Karlalið ÍA komst áfram í 16-liða úrslit Mjólkurbikarkeppni KSÍ með 4-0 sigri gegn Haukum í Akraneshöllinni s.l. laugardag.
Í dag var dregið í 16-liða úrslitum keppninnar.
ÍA fær heimaleik gegn Grindavík, sem leikur í næst efstu deild, og fer leikurinn á heimavelli ÍA um miðjan maí.
Þessi lið mætast í 16-liða úrslitum:
Vestri/Leiknir – Grótta
Stjarnan – KR
ÍA – Grindavík
Afturelding – Njarðvík
Þróttur – Breiðablik
KA – Ægir
Fylkir – FH
HK – Víkingur
Aðsend grein:
Mikil umræða er í samfélaginu um stöðu atvinnumála, brotthvarf útgerðarinnar, orkuinnviði, ferðaþjónustu, samgöngumál og þróun mála á Grundartanga. Þetta er mikið hitamál og tilfinningarnar miklar þegar rætt er hvað hefði mátt gera öðruvísi síðastliðin 15 ár. Það er ekkert leyndarmál að atvinna og verðmætasköpun er forsenda velferðarsamfélags, ef ekki er til staðar blómlegt atvinnulíf getum við pakkað saman og flutt í burt. En hvernig er staðan samt þegar við skoðum gögnin ofan í kjölinn og hvaða tækifæri sjáum við í nánustu framtíð?
Þegar samsetning atvinnutekna á Akranesi er skoðuð má sjá að tæpur þriðjungur myndast við Stjórnsýslu, fræðslu og heilbrigðisþjónustu, eins og Byggðastofnun flokkar það. Framleiðsla án fiskvinnslu er aðeins minna hlutfall og svo koma flokkarnir Fiskveiðar & vinnsla, Byggingarstarfsemi og loks Verslun & bílaþjónusta. Flokkurinn Gisting & veitingar eru svo rúmt 1%, meira um það síðar. Þetta eru að mörgu leyti áhugaverðar tölur út af fyrir sig, en þegar þessi hlutföll eru skoðuð í sögulegu samhengi verða þær fyrst nothæfar til greiningar á stöðunni í dag. Þessi hlutföll hafa nefnilega haldist nánast eins síðast liðin 15 ár en á sama tíma er talað um algjört vonleysi og svartnætti í atvinnumálum.
Stærstur eru jú vissulega hið opinbera en hvaða störf eru það? Fyrst og fremst eru þar skólarnir okkar sem við þekkjum öll fyrir þeirra öfluga starf. Þetta er grunnurinn að góðu samfélagi og höfum við svo sannarlega gert vel í þessum málaflokki síðustu ár og njótum góðs af um ókomin ár ef við höldum rétt á spilunum. Svo er það heilbrigðisþjónustan sem kemur á eftir, en við erum svo ótrúlega heppin að hafa hér í bæ gríðarlega gott sjúkrahús með fjölbreytta starfsemi. HVE hefur um árabil verið einn stærsti vinnustaður á Akranesi og miðað við núverandi eftirspurn og þróun hjá þeirri stofnun er ljóst að starfsemin mun einungis eflast. En í þessu samhengi ættum við líka að huga að nýsköpun og nýjungum í velferðarþjónustu sem gætu skapað hér fjölda starfa til viðbótar. Það eru gríðarleg tækifæri sem felast í því að hafa eina stærstu heilbrigðisstofnun landsins innanbæjar, má þar nefna aukna þjónustu með sjálfstætt starfandi sérfræðingum, samstarf við Háskóla Íslands og HA, sem og aðila í byggingariðnaði við uppbyggingu og viðhaldi þessara innviða.
Fiskveiðar & vinnslu langar mig að nefna á meðan ég fer yfir atvinnumál innanbæjar en þar eigum við nokkrar perlur sem fólk virðist hunsa í daglegu tali en ofuráhersla hefur verið lögð á löndun smábáta og lyftaraumferð niður á bryggju. Vissulega er það miður að lífið á bryggjunni hefur breyst mikið frá því sem áður var en þar hafa markaðslögmálin haft hvað mest að segja um hvernig staðan er í dag. Með uppbyggingu hafnarmannvirkja undanfarin ár erum við þó tilbúin að taka á móti umfangsmikilli starfsemi á ný og verður það eflaust eitt stærsta verkefni næstu bæjarstjórnar að ganga á eftir því. En ástæða þess að hlutfall atvinnutekna frá þessum flokki hefur haldist stöðugt síðustu 15 ár eru þessar perlur sem ég nefndi, þetta eru fyrirtækin sem framleiða vörur á neytendamarkað innanlands og erlendis, sjá fjölda manns fyrir vinnu og má segja að flest afleidd störf skapist í kringum. Þau eru misjafnlega fyrirferðarmikil og ekki víst að allir þekki þau og hvað þau eru mikilvæg fyrir okkur. Innan veggja þessara fyrirtækja er hins vegar engan bilbug að finna á eigendum, stjórnendum og starfsfólki. Stefnan er alltaf sett á heimsklassa gæði, stækkun og verðmætasköpun úr hráefni víðsvegar af Íslandi. Ein mesta ógn þessara fyrirtækja sem og annarra eru svokallaðir orkuinnviðir okkar, þ.e. bæði vatn og rafmagn. Við þurfum að leggja ofuráherslu á að fyrirtæki eins og Landsnet eða Veitur verði ekki flöskuháls í uppbyggingu atvinnulífs í bæjarfélaginu okkar. Fyrir því þurfum við að berjast á öllum vígstöðum.
