundum sem ekki hafa áður sent frá sér glæpa­sögu. Þetta kemur fram í Fréttablaðinu í dag.

Eva er eins og áður segir frá Akranesi en foreldrar hennar eru Ægir Jóhannsson og Sigríður Björk Kristinsdóttir.


Í áliti dómnefndar um bókina segir meðal annars: „Sagan er grípandi og spennandi samhliða því að veita innsýn í myrkan og sáran veruleika. Fléttan er fagmannlega unnin, söguþráðurinn sterkur og sögulokin koma lesandanum á óvart.“

Verðlaunin nema 500.000 krónum auk hefðbundinna höfundarlauna. Sigurvegaranum býðst einnig samningur við umboðsmanninn David H. Headley en tímaritið Bookseller útnefndi hann sem einn af 100 áhrifamestu mönnum breskrar bókaútgáfu árið 2015.

Eva er með MSc gráðu í alþjóðamálum frá Tækniháskólanum í Þrándheimi og BA gráðu í félagsfræði frá Háskóla Íslands. Hún starfar hjá fyrirtækinu Maskína en hún hefur einnig starfað á þróunarsviði VÍS tryggingafélags, verið aðstoðamaður við viðskiptafræðideild Háskóla Íslands og sem starfsmaður á alþjóðasviði hjá utanríkisráðuneytinu í Noregi. Þá hefur hún starfað sem fyrsta flugfreyja hjá flugfélaginu Wow Air.

Ungir og efnilegir leikarar með sterka tengingu á Akranes leika stórt hlutverk í nýrri kvikmynd sem frumsýnd verður þann 23. mars 2018. Myndin heitir Víti í Vestmannaeyjum og er fjölskyldumynd með vísun í sannsögulega atburði. Viktor Benóný Benediktsson, 12 ára, og Theodór Ingi Óskarsson, 11 ára, fengu að upplifa það að leika í þessari mynd og skagafrettir.is fékk þá félaga til þess að segja aðeins frá þeirra upplifun. Stiklu úr myndinni má sjá hér neðst í fréttinni.

Myndin verður að sjálfsögðu sýnd í Bíóhöllinni á Akranesi, laugardaginn 24.  mars og sunnudaginn 25. mars.

Viktor og Theodór ætla sér að lesa meira en þeir hafa gert áður og leiklistinn hefur svo sannarlega fangað athygli þeirra.

Theodór og Viktor

Nafn: Viktor Benóný Benediktsson.

Aldur: 12 ára.
Skóli: Breiðagerðisskóli.
Bekkur: 7 bekkur.
Besti maturinn: Hamborgarahryggur og Sushi.
Besti drykkurinn: Vatn.
Besta lagið/tónlistin. Michael Jackson – Beat It.
Á hvað ertu að horfa þessa dagana? (sjónvarpsþættir)
Stranger things 2 og Friends.

 

Ættartréð:
Benedikt Steinar Benónýsson er pabbi minn og Íris Dögg H Marteinsdóttir er stjúpmamma mín, og systkini mín eru þau Tindur Marinó (5 ára) og Hafrún Embla (11 ára).
Auður Valdís Grétarsdóttir er mamma mín og stjúppabbi minn er Guðmundur Ingiberg Arnarsson, og systkini mín eru Elmar Benvý (4 ára) og Arnar Levý (6 ára). Og ekki má gleyma ömmu minni sem heitir Hulda Jónína Jónsdóttir

Theodór ásamt systkinum sínum.


