Þorrablót Skagamanna fór fram í gær í íþróttahúsinu við Vesturgötu.
Uppselt var á blótið og skemmtu gestir sér vel – eins og sjá má í þessari myndasyrpu frá Skagafrettir.is.
Frá árinu 2018 hafa skagafrettir.is tekið það verkefni að sér að skrá mannlífssöguna á Þorrablóti Skagamanna – og er þetta í sjöunda sinn sem slíkt myndasafn er varðveitt á myndavef Skagafrétta.
Ragnheiður Hjálmarsdóttir og Rögnvaldur Einarsson eru Skagafólk ársins 2025.
Kjörinu var lýst á Þorrablóti Skagamanna 2026.
Ragnheiður og Rögnvaldur hafa stýrt gangi mála í Félagi eldri borgara á Akranesi í mörg ár með frábærum árangri.
Valgarður Lyngdal Jónsson, forseti bæjarstjórnar Akraness, flutti frumsamið ljóð um Skagafólk ársins.
Ein eru hjón á Skipaskaga
skapa þar gleði alla daga,
vinsæl mjög í vinafjöld.
Barnalánið best þau eiga,
blíðu og gæfu njóta mega.
Þau við heiðrum hér í kvöld.
Hann er ávallt greiðagóður,
gæðamaður, vís og fróður,
Hún af þrótti og hlýju rík.
Sem leiðtogi af lífsins náðum
leiðir hún starf af sönnum dáðum.
Þau hjónin eru engum lík.
Í margra lífi þau mörkuðu sporin,
mættu á haustin og kvöddu á vorin,
alveg einstakir kennarar.
Þeirra starfa nú fá notið,
nytsemd hafa og gæfu hlotið,
Akraness eldri borgarar.
(Valgarður Lyngdal Jónsson)
Eftirtaldir hafa fengið þessa viðurkenningu:
2025: Ragnheiður Hjálmarsdóttir, Rögnvaldur Einarsson.
2024: Sveinbjörn Hlöðversson
2023: Jón Gunnlaugsson og Stefán Jónsson.
2022: Tinna Ósk Grímarsdóttir
2021: Starfsfólk leik – grunn – og framhaldsskóla og frístundastarfi.
2020: Heilbrigðisstarfsfólk HVE.
2019: Andrea Þ. Björnsdóttir.
2018: Bjarni Þór Bjarnason.
2017: Sigurður Elvar Þórólfsson.
2016: Dýrfinna Torfadóttir.
2015: Erna Guðnadóttir og Einar J. Ólafsson.
2014: Steinunn Sigurðardóttir.
2013: Ísólfur Haraldsson.
2012: Hilmar Sigvaldason.
2011: Haraldur Sturlaugsson.
2010: Þórður Guðnason.
Þorrablót Skagamanna fer fram í kvöld – 7. febrúar 2026 í íþróttahúsinu við Vesturgötu.
Blótið nýtur mikilla vinsælda og er í dag ein stærsta skemmtun hvers árs á Akranesi. Allur ágóði af blótinu rennur til íþrótta – og félagsstarfs á Akranes.
Skagafréttir verða að venju með myndavélina á lofti á blótinu.
Og eru gestir hvattir til þess að láta ljós sitt skína á hefðbundnum stað í anddyri íþróttahússins.
Þetta er í sjöunda sinn sem Skagafréttir skráir mannlífssöguna og geymir myndasafn frá þessum viðburði í hæstu gæðum á myndavef bæjarfréttamiðilsins á Akranesi.
Hér fyrir neðan eru myndasöfn fyrri ára á myndavef Skagafrétta.
ÍA og Fjölnir úr Reykjavík mætast í úrslitaleik VÍS- bikarkeppni Körfuknattleikssambands Íslands sunnudaginn 8. febrúar.
Um er að ræða úrslitaleik í 9. flokki – en leikmenn sem eru gjaldgengir í þann flokk eru í 9. bekk grunnskóla eða yngri.
Leikurinn fer fram í Smáranum í Kópavogi og hefst hann kl. 12:00. Í tilkynningu frá félaginu eru Skagamenn nær og fjær hvattir til þess að mæta og sýna stuðning.
Tölfræði leiksins verður aðgengileg hér:
Þetta er í fyrsta sinn í sögu Körfuknattleiksfélags Akraness þar sem að lið úr yngri flokkum félagsins leikur til úrslita í bikarkeppni KKÍ.
ÍA lagði Breiðablik í undanúrslitaleiknum, 59:51, sem fram fór á heimavelli ÍA – að viðstöddum um 200 áhorfendum.
Í átta liða úrslitum hafði ÍA betur gegn liði KR, 55:49.
*Meistaraflokks lið ÍA lék til úrslita í bikarkeppni KKÍ árið 1996 og er það í fyrsta og eina sinn sem ÍA hefur leikið til úrslita í bikarkeppni KKÍ í mfl. karla. Þar hafði lið Hauka betur.
Böðvar Böðvarsson er nýr leikmaður hjá Knattspyrnufélagi ÍA.
Hann kemur frá FH þar sem hann var m.a. Íslandsmeistari árið 2016 og 2017.
Samningur hans er til næstu tveggja ára. Þetta kemur fram í tilkynningu frá ÍA.
Böðvar er þrítugur og hefur mest leikið sem vinstri bakvörður. Hann var atvinnumaður á árunum 2016-2023 í Danmörku, Póllandi og lengst af í Svíþjóð.
Skagamenn hafa samið við þrjá reynslumikla leikmenn að undanförnu – sem allir hafa reynslu úr atvinnumennsku. Gísli Eyjólfsson og Guðmundur Þórarinsson komu nýverið til ÍA og nú bætist Böðvar í hópinn.
Orkuveita Reykjavíkur óskaði nýverið eftir borunarleyfi vegna hitastigsborana í landi Akraneskaupstaðar – en Skagafréttir fjölluðu um málið í byrjun janúar á þessu ári. Nánar hér:
Í dag var greint frá því á vef Akraneskaupstaðar að verkefnið fari í formlegt ferli, þar á meðal grenndarkynningu, og að því loknu gætu framkvæmdir hafist.