Um ferðaþjónustuna og gistingu innanbæjar er ekki mikið að skrifa sem snýr að samtímasögunni. Eins og áður kom fram telur þessi grein rúmt 1% af atvinnutekjum Skagamanna og hefur verið í sama fari síðustu áratugi. En nú má segja að nýr kafli sé að hefjast á Akranesi með áhugasömum aðilum sem sérhæfa sig í ferðaþjónustu. Mikið hefur verið lagt upp úr að hótelbyggingu sé komið fyrir í skipulagi bæjarins og má segja að loks nú sé einhver hreyfing að komast á málin. Ég ætla ekki að fara í mikla greiningarvinnu og áætlanagerð í þessum pistli en við skulum segja að tækifæri til að auka tekjuhlutfall ferðaþjónustu og gistingar geti ekki verið meiri en einmitt á þessari stundu. Það er bara ein leið og það er upp!
Loks langar mig að fjalla aðeins um flokkinn Framleiðsla án fiskvinnslu sem er mér ansi kær. Ég hef starfað í blikksmiðju í um 18 ár og verið þess heiðurs aðnjótandi að sinna þjónustu við stóriðjuna á Grundartanga. Á Grundartanga starfa mörg hundruð Skagamanna og með afleiddum störfum talið slagar sú tala örugglega hátt í þúsund. Það má því með sanni segja að svæðið hefur spilað stórt hlutverk í þróun Akraneskaupstaðar og mun halda áfram að gera það næstu áratugi. Á dögunum hitti ég hóp atvinnurekenda á Akranesi og var það samdóma álit manna að líta verði á atvinnusvæði Akraness frá ansi víðu sjónarhorni. Það er nefnilega miklu stærra svæði en bara það sem finnst innan bæjarmarka sem þarf að huga að. Tækifærin á svæðinu eru gífurleg en mikið hefur verið fjallað um uppbyggingu orkuvers með glatvarma, landeldisstöð, magnesíum verksmiðju, vígslu boltasteypuskála Norðuráls og svo uppbygging Galtarhafnar ásamt tengdum rekstri.
Þegar við tölum um atvinnumálin á Akranesi þurfum við að átta okkur á stöðunni í dag, við höfum þessar gríðarstóru verksmiðjur á Grundartanga og fjölda fyrirtækja sem sinna þjónustu á svæðinu. Einhverjir tala um að það borgi sig ekki að vera með öll eggin í sömu körfunni en það þarf að hugsa þetta út frá framboði og eftirspurn. Það eru verksmiðjur á svæðinu og það þarf að sinna þessum störfum. Ef það verður breyting á stöðu þeirra í framtíðinni, þá munu fyrirtæki bregðast við og snúa sér að öðru. Það er þó alveg á hreinu að við getum aukið enn frekar við atvinnumöguleika innanbæjar og verður það okkar helsta verkefni að gera allt sem í okkar valdi stendur til þess að auðvelda og einfalda ferlið við að stofna eða flytja fyrirtæki á Akranes.
Mig grunar að sá tónn sem er í fólki um þessar mundir sé í raun afleiðing þjóðhagfræðilegrar sveiflu í kjölfar stóráfalla sem þjóðfélagið okkar er enn að jafna sig á og þarf að líða fyrir enn lengur undir núverandi ríkisstjórnar en smitast inn í bæjarmálin. Ég hef sjálfur verið kallaður Pollyanna í þessu samhengi en eftir þessa yfirferð er ekki annað að sjá en að tækifærin séu allt í kringum okkur. Við erum í raun í þeirri öfundsverðu stöðu að vera tilbúin í sókn á öllum vígstöðum.
Emil Kristmann Sævarsson.
Höfundur skipar 6.sæti D-lista Sjálfstæðisflokksins á Akranesi.
Haraldur Benediktsson hefur lokið störfum sem bæjarstjóri Akraneskaupstaðar. Þetta kemur fram í tilkynningu.
Bæjarstjórn Akraness og Haraldur hafa komist að samkomulagi um starfslok – en Haraldur hefur ákveðið að bjóða sig fram í sveitarstjórnarkosningum í Hvalfjarðarsveit.
Steinar Adolfsson sviðsstjóri fjármála- og þjónustusviðs og staðgengill bæjarstjóra verður starfandi bæjarstjóri fram yfir sveitarstjórnarkosningar sem fara fram þann 16. maí næstkomandi.
Í tilkynningunni kemur eftirfarandi fram:
„Um er að ræða sameiginlega ákvörðun Haraldar og bæjarstjórnar enda var bæjarstjórn kunnugt um að Haraldur myndi ekki sækjast eftir áframhaldandi ráðningu á næsta kjörtímabili.
Líkt og greint var frá rétt í þessu hefur Haraldur ákveðið að bjóða sig fram til sveitarstjórnar í Hvalfjarðarsveit. Bæjarstjórn óskar honum til hamingju með þá ákvörðun og þakkar um leið fyrir afar farsælt samstarf undanfarin þrjú ár. Haraldur hefur reynst góður bæjarstjóri sem hefur sinnt starfinu af bæði metnaði og alúð, Akraneskaupstað og íbúum á Akranesi til heilla. Jafnframt óska bæjarfulltrúar Haraldi gæfu og góðs gengis í þeim verkefnum sem framundan eru.
Haraldur mun verða Steinari til halds og trausts næstu vikurnar til að tryggja farsæla yfirfærslu þeirra verkefna sem nú eru á borði bæjarstjóra til staðgengils og annarra starfsmanna kaupstaðarins.“
Skagarokk 2026 fer fram í Bíóhöllinni á Akranesi 10. og 11. apríl – þar sem að sex hljómsveitir spila.
Ólafur Páll Gunnarsson stendur á bak við verkefnið og er markmiðið að búa til „mini-festival“ sem verði árlegur viðburður á Akranesi.