Hvernig kom það til að þú fékkst hlutverk í myndinni?
„Ég mætti í nokkrar prufur fyrir myndina, mamma sá auglýsingu fyrir prufurnar á Facebook.“

Hefur þú leikið áður í kvikmynd?
„Já, en oftast bara í aukahlutverkum og í þáttum. T.d. Fyrir framan annað fólk og Loforði.“

Hefur þú áhuga á leiklist?
„Já mjög mikinn áhuga, ég ætlaði að verða lögga þegar ég yrði stór. En svo kynntist ég kvikmyndaheiminum og fann að þetta var ætlað mér.“

Ertu að æfa fótbolta og með hvaða liði þá?
„Nei, ég æfði fótbolta en er í pásu. Æfi í dag Handbolta með Víkingi og er markmaður.“


Framtíðardraumar þínir, hverjir eru þeir?
„Að það komi stjarna með nafninu mínu á Hollywood Boulevard.“

Hvað er það eftirminnilegasta sem gerðist við tökurnar á myndinni?
„Þegar var fyrsti tökudagurinn í Eyjum og það var brjálað veður.“

Hvert er vandræðalegasta atvikið sem gerðist við tökurnar á myndinni?
„Þegar ég fékk hiksta í miðri töku.“

Hvaða áhugamál hefur þú fyrir utan leiklist og fótbolta?
„Vinir mínir og snjóbretti.“

Lestu mikið, bækur og slíkt?
„Nei, en ég er að bæta mig í því.“

Hefur þú lesið aðrar bækur sem eru eftir höfundinn á Víti í Vestmannaeyjum?
„Já, Amma er Best (mæli með henni ;).“

Langar þig að taka þátt í fleiri slíkum kvikmyndaverkefnum?
„Auðvitað, ef þið viljið fá mig í verkefni hringið þá í mig.“

ÍA og Akranes, hvernig er tengingin þín?
„Ég fæddist á Akranesi og kom reglulega til pabba á Akranes. Ég var líka mikið í sveitinni hjá ömmu og afa. Ég var mjög ungur þegar ég átti heima á Akranesi en man mjög vel eftir því þegar eg fór á Langasand hjá Fríðu frænku og man líka þegar ég fór í Jaðarsbakkalaug með afa það var mjög skemmtilegt.“

Nafn: Theodór Ingi Óskarsson.

Aldur: 11 ára.
Skóli: Norðlingaskóli.
Bekkur: 6. bekkur.
Besti maturinn: Fajitas.
Besti drykkurinn: Vit-Hit og Sparkling ICE.
Besta lagið/tónlistin: Perfect með Ed Sheeran.
Á hvað ertu að horfa þessa dagana? (sjónvarpsþættir): Horfi lítið á sjónvarpsþætti en stundum á bíómyndir. Horfði síðast á Home Alone.

 

Ættartréð: Foreldrar mínir eru Óskar Örn Guðbrandsson og Áslaug Ósk Hinriksdóttir. Systkini mín eru Þuríður Arna (15 ára), Oddný Erla (13 ára), Hinrik Örn (9 ára) og Jóhanna Ósk (4 ára).


Hvernig kom það til að þú fékkst hlutverk í myndinni?
„Ég fór í prufur sem voru auglýstar og var svo valinn eftir þær.“

Hefur þú leikið áður í kvikmynd?
„Nei“.

Hefur þú áhuga á leiklist?
„Já og mig langar að leika meira.“

Ertu að æfa fótbolta og með hvaða liði þá?
„Já ég er að æfa með 5. flokki í Fylki.“

Framtíðardraumar þínir, hverjir eru þeir?
„Mig langar að vera fótboltamaður og leikari.“

Hvað er það eftirminnilegasta sem gerðist við tökurnar á myndinni?
„Þegar við vorum útá sjó og loftnet á bátnum rakst upp í kletta og datt af. Þá varð ég soldið hræddur.“

Hvert er vandræðalegasta atvikið sem gerðist við tökurnar á myndinni?
„Í sömu bátsferð átti ég að fara með langan texta en gleymdi honum alveg.“

Hvaða áhugamál hefur þú fyrir utan leiklist og fótbolta?
„Ég er líka að æfa badminton í TBR. Ég fylgist líka mjög vel með enska boltanum.“