Á vef Veitna segir að tveir staðir á Akranesi séu taldir líklegastir til að finna heitt vatn, annars vegar við Skarðsbraut, nær Innesvegi, en hins vegar við Jaðarsbakka við bílastæðið við Langasand. Í fyrstu tilraun verður borað við Jaðarsbakka.
Veitur eru með skýra tímalínu fyrir borun á rannsóknarholu við Jaðarsbakka. Áætlun gerir ráð fyrir að borun taki sex vikur. Frágangi á svæðinu á að ljúka fyrir mánaðarmótin maí-júní. Veitur hafa ákveðið að ef tímaramminn fyrir undirbúning verður knappur þá verði borun frestað til hausts.
Á vef Veitna kemur eftirfarandi fram;
„Borholan verður staðsett við hlið bílastæðisins við Langasand þar sem stiginn og sturtan eru við sandinn. Bílastæðinu verður lokað á meðan unnið er, en aðkoma sjúkrabíla verður tryggð að íþróttasvæðinu og þyrlupallinum. Göngu- og hjólastígur meðfram sjónum verður opinn allan tímann og það sama á við um aðgengi að sandinum. Efri stíg verður lokað á meðan en hjáleið sett upp.
Til að setja upp borpall við bílastæðið þarf töluverðan undirbúning með greftri og stórum vinnuvélum. Áhersla er lögð á öryggi við vinnusvæðið, bæði vegfarenda og starfsfólks. Undirbúningur tekur um fjórar vikur og umfangið er töluvert enda þung tæki sem notuð eru.
Borinn sem notaður verður, er rafknúinn og er þar af leiðandi mun hljóðlátari en borar sem almennt hafa verið notaðir. Allra nánasta umhverfi mun þó heyra í bornum og Veitur gera það sem hægt er til að takmarka hljóðin sem berast.
Veitur telja nokkrar líkur á að heitt vatn finnist á þessum stað á Akranesi og í því magni að það sé góð viðbót við hitaveituna á Skaganum.“
Allir dagar í janúar voru snjólausir á Akranesi.
Slíkar veðuraðstæður í janúar eru óvenjulegar en slíkt hefur ekki gerst í áratugi. Þetta kemur fram í samantekt Einars Sveinbjörnssonar veðurfræðings á blika.is.
Síðast féll snjór í Reykjavík og nágrenni þann 16. desember s.l. og snjóföl var á þessu svæði þann 15. des. Frá þeim tíma hefur ekkert snjóað í Reykjavík og næsta nágrenni.
Samkvæmt gögnum Einars var janúar 1929 og 1940 alveg snjólausir líkt og á þessu ári. Einn alvítur dagur mældist í janúar 1961 og aftur 2002.
Einar telur það ólíklegt að það snjói á Reykjavíkursvæðinu næstu 7-10 daga.
Ingi Þór Sigurðsson og Ármann Ingi Finnbogason hafa skrifað undir samninga hjá nýjum liðum – en þeir hafa verið samningsbundnir Knattspyrnufélagi ÍA undanfari ár.
Ármann Ingi, sem er fæddur árið 20024, gekk í raðir Íslandsmeistaraliðs Víkings í Reykjavík, en kantmaðurinn hefur leikið sem lánsmaður hjá Grindvíkingum í Lengjudeildinni undanfarin tvö tímabil. Ármann gerði samning til fjögurra ára við lið Víkings. Á síðustu leiktíð skoraði Ármann Ingi fimm mörk í 18 leikjum fyrir Grindavík.
Ingi Þór, sem er einnig fæddur árið 2004. hefur samið við Grindavík en hann lék þar sem lánsmaður á síðustu leiktíð. Hann lék 21 leik með Grindavík í Lengjudeildinni í fyrra og hann skoraði 3 mörk.
Karlalið ÍA í körfuknattleik hefur gert breytingar á leikmannahóp sínum fyrir lokakafla Íslandsmótsins í Bónusdeildinni, efstu deild.
Króatinn Josip Barnjak hefur verið leystur undan samningi sínum en hann kom til liðsins s.l. haust. Barnjak skoraði 11 stig að meðaltali í 16 leikjum með ÍA, tók 5 fráköst og gaf 3 stoðsendingar.
Í hans stað kemur Ivan Gavrilovic frá Serbíu. Hann lék með liði Tindastóls í vetur en var sagt upp störfum nýverið. Gavrilovic er miðherji. Hann skoraði 17 stig að meðaltali fyrir Tindastóls og tók 6 fráköst að meðaltali á þeim 23 mínútum sem hann lék að meðaltali fyrir félagið.
Skagamenn hafa gert margar breytingar á tímabilinu.
Brasilíumaðurinn Victor Bafutto er mættur á Skagann á ný og leikur með körfuknattleiksliði ÍA í næstu leikjujm liðsins í Bónusdeildinni.
Victor, sem er 2.04 metrar á hæð, átti stóran þátt í því að ÍA sigraði í 1. deild karla á síðustu leiktíð – þar sem miðherjinn öflugi var á meðal frákasta – og stigahæstu leikmanna deildarinnar.
Skagaliðið hefur átt í vandræðum eftir að miðherjinn Gojko Zudzum meiddist á hné um miðjan desember s.l.
ÍA hefur tapað öllum leikjum sínum þar sem að Bosníu og Hersegovínu maðurinn, Zudsum, hefur verið fjarverandi.
Bandaríski leikmaðurinn Darryl Latrell Morsell kom til félagsins í byrjun janúar frá liði Keflavíkur – þar sem hann lék áður. Morsell er þriðju bandaríski leikmaðurinn hjá ÍA í vetur.
Dibaji Walker kom til ÍA í nóvember s.l. en hann hafði áður leikið með liði Ármanns en hann lék fjóra leiki með ÍA. Darnell Cowart hóf tímabilið með ÍA en hann var látinn fara eftir 5 umferðir.
Aðsend grein:
Þegar litið er yfir 80 ára sögu Íþróttabandalags Akraness blasir við einstök saga samheldni, íþróttaáhuga og samfélagslegrar uppbyggingar. Frá stofnun þess árið 1946 hefur ÍA verið meira en íþróttafélag – það hefur verið burðarás í bæjarlífinu, sameiningartákn og vettvangur fyrir óteljandi einstaklinga sem hafa fengið tækifæri til að þroskast og dafna.