Miðasala hefur gengið vel – en það er enn hægt að tryggja sér miða – smelltu hér:
Föstudagskvöldið 11. apríl verður spilað þungarokk:
Black Sabbath rokkmessa
Múr
Bastarður
Laugardagskvöldið er það önnur músík og örlítið léttari:
Hjálmar
Spacestation
Oyama
Skagarokk var fyrst haldið í Bíóhöllinni á Akranesi árið 1989 og svo aftur 1990. Þar komu mestmegnis fram hljómsveitir frá Akranesi. Árið 1992 stóðu Sigurður Sverrisson og Einar Skúlason að Skagarokki þar sem að stórhljómsveitirnar Jetrho Tull og Black Sabbath komu í íþróttahúsið við Vesturgötu og héldu tónleika. Skagarokkið hélt áfram árið 1993 og 1994 og þá var Ólafur Páll á meðal skipuleggjenda, og nú 32 árum síðar er verkefnið endurvakið – og spennandi tónlistarviðburðir framundan á Akranesi.
Í desember árið 2022 var greint frá því að stefnt væri að uppbyggingu hótels, heilsulindar, baðlóns og uppbyggingu íþróttamannvirkja við Jaðarsbakka.
Ísold fasteignafélag gerði á þeim tíma samkomulag við Akraneskaupstað, ÍA og Knattspyrnufélag ÍA og Basalt arkitektar voru ráðnir sem hönnunaraðila verkefnisins.
Basalt lagði fram tillögu í október 2023 sem kynnt var á íbúafundi í Bíóhöllinni – en þar var m.a. lagt til að Akranesvöllur væri samhliða Akraneshöllinni, og baðlón og hótel yrði byggt á þeim stað sem knattspyrnuvöllurinn er dag. Nánar í þessari frétt á vef Skagafrétta.
Í nýrri fundargerð fundargerð starfshóps um uppbyggingu mannvirkja á Jaðarsbökkum kemur fram að ekki sé gert ráð fyrir hóteli á svæðinu – og heildarskipulag svæðisins verði skipulagt á ný.
Leitað verður á ný til Basalt arkiteka varðandi tillögu að heildarskipulagi svæðisins þar sem að Jaðarsbakkasvæðið verði miðstöð heilsu, íþrótta og hreyfingar, með skýra tengingu við sjóinn og Langasand.
Eftirfarandi forsendur eru lagðar fram í fundargerðinni:
Aðsend grein:
Áður en ég reyni að svara því þá er kannski rétt að segja aðeins frá sjálfum mér. Ég er menntaður húsasmíðameistari, slökkviliðsmaður og byggingarfræðingur og starfa hjá Eflu verkfræðistofu. Ég er giftur Báru Daðadóttir félagsráðgjafa og saman eigum við fjögur börn, tvær stelpur á leikskólaaldri og tvö börn í grunnskóla. Ég hef búið á Akranesi í rúmlega 11 ár og elska það. Akranes er frábær staður til að ala upp börn og samfélagið hér er einstaklega gott.
Móðir mín er fædd og uppalin á Akranesi og sem barn kom ég oft uppá Skaga til að heimsækja ömmu og afa, Kristján Leó Pálsson og Bertu Bergsdóttir, sem bjuggu á Suðurgötunni og Skarðsbrautinni, og frændfólk mitt hér. Afi sagði mér margar sögur af því hvernig bærinn byggðist upp og á ferðum okkar dáðist ég alltaf að þessum fallegu húsum sem öll virtust geyma sögu. Það má því segja að ég hafi alla tíma haft mikinn áhuga á uppgerð eldri húsa. Þessi áhugi þróaðist svo yfir í það að verða mitt aðalstarf en ég starfaði sem húsamiður hjá Gamlhús og Minjavernd við uppgerð eldra húsnæðis, bæði í miðbæ Reykjavíkur og annars staðar á landinu en þar á meðal má nefna metnaðarfullt verkefni í Flatey á Breiðafirði, uppgerð á húsnæði sem til stóð að rífa en hýsir í dag hótel og samkomuhús. Ég held að það sé óhætt að segja að hefði það raungerst væri samfélagið í þessari perlu Breiðafjarðar fátækara. Er því ekki bara eðlilegt að spyrja, er nýtt endilega alltaf betra?
Þessi reynsla kom sér vel því síðar vann ég á arkitektastofu þar sem ég kom að hönnun og breytingum á eldra húsnæði. Áður en ég hóf störf hjá EFLU vann ég sem verkefnastjóri á Skipulags-og umhverfissviði Akraneskaupstaðar og tók síðar við sem Byggingarfulltrúi á sama sviði og þekki því vel þau flottu verkefni sem hafa verið unnin á Akranesi á síðustu árum. Þar má nefna bæði nýframkvæmdir eins og húsnæði eldri borgara að Dalbraut 4, reiðhöll Dreyra, leikskólann Garðasel, fimleikahúsið og nýja íþróttahúsið á Jaðarsbökkum og aðrar flottar framkvæmdir eins og við Brekkubæjarskóla, Grundaskóla, Bjarnalaug og Jaðarsbakkalaug.
En hver er ávinningurinn af því að gera upp eldri hús og viðhalda því sem fyrir er í stað þess að rífa, skiptir sagan ekki máli?