Lestu mikið, bækur og slíkt?
„Nei ég er ekki mjög duglegur að lesa.“

Hefur þú lesið aðrar bækur sem eru eftir höfundinn á Víti í Vestmannaeyjum?
„Já ég hef lesið þær allar og þær eru mjög skemmtilegar. Hef líka lesið bækur eftir Þorgrím Þráinsson.“

Langar þig að taka þátt í fleiri slíkum kvikmyndaverkefnum?
„Já það væri gaman. Hef leikið smá eftir sumarið.“

ÍA og Akranes, hvernig er tengingin þín?
„Pabbi minn er frá Akranesi og amma og afi og systur pabba búa þar í dag ásamt fjölskyldum sínum.“

Myndin Víti í Vestmannaeyjum er byggð á fyrstu bókinni í vinsælum barnabókaflokki eftir Gunnar Helgason. Ár hvert er haldið stórt fótboltamót fyrir krakka í Vestmannaeyjum og þetta ár mætir hinn tíu ára Jón Jónsson til þess að keppa með Fálkum. En þegar hann kynnist Ívari, strák úr ÍBV sem á bágt heima fyrir, þarf Jón að vaxa hraðar úr grasi en hann óraði fyrir, bæði innan og utan vallar.

Bragi Þór Hinriksson leikstýrir en handrit skrifa Jóhann Ævar Grímsson, Gunnar Helgason og Ottó Geir Borg. Sagafilm framleiðir

Skagafrettir.is hefur frá upphafi verið opinn fréttavefur og markmiðið er að halda áfram á þeirri vegferð.

Áhugi á efninu er til staðar. Mörg þúsund heimsóknir á hverjum degi á skagafrettir.is staðfestir að lesendur hafa áhuga á jákvæðum fréttum úr nærsamfélaginu.

Þú kæri lesandi getur tekið þátt í að efla fréttavefinn skagafrettir.is með þínu framlagi. Slíkur stuðningur er afar mikilvægur fyrir bæjarfréttamiðla.

Það er hart sótt að bæjar - og staðarfréttamiðlum á Íslandi - og slíkir miðlar eru í raunverulegri útrýmingarhættu.

Skagafréttir fóru í loftið í nóvember 2016 og frá þeim tíma hafa vel á fjórða þúsund fréttir verið skrifaðar á skagafrettir.is.

Skagafréttir ehf.
552-26-11875
440219-0550

Frjáls framlög frá lesendum eru styrkasta stoðin í rekstri Skagafrétta. Slíkur stuðningur er afar mikilvægur og hvatning til að halda áfram að miðla því öllu því jákvæða sem er í gangi á Akranesi og hjá Skagamönnum nær og fjær.

Frjáls framlög gefa jákvæða strauma og kraftmeiri fréttaflutning.

Skagafréttir ehf.
552-26-11875
440219-0550

Kærar þakkir fyrir allar heimsóknirnar á skagafrettir.is og stuðninginn.

Skagafréttir ehf.
552-26-11875
440219-0550

http://localhost:8888/skagafrettir/2021/03/18/baejarmidlarnir-eru-i-raunverulegri-utrymingarhaettu/

Guli liturinn hefur verið einkennismerki ÍA í langan tíma en Íþróttabandalag Akraness var stofnað árið 1946.

En hvers vegna var guli liturinn fyrir valinu?, og kemur Dortmund í Þýskalandi við sögu í valinu á litnum?

Skagafréttir leituðu að sjálfsögðu í sagnabrunninn Jón Gunnlaugsson til þess að fá úr þessu skorið. Jón var leiftursnöggur að svara þegar hann var inntur eftir því hvort hann vissi eitthvað um valið á gula litnum.

„Söguna má rekja til ársins 1950 þegar Karl Guðmundsson, fyrirliði íslenska landsliðsins og leikmaður Fram, var í námi í íþróttafræðum í Köln í Þýskalandi,“ segir Jón en Karl hafði þjálfað lið ÍA árið 1948 samhliða því að hann lék með Fram.