Akranes hefur löngum verið einn af helstu íþróttabæjum Íslands. Hann hefur verið leiðandi afl á mörgum sviðum íþrótta á landsvísu og hefur áratugum saman alið af sér hæfileikaríkt íþróttafólk.
Upphafið – Sterk rót í samfélaginu
Íþróttabandalag Akraness varð til á miklum blómatíma íslenskra íþrótta. Lýðveldið var nýstofnað og mikil bjartsýni ríkti meðal þjóðarinnar, og þar á meðal á sviði íþrótta. Akranes fór ekki varhluta af þeirri bjartsýni. Strax frá stofnun voru markmið félagsins skýr: að efla íþróttastarf í bænum og skapa umgjörð fyrir fjölbreyttar íþróttagreinar.
ÍA var stofnað hinn 3. febrúar árið 1946, á uppgangstímum í íþróttamálum á Akranesi. Á árunum 1942 til 1945 urðu þáttaskil í sögu íþrótta á Akranesi þegar þrjú mikilvæg íþróttamannvirki risu í bænum. Leikfimihúsið við Vesturgötu var vígt árið 1942, Bjarnalaug tók til starfa árið 1944 og árið 1945 var íþróttahúsið við Laugarbraut formlega vígt. Öll voru þessi mannvirki reist af miklum metnaði og framtíðarsýn, þar sem samheldni bæjarbúa og sjálfboðavinna skipuðu lykilhlutverk. Þar munaði sérstaklega um framlag íþróttafélaga bæjarins, Knattspyrnufélagsins Kára og Knattspyrnufélags Akraness (KA). Vinna þeirra við mannvirkin var ómetanleg og endurspeglaði þann kraft og þá hugsjón sem bjó í íþróttahreyfingu bæjarins á þessum tíma.
Þegar íþróttahúsið við Laugarbraut var tekið í notkun þótti það eitt stærsta og glæsilegasta íþróttahús landsins. Húsið markaði algjör tímamót í aðstöðu til íþróttaiðkunar á Akranesi og opnaði nýja möguleika fyrir íþrótta- og félagsstarf, ekki síst fyrir börn og ungmenni.
Átta áratugum síðar tóku Skagamenn aftur stórt skref þegar nýtt íþróttahús á Jaðarsbökkum var tekið í notkun. Þar má með sanni segja að sagan endurtaki sig: mannvirki reist af metnaði og framtíðarsýn, sem eitt glæsilegasta íþróttahús landsins.
Íþróttabandalag Akraness
Sögu ÍA má rekja aftur til þriðja áratugar síðustu aldar þegar Kári og KA voru stofnuð. Þrátt fyrir mikinn metnað og harða keppni, sem stundum olli sundrung, sameinuðust félögin frá upphafi um lið þegar keppt var utan héraðs. Uppbygging íþróttamannvirkja á fjórða áratugnum hafði varanleg áhrif á íþróttalíf bæjarins og krafðist æ nánari samvinnu félaganna tveggja, ekki síst eftir að þau urðu sameiginlegir eigendur íþróttahússins við Laugarbraut árið 1945.
Fáir einstaklingar hafa haft jafn afgerandi áhrif á íþróttalíf Akraness og Guðmundur Sveinbjörnsson. Hann var í hópi þeirra ungu drengja sem stofnuðu Knattspyrnufélagið Kára árið 1922 og átti síðar eftir að verða einn helsti forystumaður íþróttamála í bænum. Guðmundur var formaður Íþróttaráðs Akraness (ÍRA) og síðar formaður ÍA á árunum 1951–1963 og aftur frá 1965 þar til hann lést árið 1970.
Í vígsluræðu sinni við opnun íþróttahússins við Laugarbraut lagði Guðmundur ríka áherslu á mikilvægi samstöðu og samstarfs:
„Að þessari byggingu standa tvö félög, sem bæði keppa að sama marki. Það er undir þeirri starfsemi komið hve vel tekst til með rekstur hússins, það er undir því komið hvort þau skilja að sameinaðir stöndum við en sundraðir föllum við.“
Orð hans féllu í frjóan jarðveg. Skömmu síðar var Íþróttabandalag Akraness stofnað á grundvelli íþróttalaga og æ síðan hafa Skagamenn staðið þétt saman um bandalagið sem burðarás íþróttastarfs í bænum.
Íþróttalíf Akraness hefur frá upphafi staðið á traustum grunni knattspyrnunnar, sem hefur verið iðkuð í bænum í um heila öld. Lengst af glímdu Skagamenn þó við skort á aðstöðu, ekki síst til íþrótta á borð við sund og fimleika, sem iðkaðar voru við frumstæðar aðstæður. Með tilkomu Bjarnalaugar og íþróttahúsanna tveggja á fjórða og fimmta áratugnum urðu þó tímamót.
Stofnun ÍA markaði upphaf nýs skeiðs þar sem íþróttastarf fór í fastari skorður og farið var af krafti að keppa í fjölbreyttum íþróttagreinum utan héraðs á næstu áratugum. Íþróttabandalag Akraness varð þannig sameiningartákn og drifkraftur þeirrar íþróttaarfleifðar sem Skagamenn hafa um áratugaskeið verið stoltir af.
ÍA í dag – lifandi arfleifð
Í dag stendur Íþróttabandalag Akraness sem eitt sterkasta íþróttaafl landsins, bæði í félagslegum, íþróttalegum og sögulegum skilningi. Félagið heldur áfram að þróast, byggja upp starfið, efla grasrótina og varðveita þá arfleifð sem kynslóðir Skagamanna hafa skilað áfram.
Samstarf ÍA og Akraneskaupstaðar er einstakt og mikið horft til þess víða um land.
Í hugum landsmanna eru ÍA og Akraneskaupstaður samnefnari fyrir öflugt samfélag, metnað og samheldni.
Samstarfið hefur gert Akranes að líflegu, heilbrigðu og stoltu samfélagi. Þetta er samstarf sem ekki aðeins þjónar íbúunum í dag, heldur mótar framtíðina fyrir ókomnar kynslóðirnar.