Ég sé af því mikinn ávinning og nefni hér að saga húsanna og svæðisins heldur sér, vel uppgerð hús hafa þau áhrif að aðrir í kring fara að gera upp sín hús og það er langoftast töluvert betra fyrir umhverfið heldur en að rífa þau og byggja ný. Það þarf ekki endilega að afskrifa byggingar þó viðhald á þeirra hafi verið takmarkað jafnvel til langs tíma, en við þurfum að leyfa okkur að hugsa, hvað kemur í staðinn og verður það betra en það sem nú er? En tímarnir breytast og mennirnir með og því þurfa bæjaryfirvöld að vera tilbúin til þess að rýma fyrir breytingum á skipulagi en þær ákvarðanir eiga og þurfa að vera vel ígrundaðar. Ég held að það geti allir nefnt dæmi bæði héðan af Akranesi eða frá öðrum stöðum á landinu þar sem vel uppgerðar byggingar eru hreint augnakonfekt. En því miður eru líka mörg dæmi þar sem hús hafa verið fjarlægð og ekkert komið í stað þess, bara sár í sögu tímans. Þegar við ferðumst erlendis sækjum oftast í þá hluta borgarinnar þar sem eldri húsin eru, sál og hjarta borgarinnar. Vinaleg svæði og oftar en ekki í góðum skala við fólk. Samspil eldri og nýrri húsa er oft áskorun og getur bæði heppnast vel og illa en með góðri framtíðarsýn og skipulagi er það mikils virði. Það eru ótrúlega mörg tækifæri til að hleypa lífi í fallega miðbæinn okkar og laða að ferðamenn og fyrirtæki og ekki síst okkur sem búum á Akranesi því okkur finnst líka gaman að upplifa líf og gleði í bænum okkar. Hér eru gríðarleg tækifæri en þar má nefna sementsverksmiðjusvæðið, svæðið í kringum gamla iðnskólann og Bjarnalaug.
Karl Jóhann Haagensen.
Undirritaður skipar fjórða sæti hjá Framsókn og frjálsum í komandi kosningum 16. maí.
Lionsklúbbur Akraness afhenti í gær Heilbrigðisstofnun Vesturlands á Akranesi gjafabréf að verðmæti 6,3 milljónir kr.
Leiga á leiðisskrossum í kirkjugarðinum á Akranesi um jólahátíðina er helsta fjáröflun klúbbsins.
Eftirfarandi tæki verða keypt fyrir gjafabréfið: Schiller hjartalínuritstæki, Siemens blóðrannsóknartæki, Mach 130 færanlegt vinnuljós og búnað til aðgerða á blöðruhálskirtli.
Guðjón V. Guðjónsson afhenti gjafabréfið fyrir hönd Lionsklúbbsins en með honum á myndinni eru frá vinstri: Hulda Gestsdóttir framkvæmdastjóri hjúkrunar HVE, Jóhanna Fjóla Jóhannsdóttir forstjóri HVE og Þórir Bergmundsson læknir og nefndarmaður áhaldakaupasjóðs HVE.
Aðsend grein:
Það er eitthvað við aðdraganda kosninga sem fær mann til að staldra aðeins við. Ekki bara til að skoða loforð eða lesa yfir stefnuskrár, heldur til að velta fyrir sér stærri spurningum sem kannski gleymast stundum í dagsins önn – spurningum sem snúa að því hvernig samfélag við viljum vera og hvers konar fólk við viljum treysta fyrir því að leiða það áfram. Því þegar öllu er á botninn hvolft snúast kosningar ekki bara um tölur, sæti og niðurstöður. Þær snúast um gildi, um sýn, um fólk eins og mig og þig.
En kannski fyrst og fremst um það hvernig fólk nálgast hlutverk sitt.
Ég hef oft hugsað um það hvað það er sem skiptir raunverulega máli hjá þeim sem velja sér að stíga fram og taka þátt í að móta samfélagið sitt. Það er auðvitað mikilvægt að hafa skoðanir, að hafa þekkingu og vilja til að vinna, en það er eitthvað meira sem vegur þungt. Eitthvað sem ekki er alltaf hægt að setja á blað í stefnuskrá. Það er hugarfarið.
Viljinn til að hlusta af alvöru, ekki bara til að svara heldur til að skilja. Getan til að setjast niður með fólki sem er ekki sammála manni og leita samt leiða áfram. Hugrekkið til að taka ákvarðanir sem byggja á hagsmunum heildarinnar, jafnvel þegar það er ekki auðveldasta leiðin eða sú vinsælasta á þeirri stundu. Því samfélag er nefnilega ekki samansafn af ólíkum hópum sem hver og einn berst fyrir sínu horni, heldur lifandi heild þar sem allt tengist og þar sem ákvarðanir á einum stað hafa áhrif á annan, og þar sem við berum öll – hvert á sinn hátt – sameiginlega ábyrgð á því hvernig okkur tekst til.
Í litlu samfélagi eins og okkar hér á Akranesi, verður þetta enn skýrara. Hér mætumst við á öllum sviðum lífsins – í skólanum, á íþróttavellinum, í búðinni, í göngutúrnum. Við erum ekki bara íbúar á blaði, heldur nágrannar, foreldrar, vinir og samstarfsfólk. Þess vegna skiptir svo miklu máli að þau sem fara með ákvörðunarvaldið haldi þessari tengingu, að þau gleymi ekki að á bak við hvert mál eru manneskjur, aðstæður og líf. Ekki bara tölur á excel skjali.
Á sama tíma skiptir líka gríðarlega miklu máli að við sem samfélag horfum á okkur sem heild.
Að við þorum að spyrja okkur ekki bara hvað þjónustan geri fyrir okkur sjálf eða okkar nánasta hóp, heldur hvernig við getum í sameiningu byggt upp samfélag sem er gott fyrir alla. Samfélag þar sem börn fá að blómstra, þar sem ungmenni finna tækifæri, þar sem fullorðið fólk hefur svigrúm til að vaxa og þar sem eldri borgarar finna fyrir virðingu og öryggi. Samfélag sem er inngildandi, þar sem allir eiga sér stað og finna að þeir skipta máli.