„Þessi tenging Karls við ÍA varð til þess að Guðmundur Sveinbjörnsson þáverandi formaður ÍA hafði samband við Karl í Þýskalandi. Guðmundur óskaði eftir aðstoð við að útvega búninga fyrir ÍA. Áður en þessi búningur kom þá lék liðið í hvítum skyrtum og bláum buxum. Á þessum árum mættu leikmenn til leiks í hvítu spariskyrtunum sínum.“

 

Guðmundur hafði þá ósk að fá búninga sem skáru sig frá þeim litum sem voru notaðir af knattspyrnuliðunum í Reykjavík. Rauði liturinn var Valsbúningurinn, sá blái hjá Fram, og KR var með hvítar og svartar rendur á búningunum.

„Karl keypti búninga eins og óskað var eftir. Hann valdi gulan og svartan búning og þannig var liturinn ákveðinn,“ segir Jón.

Skagamenn klæddust þessum búningi fyrst vorið 1951 og þá var komið nýtt merki og urðu Íslandsmeistarar, fyrstir liða utan Reykjavíkur. Á sama tíma og nýji búningurinn kom var merki félagsins líka breytt í það sem enn er notað í dag.

Auglýsing

Auglýsing

„Það er hægt að nota ýsu eða þorsk í réttinn sem nýtur vinsælda á okkar heimili. Þetta er einfaldur réttur og sósan gerir fiskréttinn að sælkerarétti,“ segir Ástþór Vilmar Jóhannsson sem tók áskorun frá Sævari Frey Þráinssyni bæjarstjóra fagnandi. Bæjarstjóri Akraness reið á vaðið í nýjum fréttaflokki á skagafrettir.is. með uppskrift að áhugaverðum kjúklingarétti.

Markmiðið með þessum fréttaflokki er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.

Fiskur hefur verið mikilvæg fæða á Íslandi frá upphafi byggðar og fáar þjóðir borða jafnmikinn fisk og við Íslendingar. Neysla Íslendinga á fiski hefur samt sem áður minnkað á undanförnum árum. Ástþór Vilmar Jóhannsson vill stuðla að breytingum á því sviði með þessari frábæru uppskrift af steiktum fiski með súrsætri sósu.

Fiskur er ákjósanleg fæða fyrir margra hluta sakir. Má þar nefna að í fiski er gæðaprótein, neysla á fiski getur dregið úr offitu, fiskur er næringarrík fæða og tvímælalaust ein sú hollasta matvara sem völ er á. Fisk ættum við ekki að borða sjaldnar en 3 sinnum í viku.

Ástþór Vilmar skorar á Ingu Dóru Jóhannsdóttur, systur sína, að taka við keflinu og koma með næstu uppskrift áður en langt um líður.

Pönnusteikt ýsa/þorskur með súrsætri sósu

Hráefni:

600 gr. Ýsa eða þorskur
Hveiti
1-2 egg
Salt
Pipar
Matarolía eða smjör til steikingar

Sósa:

½ l vatn
100gr.sykur
9 msk vínedik
1 msk tómatkraftur
3 msk sojasósa
Maizena-sósu jafnari
100gr sveppir
1 græn paprika
1 rauð paprika
100 gr Laukur
100 gr blaðlaukur
100 gr ananasbitar

  1. Skerið fiskinn í bita og setjið til hliðar
  2. Setjið vatn,sykur,edik,tómatkraft og soyasósu í pott. Hleypið upp suðu og þykkið með maizena-sósujafnara.
  3. Skerið sveppi,lauk,blaðlauk í sneiðar og papriku í strimla(ekki of fínt)
  4. Brúnið sveppi,lauk, blaðlauk,papriku,og ananasbita í matarolíu og bætið út í sósuna. Sósan þarf ekki að sjóða mikið.
  5. Hrærið eggin saman og kryddið hveitið með salti og pipar. Veltið fiskinum fyrst upp úr hveitinu og síðan egginu.
  6. Steikið fiskinn í olíu eða smjöri og rétturinn er tilbúinn.