ÍA er eitt stærsta og fjölbreyttasta íþróttasamfélag landsins. Undir bandalagið heyra 19 aðildarfélög sem bjóða upp á skipulagt íþróttastarf í 22 greinum, auk þess að reka verkefnið Sprækir Skagamenn 60+. Um 3.000 einstaklingar stunda íþróttir hjá ÍA, óháð búsetu.
Meðal barna og ungmenna á Akranesi, 4–18 ára, eru um 80% skráð í íþróttastarf ÍA. Sérstaklega áberandi er þátttaka yngstu iðkendanna, þar sem um 95% barna á aldrinum 4–5 ára æfa hjá ÍA, sem er langt yfir landsmeðaltali. Þá eru um 10% íbúa Akraness félagar í Golfklúbbnum Leyni, og yfir 80 manns sækja reglulega æfingar í verkefninu Sprækir Skagamenn 60+. Félög innan ÍA hafa einnig innleitt áhugaæfingahópa fyrir þau sem ekki vilja keppa og einnig hefur umfang skipulagðs starfs fyrir börn með áskoranir aukist verulega.
Starfsemi ÍA er opin öllum og bandalagið hvetur til virkrar þátttöku íbúa, hvort sem er í starfi, stuðningi eða sjálfboðavinnu. Áhrifin ná langt út fyrir keppnisvöllinn og eru mikilvægur hluti af samfélagslegri umgjörð Akraness.
Íþróttaviðburðir skipa stóran sess í ferðaþjónustu bæjarins og gríðarlegur fjöldi gesta heimsækir Akranes árlega vegna móta og kappleikja. Þetta skilar bæði samfélagslegu og efnahagslegu virði fyrir bæinn.
Nú átta áratugum eftir stofnun bandalagsins, tengir guli liturinn kynslóðir Skagamanna saman. Hann minnir á fortíðina, lýsir upp samtímann og vísar veginn til framtíðar. Starf ÍA er ein af burðarstoðum samfélagsins á Akranesi: það styrkir heilsu, eflir félagsauð og mótar sjálfsmynd bæjarins.
Ég óska öllum Skagamönnum, stuðningsfólki, sjálfboðaliðum, iðkendum og starfsfólki ÍA, sem og allri íþróttahreyfingunni, innilega til hamingju með 80 ára afmæli Íþróttabandalags Akraness.
Áfram ÍA! 💛🖤
Heiðar Mar Björnsson, framkvæmdastjóri Íþróttabandalags Akraness.
*Sérstakar þakkir fyrir aðstoð og upplýsingaöflum fær Björn Þór Björnsson, sagnfræðingur
Ágústa Rósa Andrésdóttir er nýr forstöðumaður íþróttamannvirkja á Akranesi.
Ágústa Rósa er frá Akranesi og hefur m.a. verið formaður karatefélags Akraness, setið í stjórn badmintfélags Akraness og í framkvæmdastjórn Íþróttabandalags Akraness. Ágústa hefur starfað sem æskulýðsfulltrúi í Hvalfjarðarsveit, og nú síðast sem Forstöðumaður Frístundasels Lágafellsskóla í Mosfellsbæ.
Bæjarstjórn Akraness samþykkti ráðningu Ágústu á síðasta bæjarstjórnarfundi. Alls sóttu 17 manns um starfið. Hörður Kári Jóhannesson hefur verið forstöðumaður íþróttamannvirkja á Akranes og var honum þökkuð góð störf á bæjarstjórnarfundinu.
Ágústa er fædd árið 1971 og hún er gift Herði Svavarssyni rafvirkja og þau eiga þrjú börn, Andrés Má, Aðalheiði Rósu og
Ólaf Elías.
Eftirtaldir sóttu um starfið:
Ágústa Rósa Andrésdóttir
Baldvin Bjarki Baldvinsson
Daisy Heimisdóttir
Ellert Baldur Magnússon
Eyrún Ída Guðjónsdóttir
Finnbogi Rafn Gudmundsson
Guðbjartur Máni Gíslason
Helena Rúnarsdóttir
Helgi Magnússon
Indriði Jósafatsson
Ingimar Elí Hlynsson
Magnús Gísli Sveinsson
Óli Þór Júlíusson
Pétur V. Georgsson
Ragnheiður Smáradóttir
Sturlaugur Sturlaugsson
Valdimar Leó Friðriksson
Eva Björg Ægisdóttir frá Akranesi fékk í dag afhent spennusagnaverðlaunin Svartfuglinn fyrir bókina Marrið í stiganum.
Eliza Reid, forsetafrú, afhenti verðlaunin.
Yrsa Sigurðardóttir og Ragnar Jónasson eru hugmyndafræðingarnir að baki verðlaununum sem ætluð eru höfundum sem ekki hafa áður sent frá sér glæpasögu. Þetta kemur fram í Fréttablaðinu í dag.
Eva er eins og áður segir frá Akranesi en foreldrar hennar eru Ægir Jóhannsson og Sigríður Björk Kristinsdóttir.
Í áliti dómnefndar um bókina segir meðal annars: „Sagan er grípandi og spennandi samhliða því að veita innsýn í myrkan og sáran veruleika. Fléttan er fagmannlega unnin, söguþráðurinn sterkur og sögulokin koma lesandanum á óvart.“
Verðlaunin nema 500.000 krónum auk hefðbundinna höfundarlauna. Sigurvegaranum býðst einnig samningur við umboðsmanninn David H. Headley en tímaritið Bookseller útnefndi hann sem einn af 100 áhrifamestu mönnum breskrar bókaútgáfu árið 2015.
Eva er með MSc gráðu í alþjóðamálum frá Tækniháskólanum í Þrándheimi og BA gráðu í félagsfræði frá Háskóla Íslands. Hún starfar hjá fyrirtækinu Maskína en hún hefur einnig starfað á þróunarsviði VÍS tryggingafélags, verið aðstoðamaður við viðskiptafræðideild Háskóla Íslands og sem starfsmaður á alþjóðasviði hjá utanríkisráðuneytinu í Noregi. Þá hefur hún starfað sem fyrsta flugfreyja hjá flugfélaginu Wow Air.