Slíkt samfélag verður ekki til af sjálfu sér.
Það verður til í samtali og í samstarfi. Í því að við veljum að nálgast hvert annað af virðingu, jafnvel þegar við erum ósammála. Í því að við tölum bæinn okkar upp, ekki af því að við sjáum ekki það sem má betur fara, heldur af því að við trúum því að við getum gert hlutina betur – saman.
Kannski er það einmitt þetta sem skiptir mestu máli þegar við veltum fyrir okkur hverjir eigi að leiða bæinn okkar næstu fjögur ár. Ekki bara hvaða hugmyndir fólk hefur, heldur hvernig það vinnur með öðrum, hvernig það talar um samfélagið sitt og hvernig það nálgast ábyrgðina sem því er falin.
Viljum við fólk sem dregur línur á milli „okkar“ og „hinna“, eða fólk sem sér tækifæri í því að byggja brýr? Viljum við fólk sem einblínir á það sem er að, eða fólk sem sér bæði áskoranirnar og möguleikana og hefur vilja til að vinna með báðu? Viljum við fólk sem talar hátt, eða fólk sem hlustar vel?
Svarið við þessum spurningum er ekki bara spurning um pólitík. Það er spurning um það hvernig samfélag við viljum vera hluti af. Því samfélagið okkar er ekki eitthvað sem „aðrir“ byggja fyrir okkur. Það er eitthvað sem við byggjum saman – í litlum skrefum á hverjum degi, í samtölum, ákvörðunum og samskiptum.
Og þegar við göngum að kjörborðinu erum við ekki bara að velja fólk á lista. Við erum að velja hvaða gildi við viljum að móti bæinn okkar. Hvaða tón við viljum að umræðan hafi.
Og hvers konar samfélag við viljum skapa – saman.
Liv Åse Skarstad.
Höfundur er bæjarfulltrúi Framsóknar og frjálsra á Akranesi.
Aðsend grein:
Akranes er sterkt og gott samfélag. Félagslegir innviðir og skólastarf bæjarins eru með því besta sem gerist á landinu. Það er árangur sem við eigum að vera stolt af og mikilvægt að halda áfram því öfluga starfi.
En sterk staða í dag tryggir ekki sjálfkrafa sterka stöðu á morgun. Nú stöndum við frammi fyrir tækifærum til að taka næsta skref og styrkja grunninnviði bæjarins, styðja betur við atvinnuuppbyggingu og byggja upp enn öflugra samfélag til framtíðar.
Grunninnviðir hafa of lengi setið á hakanum. Það hefur haft áhrif og í sumum tilfellum hafa tækifæri runnið okkur úr greipum. Á sama tíma er samkeppnin hörð. Sveitarfélög í kringum höfuðborgarsvæðið keppast um að laða að fólk, fyrirtæki og fjárfestingu og þar skipta innviðir sköpum.
Ef Akranes ætlar að standa jafnfætis öðrum sveitarfélögum þurfum við að bregðast við og nýta þau tækifæri sem nú eru til staðar.
Efling grunninnviða snýst ekki um eitt verkefni heldur skýra sýn. Hún felst í að tryggja aðgengi að byggingarhæfum lóðum, bæta gatnakerfi og samgöngur, styrkja orku- og veitukerfi og skapa skýran ramma fyrir uppbyggingu atvinnusvæða.
Þetta eru grunnforsendur þess að atvinnulíf geti vaxið og að fjölskyldur velji sér búsetu. Þar skiptir máli að innviðir séu til staðar, skipulag sé skýrt og uppbygging gangi hratt og örugglega fyrir sig.
En uppbygging snýst ekki aðeins um innviði heldur líka um hvernig við vinnum.
Stjórnsýslan þarf að vera virkur þátttakandi í uppbyggingu, ekki hindrun. Með því að stíga skref í átt að þjónandi forystu skapast umhverfi þar sem verkefni komast hraðar af stað og samstarf við atvinnulíf og íbúa verður markvissara og skilvirkara.
Stjórnsýslan og fólkið verða að vinna náið saman til að skapa raunveruleg tækifæri til vaxtar og framfara
Framundan eru spennandi tímar. Með því að byggja áfram á þeim styrkleikum sem við höfum og ráðast í markvissa eflingu grunninnviða getum við styrkt Akranes enn frekar sem stað til að búa, starfa og byggja upp framtíð.
Rúnar Freyr Ágústsson.
Höfundur er í 9. sæti D-lista í komandi sveitarstjórnarkosningum.
Viðreisn tilkynnti í dag framboðslista flokssins fyrir komandi bæjarstjórnarkosningar sem fram fara í maí. Þetta er í fyrsta sinn sem flokkurinn býður fram á Akranesi.
Jón Guðni Guðmundsson, burðarþolssérfræðingur og brúarhönnuður, skipar oddvitasætið. Helga Björg Þrastardóttir, matreiðslumeistari er í öðru sæti, Ingvar Örn Ákason, verkefnastjóri er í þriðja sæti og Guðný Sara Birgisdóttir, fjáröflunarstjóri Krafts og listakona er í fjórða sæti.
„Ég hef mikla trú á því að Viðreisn á Akranesi muni koma inn af krafti í bæjarmálin með lausnamiðaða nálgun og jákvæðni að leiðarljósi,“ er haft eftir Jóni Guðna í tilkynningu.
„Við ætlum aðs styrkja rekstur sveitarfélagsins, tryggja áfram góð skilyrði fyrir fjölskyldufólk á svæðinu og hlúa að grunnþjónustunni. Húsnæðismál, skipulagsmál og atvinnumál eru grunnstoðir samfélagsins sem mikilvægt er að samþætta með öllum öðrum málaflokkum. Á komandi kjörtímabili eru mikil tækifæri fólgin í því að sækja fram fyrir Akranes á öllum sviðum,“ segir Jón Guðni.