Meðlæti:

Berið réttinn fram með hrísgrjónum eða kartöflum.
Þessi sósa er einnig sérlega ljúffeng með steiktu kjöti.

http://localhost:8888/skagafrettir/2020/09/04/kjuklinga-pad-krapow-er-vinsaell-rettur-a-heimili-saevars-freys/

Bæjarstjóri Akraness ríður á vaðið í nýjum fréttaflokki á skagafrettir.is. Markmiðið er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.

„Þetta er mjög vinsæll réttur á heimilinu en ég fletti upp uppskrift að honum sumarið 2018 þegar fótboltastrákunum var bjargað úr hellinum í Taílandi. Í einni fréttinni kem fram að Pad Krapow með kjúklingi var það fyrsta sem þeir báðu um að borða og ákvað ég að elda þennan rétt þeim til heiðurs daginn sem þeim var bjargað. Þessi réttur með salati dugar auðveldlega fyrir fjóra,“ segir Sævar Freyr Þráinsson.

Sævar Freyr skorar á Ástþór Vilmar Jóhannsson að taka við keflinu og koma með næstu uppskrift en verkefnið er hluti af „Heilsueflandi Samfélagi“ á Akranesi.

Kjúklinga Pad krapow

Hráefni (mæli með að gera hráefni tilbúið fyrirfram því það tekur bara um 12-15 mín að elda):

3 til 4 msk olía

3 chilli fræ hreinsuð og skorin í sneiðar (ég skar smátt. (hef fræin af einu chilli með til að hafa hann bragð sterkari)

3 skallottulaukar, skornir í þunnar sneiðar (ég skar smátt)

5 hvítlauksrif skorin í þunnar sneiðar

600-700 gr kjúklingalæri beinhreinsuð án skinns (set í matvinnsluvél og tæti kjúkling niður í hakk) Ekki henda kjúklingafitu hún bráðnar og gefur bragð)

1 msk sykur (pálma/kókossykur ef til)

3 msk soyasósa

1 1/2 msk fiskisósa

1/2 bolli kjúklingasoð (ég hitaði vatn í örbylgju og leysti upp 1/2 tening)

1 búnt Thai basil lauf (má sleppa og hefur ekki mikil áhrif á réttinn eða nota ferskt venjulegt. Thai basil er til í asísku búðunum í Rvk).

Leiðbeiningar:

Sjóðið hrísgrjón á meðan. Hæfilegur skammtur fyrir fjóra ættu að vera 3 bollar af grjónum. Þarf töluvert með þessum rétt.

Setja stóra pönnu á hæsta hita, bætið við olíu, chilli, skallottulauk og hvítlauk, og steikið í 1-2 mínútur þar til búið að mýkjast og jafnvel farið að brúnast lítillega í endum. Bætið við kjúklinga ”hakkinu” og steikið í um 5 mín þar til farið að brúnast lítillega. Tryggið að kjúklingurinn loði ekki saman og reynið að brjóta niður stærri bita.

Bætið við sykur, soyasósu, og fiskisósu. Steikið í aðra mínútu og jafnvel lengur þar til soð hefur að mestu horfið. Bætið þá út í kjúklingasoði og eldið áfram þar til mest af soðinu er horfið og farið að hjúpa kjúklinginn. Þetta á ekki að taka langan tíma 5-7 mín því pannan er á hæsta hita. Bætið við basil laufum og steikið í stutta stund þar til þau hafa visnað og blandast réttinum.

Berið fram með ríflegu magni af hrísgrjónum í skál þar sem hver og einn bætir ofan á réttinum og soyasósu að smekk hvers og eins.

Pad krapow með hrísgrjónum án salats stendur vel undir væntingum. Ef eldað er fyrir fleiri þá er auðvelt að tvöfalda allt í réttinum en gera þarf ráð fyrir lengri tíma í að sjóða niður vökva.