Skagafrettir.is hefur frá upphafi verið opinn fréttavefur og markmiðið er að halda áfram á þeirri vegferð.
Áhugi á efninu er til staðar. Mörg þúsund heimsóknir á hverjum degi á skagafrettir.is staðfestir að lesendur hafa áhuga á jákvæðum fréttum úr nærsamfélaginu.
Þú kæri lesandi getur tekið þátt í að efla fréttavefinn skagafrettir.is með þínu framlagi. Slíkur stuðningur er afar mikilvægur fyrir bæjarfréttamiðla.
Það er hart sótt að bæjar - og staðarfréttamiðlum á Íslandi - og slíkir miðlar eru í raunverulegri útrýmingarhættu.
Skagafréttir fóru í loftið í nóvember 2016 og frá þeim tíma hafa vel á fjórða þúsund fréttir verið skrifaðar á skagafrettir.is.
Skagafréttir ehf.
552-26-11875
440219-0550
Frjáls framlög frá lesendum eru styrkasta stoðin í rekstri Skagafrétta. Slíkur stuðningur er afar mikilvægur og hvatning til að halda áfram að miðla því öllu því jákvæða sem er í gangi á Akranesi og hjá Skagamönnum nær og fjær.
Frjáls framlög gefa jákvæða strauma og kraftmeiri fréttaflutning.
Kærar þakkir fyrir allar heimsóknirnar á skagafrettir.is og stuðninginn.
Skagafréttir ehf.
552-26-11875
440219-0550
Ungir og efnilegir leikarar með sterka tengingu á Akranes leika stórt hlutverk í nýrri kvikmynd sem frumsýnd verður þann 23. mars 2018. Myndin heitir Víti í Vestmannaeyjum og er fjölskyldumynd með vísun í sannsögulega atburði. Viktor Benóný Benediktsson, 12 ára, og Theodór Ingi Óskarsson, 11 ára, fengu að upplifa það að leika í þessari mynd og skagafrettir.is fékk þá félaga til þess að segja aðeins frá þeirra upplifun. Stiklu úr myndinni má sjá hér neðst í fréttinni.
Myndin verður að sjálfsögðu sýnd í Bíóhöllinni á Akranesi, laugardaginn 24. mars og sunnudaginn 25. mars.
Viktor og Theodór ætla sér að lesa meira en þeir hafa gert áður og leiklistinn hefur svo sannarlega fangað athygli þeirra.
Theodór og Viktor
Nafn: Viktor Benóný Benediktsson.
Aldur: 12 ára.
Skóli: Breiðagerðisskóli.
Bekkur: 7 bekkur.
Besti maturinn: Hamborgarahryggur og Sushi.
Besti drykkurinn: Vatn.
Besta lagið/tónlistin. Michael Jackson – Beat It.
Á hvað ertu að horfa þessa dagana? (sjónvarpsþættir)
Stranger things 2 og Friends.
Ættartréð:
Benedikt Steinar Benónýsson er pabbi minn og Íris Dögg H Marteinsdóttir er stjúpmamma mín, og systkini mín eru þau Tindur Marinó (5 ára) og Hafrún Embla (11 ára).
Auður Valdís Grétarsdóttir er mamma mín og stjúppabbi minn er Guðmundur Ingiberg Arnarsson, og systkini mín eru Elmar Benvý (4 ára) og Arnar Levý (6 ára). Og ekki má gleyma ömmu minni sem heitir Hulda Jónína Jónsdóttir
Theodór ásamt systkinum sínum.
Hvernig kom það til að þú fékkst hlutverk í myndinni?
„Ég mætti í nokkrar prufur fyrir myndina, mamma sá auglýsingu fyrir prufurnar á Facebook.“
Hefur þú leikið áður í kvikmynd?
„Já, en oftast bara í aukahlutverkum og í þáttum. T.d. Fyrir framan annað fólk og Loforði.“
Hefur þú áhuga á leiklist?
„Já mjög mikinn áhuga, ég ætlaði að verða lögga þegar ég yrði stór. En svo kynntist ég kvikmyndaheiminum og fann að þetta var ætlað mér.“
Ertu að æfa fótbolta og með hvaða liði þá?
„Nei, ég æfði fótbolta en er í pásu. Æfi í dag Handbolta með Víkingi og er markmaður.“
Framtíðardraumar þínir, hverjir eru þeir?
„Að það komi stjarna með nafninu mínu á Hollywood Boulevard.“
Hvað er það eftirminnilegasta sem gerðist við tökurnar á myndinni?
„Þegar var fyrsti tökudagurinn í Eyjum og það var brjálað veður.“
Hvert er vandræðalegasta atvikið sem gerðist við tökurnar á myndinni?
„Þegar ég fékk hiksta í miðri töku.“
Hvaða áhugamál hefur þú fyrir utan leiklist og fótbolta?
„Vinir mínir og snjóbretti.“
Lestu mikið, bækur og slíkt?
„Nei, en ég er að bæta mig í því.“
Hefur þú lesið aðrar bækur sem eru eftir höfundinn á Víti í Vestmannaeyjum?
„Já, Amma er Best (mæli með henni ;).“
Langar þig að taka þátt í fleiri slíkum kvikmyndaverkefnum?
„Auðvitað, ef þið viljið fá mig í verkefni hringið þá í mig.“
ÍA og Akranes, hvernig er tengingin þín?
„Ég fæddist á Akranesi og kom reglulega til pabba á Akranes. Ég var líka mikið í sveitinni hjá ömmu og afa. Ég var mjög ungur þegar ég átti heima á Akranesi en man mjög vel eftir því þegar eg fór á Langasand hjá Fríðu frænku og man líka þegar ég fór í Jaðarsbakkalaug með afa það var mjög skemmtilegt.“
Nafn: Theodór Ingi Óskarsson.
Aldur: 11 ára.
Skóli: Norðlingaskóli.
Bekkur: 6. bekkur.
Besti maturinn: Fajitas.
Besti drykkurinn: Vit-Hit og Sparkling ICE.