Listi Viðreisnar er þannig skipaður:
1. Jón Guðni Guðmundsson, burðarþolssérfræðingur
2. Helga Björg Þrastardóttir, matreiðslumeistari
3. Ingvar Örn Ákason, verkefnastjóri
4. Guðný Sara Birgisdóttir, fjáröflunarstjóri Krafts og listakona
5. Guðmundur Claxton, tölvunarfræðingur
6. Tinna Steindórsdóttir, grunnskólakennari
7. Ellert Hjelm, verslunarmaður
8. Aldís Ylfa Heimisdóttir, verkefnastjóri og knattspyrnuþjálfari
9. Alexander Aron Guðjónsson, framkvæmdastjóri
10. Hugrún Eva Valdimarsdóttir, hjúkrunarfræðingur
11. Jóel Þór Jóhannesson, stuðningsfulltrúi og markaðsfulltrúi
12. Drífa Dröfn Siggerðardóttir, verslunareigandi
13. Sigfús Agnar Jónsson, vélfræðingur og vaktstjóri
14. Ragnheiður Ásta Brynjólfsdóttir, verkefnastjóri umbóta
15. Ýmir Hjálmsson, háskólanemi
16. Elírós Kjaran Zar, kvikmyndagerðakona
17. Jóhannes Finnur Halldórsson, eldri borgari
18. Edit Ómarsdóttir, forstöðumaður fyrirtækjaþjónustu og varaþingmaður
Ágústa Rósa Andrésdóttir er nýr forstöðumaður íþróttamannvirkja á Akranesi.
Ágústa Rósa er frá Akranesi og hefur m.a. verið formaður karatefélags Akraness, setið í stjórn badmintfélags Akraness og í framkvæmdastjórn Íþróttabandalags Akraness. Ágústa hefur starfað sem æskulýðsfulltrúi í Hvalfjarðarsveit, og nú síðast sem Forstöðumaður Frístundasels Lágafellsskóla í Mosfellsbæ.
Bæjarstjórn Akraness samþykkti ráðningu Ágústu á síðasta bæjarstjórnarfundi. Alls sóttu 17 manns um starfið. Hörður Kári Jóhannesson hefur verið forstöðumaður íþróttamannvirkja á Akranes og var honum þökkuð góð störf á bæjarstjórnarfundinu.
Ágústa er fædd árið 1971 og hún er gift Herði Svavarssyni rafvirkja og þau eiga þrjú börn, Andrés Má, Aðalheiði Rósu og
Ólaf Elías.
Eftirtaldir sóttu um starfið:
Ágústa Rósa Andrésdóttir
Baldvin Bjarki Baldvinsson
Daisy Heimisdóttir
Ellert Baldur Magnússon
Eyrún Ída Guðjónsdóttir
Finnbogi Rafn Gudmundsson
Guðbjartur Máni Gíslason
Helena Rúnarsdóttir
Helgi Magnússon
Indriði Jósafatsson
Ingimar Elí Hlynsson
Magnús Gísli Sveinsson
Óli Þór Júlíusson
Pétur V. Georgsson
Ragnheiður Smáradóttir
Sturlaugur Sturlaugsson
Valdimar Leó Friðriksson
Eva Björg Ægisdóttir frá Akranesi fékk í dag afhent spennusagnaverðlaunin Svartfuglinn fyrir bókina Marrið í stiganum.
Eliza Reid, forsetafrú, afhenti verðlaunin.
Yrsa Sigurðardóttir og Ragnar Jónasson eru hugmyndafræðingarnir að baki verðlaununum sem ætluð eru höfundum sem ekki hafa áður sent frá sér glæpasögu. Þetta kemur fram í Fréttablaðinu í dag.
Eva er eins og áður segir frá Akranesi en foreldrar hennar eru Ægir Jóhannsson og Sigríður Björk Kristinsdóttir.
Í áliti dómnefndar um bókina segir meðal annars: „Sagan er grípandi og spennandi samhliða því að veita innsýn í myrkan og sáran veruleika. Fléttan er fagmannlega unnin, söguþráðurinn sterkur og sögulokin koma lesandanum á óvart.“
Verðlaunin nema 500.000 krónum auk hefðbundinna höfundarlauna. Sigurvegaranum býðst einnig samningur við umboðsmanninn David H. Headley en tímaritið Bookseller útnefndi hann sem einn af 100 áhrifamestu mönnum breskrar bókaútgáfu árið 2015.
Eva er með MSc gráðu í alþjóðamálum frá Tækniháskólanum í Þrándheimi og BA gráðu í félagsfræði frá Háskóla Íslands. Hún starfar hjá fyrirtækinu Maskína en hún hefur einnig starfað á þróunarsviði VÍS tryggingafélags, verið aðstoðamaður við viðskiptafræðideild Háskóla Íslands og sem starfsmaður á alþjóðasviði hjá utanríkisráðuneytinu í Noregi. Þá hefur hún starfað sem fyrsta flugfreyja hjá flugfélaginu Wow Air.
Skagafrettir.is hefur frá upphafi verið opinn fréttavefur og markmiðið er að halda áfram á þeirri vegferð.
Áhugi á efninu er til staðar. Mörg þúsund heimsóknir á hverjum degi á skagafrettir.is staðfestir að lesendur hafa áhuga á jákvæðum fréttum úr nærsamfélaginu.
Þú kæri lesandi getur tekið þátt í að efla fréttavefinn skagafrettir.is með þínu framlagi. Slíkur stuðningur er afar mikilvægur fyrir bæjarfréttamiðla.