Asískt salat

70 gr jöklasalat skorið smátt.
70 gr rauðkál skorið í þunnar ræmur.
1/2 appelsínugul papríka (eða rauð eða gul) skorin í þunnar sneiðar.
50 gr gulrætur rifnar eða sneiddar þunnt.
1 vorlaukur skorin í þunnar sneiðar.
1 msk steinselja skorin smátt.
80 gr edamame baunir (fást frosnar belg hreinsaðar í flestum búðum nú orðið).
1 /2 tsk ferskt engifer saxað smátt.
1 hvítlauksrif saxað smátt.
1/2 msk soya sósa.
1 msk hlynsíróp (eða hunang).
1 msk hrísgrjóna edik (eða sítrónusafi).
1 msk extra virgin olívu olía.
1/2 msk ristuð sesam olía.
1 msk sesam fræ (má sleppa).

Leiðbeiningar:

Allt skorna hráefnið sett í skál og blandað vel saman. Fljótandi hráefnum blandað saman og svo sett út í salatskálina og öllu velt saman.

Kær kveðja, Sævar Freyr Þráinsson.

Séra Jónína Ólafsdóttir og Þóra Björg Sigurðardóttir eru nýkjörnir prestar við Garða- og Saurbæjarprestakall í Vesturlandsprófastsdæmi sem biskup Íslands auglýsti til umsóknar í desember s.l.

Kjörið fór fram mánudagskvöldið 17. febrúar s.l. á Akranesi.

Framvegis munu því þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.

Sr. Jónína Ólafsdóttir var kjörin í almennt preststarf en Þóra Björg Sigurðardóttir í preststarf með áherslur á barna- og æskulýðsstarf.

Alls bárust sjö umóknir um störfin en 17 manna kjörnefnd úr héraði valdi þær Jónínu og Þóru Björg úr hópi 4 umsækjenda eftir forval matsnefndar um hæfi umsækjenda sem skipuð var af Biskupi Íslands.

Þess má geta að tveir af sjö umsækendum drógu umsóknir sínar til baka.

Sr. Jónína Ólafsdóttir

Sr. Jónína Ólafsdóttir er fædd 14. ágúst 1984. Hún lauk prófi í guðfræði frá Háskóla Íslands 2017 og BA próf í íslensku með félagsfræði sem aukagrein frá Háskóla Íslands árið 2008.

Á liðnu ári lauk Jónína diplómanámi á meistarastigi í sálgæslu frá Endurmenntunarstofnun HÍ sem og 90 einingum af 120 til MA prófs í guðfræði.

Jónína hefur gengt ýmsum störfum innan kirkjunna frá árinu 2007 en hefur starfað sem settur prestur í Dalvíkurprestakalli frá 1 okt. 2019. Eiginmaður hennar er Eggert Þröstur Þórarinsson og eiga þau tvo syni.

Þóra Björg Sigurðardóttir

Þóra Björg Sigurðardóttir er fædd 25. janúar 1989. Hún lauk prófi í guðfræði frá Háskóla Íslands árið 2019 og BS próf í sálfræði frá Háskóla Íslands 2016. Þóra Björg hefur starfað sem ritari og æskulýðsfullrúi við Grafarvogskirkju frá árinu 2011 en komið að kristilegum störfum frá árinu 2008 m.a. á vegum KFUM&K í sumarbúðunum í Vatnaskógi og Ölver. Þess má geta að Þóra Björg hefur enn sem komið er ekki hlotið vígslu sem prestur. Eiginmaður hennar er Geirlaugur Ingi Sigurbjörnsson. Eiga þau tvö lítil börn og eru búsett á Akranesi.

Eins og áður segir munu þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.

Fyrir er séra Þráinn Haraldsson en hann var kjörin sem sóknarprestur á liðnu ári. Þetta er í fyrsta skiptið sem konur eru kjörnar til prestembæta í Garða – og Saurbæjarprestakalli. Eru því um mikil tímamót að ræða.