Besta lagið/tónlistin: Perfect með Ed Sheeran.
Á hvað ertu að horfa þessa dagana? (sjónvarpsþættir): Horfi lítið á sjónvarpsþætti en stundum á bíómyndir. Horfði síðast á Home Alone.
Ættartréð: Foreldrar mínir eru Óskar Örn Guðbrandsson og Áslaug Ósk Hinriksdóttir. Systkini mín eru Þuríður Arna (15 ára), Oddný Erla (13 ára), Hinrik Örn (9 ára) og Jóhanna Ósk (4 ára).
Hvernig kom það til að þú fékkst hlutverk í myndinni?
„Ég fór í prufur sem voru auglýstar og var svo valinn eftir þær.“
Hefur þú leikið áður í kvikmynd?
„Nei“.
Hefur þú áhuga á leiklist?
„Já og mig langar að leika meira.“
Ertu að æfa fótbolta og með hvaða liði þá?
„Já ég er að æfa með 5. flokki í Fylki.“
Framtíðardraumar þínir, hverjir eru þeir?
„Mig langar að vera fótboltamaður og leikari.“
Hvað er það eftirminnilegasta sem gerðist við tökurnar á myndinni?
„Þegar við vorum útá sjó og loftnet á bátnum rakst upp í kletta og datt af. Þá varð ég soldið hræddur.“
Hvert er vandræðalegasta atvikið sem gerðist við tökurnar á myndinni?
„Í sömu bátsferð átti ég að fara með langan texta en gleymdi honum alveg.“
Hvaða áhugamál hefur þú fyrir utan leiklist og fótbolta?
„Ég er líka að æfa badminton í TBR. Ég fylgist líka mjög vel með enska boltanum.“
Lestu mikið, bækur og slíkt?
„Nei ég er ekki mjög duglegur að lesa.“
Hefur þú lesið aðrar bækur sem eru eftir höfundinn á Víti í Vestmannaeyjum?
„Já ég hef lesið þær allar og þær eru mjög skemmtilegar. Hef líka lesið bækur eftir Þorgrím Þráinsson.“
Langar þig að taka þátt í fleiri slíkum kvikmyndaverkefnum?
„Já það væri gaman. Hef leikið smá eftir sumarið.“
ÍA og Akranes, hvernig er tengingin þín?
„Pabbi minn er frá Akranesi og amma og afi og systur pabba búa þar í dag ásamt fjölskyldum sínum.“
Myndin Víti í Vestmannaeyjum er byggð á fyrstu bókinni í vinsælum barnabókaflokki eftir Gunnar Helgason. Ár hvert er haldið stórt fótboltamót fyrir krakka í Vestmannaeyjum og þetta ár mætir hinn tíu ára Jón Jónsson til þess að keppa með Fálkum. En þegar hann kynnist Ívari, strák úr ÍBV sem á bágt heima fyrir, þarf Jón að vaxa hraðar úr grasi en hann óraði fyrir, bæði innan og utan vallar.
Bragi Þór Hinriksson leikstýrir en handrit skrifa Jóhann Ævar Grímsson, Gunnar Helgason og Ottó Geir Borg. Sagafilm framleiðir
Guli liturinn hefur verið einkennismerki ÍA í langan tíma en Íþróttabandalag Akraness var stofnað árið 1946.
En hvers vegna var guli liturinn fyrir valinu?, og kemur Dortmund í Þýskalandi við sögu í valinu á litnum?
Skagafréttir leituðu að sjálfsögðu í sagnabrunninn Jón Gunnlaugsson til þess að fá úr þessu skorið. Jón var leiftursnöggur að svara þegar hann var inntur eftir því hvort hann vissi eitthvað um valið á gula litnum.
„Söguna má rekja til ársins 1950 þegar Karl Guðmundsson, fyrirliði íslenska landsliðsins og leikmaður Fram, var í námi í íþróttafræðum í Köln í Þýskalandi,“ segir Jón en Karl hafði þjálfað lið ÍA árið 1948 samhliða því að hann lék með Fram.
„Þessi tenging Karls við ÍA varð til þess að Guðmundur Sveinbjörnsson þáverandi formaður ÍA hafði samband við Karl í Þýskalandi. Guðmundur óskaði eftir aðstoð við að útvega búninga fyrir ÍA. Áður en þessi búningur kom þá lék liðið í hvítum skyrtum og bláum buxum. Á þessum árum mættu leikmenn til leiks í hvítu spariskyrtunum sínum.“
Guðmundur hafði þá ósk að fá búninga sem skáru sig frá þeim litum sem voru notaðir af knattspyrnuliðunum í Reykjavík. Rauði liturinn var Valsbúningurinn, sá blái hjá Fram, og KR var með hvítar og svartar rendur á búningunum.
„Karl keypti búninga eins og óskað var eftir. Hann valdi gulan og svartan búning og þannig var liturinn ákveðinn,“ segir Jón.
Skagamenn klæddust þessum búningi fyrst vorið 1951 og þá var komið nýtt merki og urðu Íslandsmeistarar, fyrstir liða utan Reykjavíkur. Á sama tíma og nýji búningurinn kom var merki félagsins líka breytt í það sem enn er notað í dag.
Auglýsing
Auglýsing
„Það er hægt að nota ýsu eða þorsk í réttinn sem nýtur vinsælda á okkar heimili. Þetta er einfaldur réttur og sósan gerir fiskréttinn að sælkerarétti,“ segir Ástþór Vilmar Jóhannsson sem tók áskorun frá Sævari Frey Þráinssyni bæjarstjóra fagnandi. Bæjarstjóri Akraness reið á vaðið í nýjum fréttaflokki á skagafrettir.is. með uppskrift að áhugaverðum kjúklingarétti.
Markmiðið með þessum fréttaflokki er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.
Fiskur hefur verið mikilvæg fæða á Íslandi frá upphafi byggðar og fáar þjóðir borða jafnmikinn fisk og við Íslendingar. Neysla Íslendinga á fiski hefur samt sem áður minnkað á undanförnum árum. Ástþór Vilmar Jóhannsson vill stuðla að breytingum á því sviði með þessari frábæru uppskrift af steiktum fiski með súrsætri sósu.