Það er hart sótt að bæjar - og staðarfréttamiðlum á Íslandi - og slíkir miðlar eru í raunverulegri útrýmingarhættu.
Skagafréttir fóru í loftið í nóvember 2016 og frá þeim tíma hafa vel á fjórða þúsund fréttir verið skrifaðar á skagafrettir.is.
Skagafréttir ehf.
552-26-11875
440219-0550
Frjáls framlög frá lesendum eru styrkasta stoðin í rekstri Skagafrétta. Slíkur stuðningur er afar mikilvægur og hvatning til að halda áfram að miðla því öllu því jákvæða sem er í gangi á Akranesi og hjá Skagamönnum nær og fjær.
Frjáls framlög gefa jákvæða strauma og kraftmeiri fréttaflutning.
Kærar þakkir fyrir allar heimsóknirnar á skagafrettir.is og stuðninginn.
Skagafréttir ehf.
552-26-11875
440219-0550
Ungir og efnilegir leikarar með sterka tengingu á Akranes leika stórt hlutverk í nýrri kvikmynd sem frumsýnd verður þann 23. mars 2018. Myndin heitir Víti í Vestmannaeyjum og er fjölskyldumynd með vísun í sannsögulega atburði. Viktor Benóný Benediktsson, 12 ára, og Theodór Ingi Óskarsson, 11 ára, fengu að upplifa það að leika í þessari mynd og skagafrettir.is fékk þá félaga til þess að segja aðeins frá þeirra upplifun. Stiklu úr myndinni má sjá hér neðst í fréttinni.
Myndin verður að sjálfsögðu sýnd í Bíóhöllinni á Akranesi, laugardaginn 24. mars og sunnudaginn 25. mars.
Viktor og Theodór ætla sér að lesa meira en þeir hafa gert áður og leiklistinn hefur svo sannarlega fangað athygli þeirra.
Theodór og Viktor
Nafn: Viktor Benóný Benediktsson.
Aldur: 12 ára.
Skóli: Breiðagerðisskóli.
Bekkur: 7 bekkur.
Besti maturinn: Hamborgarahryggur og Sushi.
Besti drykkurinn: Vatn.
Besta lagið/tónlistin. Michael Jackson – Beat It.
Á hvað ertu að horfa þessa dagana? (sjónvarpsþættir)
Stranger things 2 og Friends.
Ættartréð:
Benedikt Steinar Benónýsson er pabbi minn og Íris Dögg H Marteinsdóttir er stjúpmamma mín, og systkini mín eru þau Tindur Marinó (5 ára) og Hafrún Embla (11 ára).
Auður Valdís Grétarsdóttir er mamma mín og stjúppabbi minn er Guðmundur Ingiberg Arnarsson, og systkini mín eru Elmar Benvý (4 ára) og Arnar Levý (6 ára). Og ekki má gleyma ömmu minni sem heitir Hulda Jónína Jónsdóttir
Theodór ásamt systkinum sínum.
Hvernig kom það til að þú fékkst hlutverk í myndinni?
„Ég mætti í nokkrar prufur fyrir myndina, mamma sá auglýsingu fyrir prufurnar á Facebook.“
Hefur þú leikið áður í kvikmynd?
„Já, en oftast bara í aukahlutverkum og í þáttum. T.d. Fyrir framan annað fólk og Loforði.“
Hefur þú áhuga á leiklist?
„Já mjög mikinn áhuga, ég ætlaði að verða lögga þegar ég yrði stór. En svo kynntist ég kvikmyndaheiminum og fann að þetta var ætlað mér.“
Ertu að æfa fótbolta og með hvaða liði þá?
„Nei, ég æfði fótbolta en er í pásu. Æfi í dag Handbolta með Víkingi og er markmaður.“
Framtíðardraumar þínir, hverjir eru þeir?
„Að það komi stjarna með nafninu mínu á Hollywood Boulevard.“
Hvað er það eftirminnilegasta sem gerðist við tökurnar á myndinni?
„Þegar var fyrsti tökudagurinn í Eyjum og það var brjálað veður.“
Hvert er vandræðalegasta atvikið sem gerðist við tökurnar á myndinni?
„Þegar ég fékk hiksta í miðri töku.“
Hvaða áhugamál hefur þú fyrir utan leiklist og fótbolta?
„Vinir mínir og snjóbretti.“
Lestu mikið, bækur og slíkt?
„Nei, en ég er að bæta mig í því.“
Hefur þú lesið aðrar bækur sem eru eftir höfundinn á Víti í Vestmannaeyjum?
„Já, Amma er Best (mæli með henni ;).“
Langar þig að taka þátt í fleiri slíkum kvikmyndaverkefnum?
„Auðvitað, ef þið viljið fá mig í verkefni hringið þá í mig.“
ÍA og Akranes, hvernig er tengingin þín?
„Ég fæddist á Akranesi og kom reglulega til pabba á Akranes. Ég var líka mikið í sveitinni hjá ömmu og afa. Ég var mjög ungur þegar ég átti heima á Akranesi en man mjög vel eftir því þegar eg fór á Langasand hjá Fríðu frænku og man líka þegar ég fór í Jaðarsbakkalaug með afa það var mjög skemmtilegt.“
Nafn: Theodór Ingi Óskarsson.
Aldur: 11 ára.
Skóli: Norðlingaskóli.
Bekkur: 6. bekkur.
Besti maturinn: Fajitas.
Besti drykkurinn: Vit-Hit og Sparkling ICE.
Besta lagið/tónlistin: Perfect með Ed Sheeran.
Á hvað ertu að horfa þessa dagana? (sjónvarpsþættir): Horfi lítið á sjónvarpsþætti en stundum á bíómyndir. Horfði síðast á Home Alone.