Einnig er mjög áberandi hve verðandi prestateymi eru ung að aldri en þau eru öll vel undir fertugu. Það er engu líkarar en að kjörnefnd Garða- og Saurbæjarprestakalls séu að leggja áherslu að yngja verulega upp í sóknarstarfinu á komandi árum.

Auglýsing

Það er ekkert leyndarmál að Skagamaðurinn Ólafur Þórðarson segir það sem hann meinar – og hann liggur ekki á skoðunum sínum. 

Ummæli Ólafs á ýmsum málum hafa verið til umfjöllunar í fréttamiðlum á landsvísu og vakið mikla athygli.

Á Þorrablóti Skagamanna lék Ólafur stórt hlutverk í skemmtiatriði 1978 árgangsins – og má sjá það hér fyrir neðan.

Ólafur Þórðarson er einn þekktasti knattspyrnumaður Skagamanna fyrr og síðar. Landsliðsmaður til margra ára og lykilmaður í hinu sigursæla liði ÍA sem mokaði inn titlum seint á síðustu öld.

Ólafur snéri sér að þjálfun eftir að ferlinum lauk og undir hans stjórn varð karlalið ÍA m.a. Íslandsmeistari árið 2001.

ÍA hefur ekki náð að landa Íslandsmeistaratitli í mfl. karla frá árinu 2001.

Auglýsing

Auglýsing

Auglýsing

Auglýsing

Auglýsing

Auglýsing

Í dag hófst formleg söfnun í minningarsjóð Arnars Dórs Hlynssonar. „Hjá okkur hjá Sansa verður þannig háttur á að í þessari pöntunarviku, sem stendur fram til miðnættis 10. janúar munu 750 kr. af hverjum matarpakka fara í minningarsjóð Arnars Dórs.

„Arnar Dór Hlynsson var topp náungi en ótrúlega óheppinn með veikindi. Hann kvartaði samt aldrei. Minningarsjóður Arnars Dórs er stofnaður af Sansa, Team ´79 og ÍA. Sjóðurinn mun í framtíðinni styðja við bakið á góðum málum sem tengjast uppáhaldsíþróttum Arnars Dórs,“ segir Þórður Már Gylfason eigandi Sansa við skagafrettir.is.

ÍA mun hafa umsjón með minningarsjóðnum og verður úthlutað úr sjóðnum einu sinni á ári.

„Arnar Dór vinur minn lést þann 14. september 2017, langt fyrir aldur fram. Á þeim tíma var ég að setja fyrirtækið á laggirnar og það gafst enginn tími til þess að gera það sem mig langaði að gera til að heiðra minningu hans. Með hjálp margra þá er þessi minningarsjóðurinn nú til. Árgangur 79 sem Arnar Dór tilheyrði á stóran þátt í þessu ásamt ÍA og foreldrum Arnars Dórs.

Niðurstaðan er sú að minningarsjóður Arnars Dórs mun styrkja þau aðildarfélög ÍA sem hann tengdist. Það eru golf, fótbolti og kraftlyftingar. Arnar Dór var mikill stuðningsmaður knattspyrnunnar, hann var á golfvellinum flesta daga og lyfti lóðum af krafti þess á milli.“

Fyrirtækið Sansa sem Þórður Már setti á laggirnar á Akranesi í fyrra sérhæfir sig í því að útbúa matarpakka fyrir einstaklinga og fjölskyldur. Óhætt er að segja að viðtökurnar hafi farið fram úr björtustu vonum Þórðar.

„Síðasta vika var sú besta frá upphafi, metvika, og ég vona að þessi vika verði ekki síðri til þess að efla minningarsjóð Arnars Dórs. Og að sjálfsögðu er einn af réttum vikunnar uppáhaldsfiskisúpa Arnars Dórs,“ bætti Þórður Már við.

Fyrir þá sem vilja leggja inn á minningarsjóð Arnars Dórs þá er þetta númerið á styrktarreikningnum:

552-14-350047

kt. 670169-2199