Fiskur er ákjósanleg fæða fyrir margra hluta sakir. Má þar nefna að í fiski er gæðaprótein, neysla á fiski getur dregið úr offitu, fiskur er næringarrík fæða og tvímælalaust ein sú hollasta matvara sem völ er á. Fisk ættum við ekki að borða sjaldnar en 3 sinnum í viku.
Ástþór Vilmar skorar á Ingu Dóru Jóhannsdóttur, systur sína, að taka við keflinu og koma með næstu uppskrift áður en langt um líður.
600 gr. Ýsa eða þorskur
Hveiti
1-2 egg
Salt
Pipar
Matarolía eða smjör til steikingar
½ l vatn
100gr.sykur
9 msk vínedik
1 msk tómatkraftur
3 msk sojasósa
Maizena-sósu jafnari
100gr sveppir
1 græn paprika
1 rauð paprika
100 gr Laukur
100 gr blaðlaukur
100 gr ananasbitar
Berið réttinn fram með hrísgrjónum eða kartöflum.
Þessi sósa er einnig sérlega ljúffeng með steiktu kjöti.
Bæjarstjóri Akraness ríður á vaðið í nýjum fréttaflokki á skagafrettir.is. Markmiðið er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.
„Þetta er mjög vinsæll réttur á heimilinu en ég fletti upp uppskrift að honum sumarið 2018 þegar fótboltastrákunum var bjargað úr hellinum í Taílandi. Í einni fréttinni kem fram að Pad Krapow með kjúklingi var það fyrsta sem þeir báðu um að borða og ákvað ég að elda þennan rétt þeim til heiðurs daginn sem þeim var bjargað. Þessi réttur með salati dugar auðveldlega fyrir fjóra,“ segir Sævar Freyr Þráinsson.
Sævar Freyr skorar á Ástþór Vilmar Jóhannsson að taka við keflinu og koma með næstu uppskrift en verkefnið er hluti af „Heilsueflandi Samfélagi“ á Akranesi.
Hráefni (mæli með að gera hráefni tilbúið fyrirfram því það tekur bara um 12-15 mín að elda):
3 til 4 msk olía
3 chilli fræ hreinsuð og skorin í sneiðar (ég skar smátt. (hef fræin af einu chilli með til að hafa hann bragð sterkari)
3 skallottulaukar, skornir í þunnar sneiðar (ég skar smátt)
5 hvítlauksrif skorin í þunnar sneiðar
600-700 gr kjúklingalæri beinhreinsuð án skinns (set í matvinnsluvél og tæti kjúkling niður í hakk) Ekki henda kjúklingafitu hún bráðnar og gefur bragð)
1 msk sykur (pálma/kókossykur ef til)
3 msk soyasósa
1 1/2 msk fiskisósa
1/2 bolli kjúklingasoð (ég hitaði vatn í örbylgju og leysti upp 1/2 tening)
1 búnt Thai basil lauf (má sleppa og hefur ekki mikil áhrif á réttinn eða nota ferskt venjulegt. Thai basil er til í asísku búðunum í Rvk).
Sjóðið hrísgrjón á meðan. Hæfilegur skammtur fyrir fjóra ættu að vera 3 bollar af grjónum. Þarf töluvert með þessum rétt.
Setja stóra pönnu á hæsta hita, bætið við olíu, chilli, skallottulauk og hvítlauk, og steikið í 1-2 mínútur þar til búið að mýkjast og jafnvel farið að brúnast lítillega í endum. Bætið við kjúklinga ”hakkinu” og steikið í um 5 mín þar til farið að brúnast lítillega. Tryggið að kjúklingurinn loði ekki saman og reynið að brjóta niður stærri bita.
Bætið við sykur, soyasósu, og fiskisósu. Steikið í aðra mínútu og jafnvel lengur þar til soð hefur að mestu horfið. Bætið þá út í kjúklingasoði og eldið áfram þar til mest af soðinu er horfið og farið að hjúpa kjúklinginn. Þetta á ekki að taka langan tíma 5-7 mín því pannan er á hæsta hita. Bætið við basil laufum og steikið í stutta stund þar til þau hafa visnað og blandast réttinum.
Berið fram með ríflegu magni af hrísgrjónum í skál þar sem hver og einn bætir ofan á réttinum og soyasósu að smekk hvers og eins.
Pad krapow með hrísgrjónum án salats stendur vel undir væntingum. Ef eldað er fyrir fleiri þá er auðvelt að tvöfalda allt í réttinum en gera þarf ráð fyrir lengri tíma í að sjóða niður vökva.
70 gr jöklasalat skorið smátt.
70 gr rauðkál skorið í þunnar ræmur.
1/2 appelsínugul papríka (eða rauð eða gul) skorin í þunnar sneiðar.
50 gr gulrætur rifnar eða sneiddar þunnt.
1 vorlaukur skorin í þunnar sneiðar.
1 msk steinselja skorin smátt.
80 gr edamame baunir (fást frosnar belg hreinsaðar í flestum búðum nú orðið).
1 /2 tsk ferskt engifer saxað smátt.
1 hvítlauksrif saxað smátt.
1/2 msk soya sósa.
1 msk hlynsíróp (eða hunang).
1 msk hrísgrjóna edik (eða sítrónusafi).
1 msk extra virgin olívu olía.
1/2 msk ristuð sesam olía.
1 msk sesam fræ (má sleppa).
Allt skorna hráefnið sett í skál og blandað vel saman. Fljótandi hráefnum blandað saman og svo sett út í salatskálina og öllu velt saman.
Kær kveðja, Sævar Freyr Þráinsson.
Séra Jónína Ólafsdóttir og Þóra Björg Sigurðardóttir eru nýkjörnir prestar við Garða- og Saurbæjarprestakall í Vesturlandsprófastsdæmi sem biskup Íslands auglýsti til umsóknar í desember s.l.
Kjörið fór fram mánudagskvöldið 17. febrúar s.l. á Akranesi.
Framvegis munu því þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.
Sr. Jónína Ólafsdóttir var kjörin í almennt preststarf en Þóra Björg Sigurðardóttir í preststarf með áherslur á barna- og æskulýðsstarf.
Alls bárust sjö umóknir um störfin en 17 manna kjörnefnd úr héraði valdi þær Jónínu og Þóru Björg úr hópi 4 umsækjenda eftir forval matsnefndar um hæfi umsækjenda sem skipuð var af Biskupi Íslands.
Þess má geta að tveir af sjö umsækendum drógu umsóknir sínar til baka.
Sr. Jónína Ólafsdóttir er fædd 14. ágúst 1984. Hún lauk prófi í guðfræði frá Háskóla Íslands 2017 og BA próf í íslensku með félagsfræði sem aukagrein frá Háskóla Íslands árið 2008.
Á liðnu ári lauk Jónína diplómanámi á meistarastigi í sálgæslu frá Endurmenntunarstofnun HÍ sem og 90 einingum af 120 til MA prófs í guðfræði.
Jónína hefur gengt ýmsum störfum innan kirkjunna frá árinu 2007 en hefur starfað sem settur prestur í Dalvíkurprestakalli frá 1 okt. 2019. Eiginmaður hennar er Eggert Þröstur Þórarinsson og eiga þau tvo syni.
Þóra Björg Sigurðardóttir er fædd 25. janúar 1989. Hún lauk prófi í guðfræði frá Háskóla Íslands árið 2019 og BS próf í sálfræði frá Háskóla Íslands 2016. Þóra Björg hefur starfað sem ritari og æskulýðsfullrúi við Grafarvogskirkju frá árinu 2011 en komið að kristilegum störfum frá árinu 2008 m.a. á vegum KFUM&K í sumarbúðunum í Vatnaskógi og Ölver. Þess má geta að Þóra Björg hefur enn sem komið er ekki hlotið vígslu sem prestur. Eiginmaður hennar er Geirlaugur Ingi Sigurbjörnsson. Eiga þau tvö lítil börn og eru búsett á Akranesi.
Eins og áður segir munu þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.
Fyrir er séra Þráinn Haraldsson en hann var kjörin sem sóknarprestur á liðnu ári. Þetta er í fyrsta skiptið sem konur eru kjörnar til prestembæta í Garða – og Saurbæjarprestakalli. Eru því um mikil tímamót að ræða.
Einnig er mjög áberandi hve verðandi prestateymi eru ung að aldri en þau eru öll vel undir fertugu. Það er engu líkarar en að kjörnefnd Garða- og Saurbæjarprestakalls séu að leggja áherslu að yngja verulega upp í sóknarstarfinu á komandi árum.
Í dag hófst formleg söfnun í minningarsjóð Arnars Dórs Hlynssonar. „Hjá okkur hjá Sansa verður þannig háttur á að í þessari pöntunarviku, sem stendur fram til miðnættis 10. janúar munu 750 kr. af hverjum matarpakka fara í minningarsjóð Arnars Dórs.
„Arnar Dór Hlynsson var topp náungi en ótrúlega óheppinn með veikindi. Hann kvartaði samt aldrei. Minningarsjóður Arnars Dórs er stofnaður af Sansa, Team ´79 og ÍA. Sjóðurinn mun í framtíðinni styðja við bakið á góðum málum sem tengjast uppáhaldsíþróttum Arnars Dórs,“ segir Þórður Már Gylfason eigandi Sansa við skagafrettir.is.
ÍA mun hafa umsjón með minningarsjóðnum og verður úthlutað úr sjóðnum einu sinni á ári.
„Arnar Dór vinur minn lést þann 14. september 2017, langt fyrir aldur fram. Á þeim tíma var ég að setja fyrirtækið á laggirnar og það gafst enginn tími til þess að gera það sem mig langaði að gera til að heiðra minningu hans. Með hjálp margra þá er þessi minningarsjóðurinn nú til. Árgangur 79 sem Arnar Dór tilheyrði á stóran þátt í þessu ásamt ÍA og foreldrum Arnars Dórs.
Niðurstaðan er sú að minningarsjóður Arnars Dórs mun styrkja þau aðildarfélög ÍA sem hann tengdist. Það eru golf, fótbolti og kraftlyftingar. Arnar Dór var mikill stuðningsmaður knattspyrnunnar, hann var á golfvellinum flesta daga og lyfti lóðum af krafti þess á milli.“
Fyrirtækið Sansa sem Þórður Már setti á laggirnar á Akranesi í fyrra sérhæfir sig í því að útbúa matarpakka fyrir einstaklinga og fjölskyldur. Óhætt er að segja að viðtökurnar hafi farið fram úr björtustu vonum Þórðar.
„Síðasta vika var sú besta frá upphafi, metvika, og ég vona að þessi vika verði ekki síðri til þess að efla minningarsjóð Arnars Dórs. Og að sjálfsögðu er einn af réttum vikunnar uppáhaldsfiskisúpa Arnars Dórs,“ bætti Þórður Már við.
Fyrir þá sem vilja leggja inn á minningarsjóð Arnars Dórs þá er þetta númerið á styrktarreikningnum:
552-14-350047
kt. 670169-2199
Auglýsing
Það er ekkert leyndarmál að Skagamaðurinn Ólafur Þórðarson segir það sem hann meinar – og hann liggur ekki á skoðunum sínum.
Ummæli Ólafs á ýmsum málum hafa verið til umfjöllunar í fréttamiðlum á landsvísu og vakið mikla athygli.
Á Þorrablóti Skagamanna lék Ólafur stórt hlutverk í skemmtiatriði 1978 árgangsins – og má sjá það hér fyrir neðan.
Ólafur Þórðarson er einn þekktasti knattspyrnumaður Skagamanna fyrr og síðar. Landsliðsmaður til margra ára og lykilmaður í hinu sigursæla liði ÍA sem mokaði inn titlum seint á síðustu öld.
Ólafur snéri sér að þjálfun eftir að ferlinum lauk og undir hans stjórn varð karlalið ÍA m.a. Íslandsmeistari árið 2001.
ÍA hefur ekki náð að landa Íslandsmeistaratitli í mfl. karla frá árinu 2001.
Auglýsing
Auglýsing
Auglýsing
Auglýsing
Auglýsing
Auglýsing