Ættartréð: Foreldrar mínir eru Óskar Örn Guðbrandsson og Áslaug Ósk Hinriksdóttir. Systkini mín eru Þuríður Arna (15 ára), Oddný Erla (13 ára), Hinrik Örn (9 ára) og Jóhanna Ósk (4 ára).
Hvernig kom það til að þú fékkst hlutverk í myndinni?
„Ég fór í prufur sem voru auglýstar og var svo valinn eftir þær.“
Hefur þú leikið áður í kvikmynd?
„Nei“.
Hefur þú áhuga á leiklist?
„Já og mig langar að leika meira.“
Ertu að æfa fótbolta og með hvaða liði þá?
„Já ég er að æfa með 5. flokki í Fylki.“
Framtíðardraumar þínir, hverjir eru þeir?
„Mig langar að vera fótboltamaður og leikari.“
Hvað er það eftirminnilegasta sem gerðist við tökurnar á myndinni?
„Þegar við vorum útá sjó og loftnet á bátnum rakst upp í kletta og datt af. Þá varð ég soldið hræddur.“
Hvert er vandræðalegasta atvikið sem gerðist við tökurnar á myndinni?
„Í sömu bátsferð átti ég að fara með langan texta en gleymdi honum alveg.“
Hvaða áhugamál hefur þú fyrir utan leiklist og fótbolta?
„Ég er líka að æfa badminton í TBR. Ég fylgist líka mjög vel með enska boltanum.“
Lestu mikið, bækur og slíkt?
„Nei ég er ekki mjög duglegur að lesa.“
Hefur þú lesið aðrar bækur sem eru eftir höfundinn á Víti í Vestmannaeyjum?
„Já ég hef lesið þær allar og þær eru mjög skemmtilegar. Hef líka lesið bækur eftir Þorgrím Þráinsson.“
Langar þig að taka þátt í fleiri slíkum kvikmyndaverkefnum?
„Já það væri gaman. Hef leikið smá eftir sumarið.“
ÍA og Akranes, hvernig er tengingin þín?
„Pabbi minn er frá Akranesi og amma og afi og systur pabba búa þar í dag ásamt fjölskyldum sínum.“
Myndin Víti í Vestmannaeyjum er byggð á fyrstu bókinni í vinsælum barnabókaflokki eftir Gunnar Helgason. Ár hvert er haldið stórt fótboltamót fyrir krakka í Vestmannaeyjum og þetta ár mætir hinn tíu ára Jón Jónsson til þess að keppa með Fálkum. En þegar hann kynnist Ívari, strák úr ÍBV sem á bágt heima fyrir, þarf Jón að vaxa hraðar úr grasi en hann óraði fyrir, bæði innan og utan vallar.
Bragi Þór Hinriksson leikstýrir en handrit skrifa Jóhann Ævar Grímsson, Gunnar Helgason og Ottó Geir Borg. Sagafilm framleiðir
Guli liturinn hefur verið einkennismerki ÍA í langan tíma en Íþróttabandalag Akraness var stofnað árið 1946.
En hvers vegna var guli liturinn fyrir valinu?, og kemur Dortmund í Þýskalandi við sögu í valinu á litnum?
Skagafréttir leituðu að sjálfsögðu í sagnabrunninn Jón Gunnlaugsson til þess að fá úr þessu skorið. Jón var leiftursnöggur að svara þegar hann var inntur eftir því hvort hann vissi eitthvað um valið á gula litnum.
„Söguna má rekja til ársins 1950 þegar Karl Guðmundsson, fyrirliði íslenska landsliðsins og leikmaður Fram, var í námi í íþróttafræðum í Köln í Þýskalandi,“ segir Jón en Karl hafði þjálfað lið ÍA árið 1948 samhliða því að hann lék með Fram.
„Þessi tenging Karls við ÍA varð til þess að Guðmundur Sveinbjörnsson þáverandi formaður ÍA hafði samband við Karl í Þýskalandi. Guðmundur óskaði eftir aðstoð við að útvega búninga fyrir ÍA. Áður en þessi búningur kom þá lék liðið í hvítum skyrtum og bláum buxum. Á þessum árum mættu leikmenn til leiks í hvítu spariskyrtunum sínum.“
Guðmundur hafði þá ósk að fá búninga sem skáru sig frá þeim litum sem voru notaðir af knattspyrnuliðunum í Reykjavík. Rauði liturinn var Valsbúningurinn, sá blái hjá Fram, og KR var með hvítar og svartar rendur á búningunum.
„Karl keypti búninga eins og óskað var eftir. Hann valdi gulan og svartan búning og þannig var liturinn ákveðinn,“ segir Jón.
Skagamenn klæddust þessum búningi fyrst vorið 1951 og þá var komið nýtt merki og urðu Íslandsmeistarar, fyrstir liða utan Reykjavíkur. Á sama tíma og nýji búningurinn kom var merki félagsins líka breytt í það sem enn er notað í dag.
Auglýsing
Auglýsing
„Það er hægt að nota ýsu eða þorsk í réttinn sem nýtur vinsælda á okkar heimili. Þetta er einfaldur réttur og sósan gerir fiskréttinn að sælkerarétti,“ segir Ástþór Vilmar Jóhannsson sem tók áskorun frá Sævari Frey Þráinssyni bæjarstjóra fagnandi. Bæjarstjóri Akraness reið á vaðið í nýjum fréttaflokki á skagafrettir.is. með uppskrift að áhugaverðum kjúklingarétti.
Markmiðið með þessum fréttaflokki er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.
Fiskur hefur verið mikilvæg fæða á Íslandi frá upphafi byggðar og fáar þjóðir borða jafnmikinn fisk og við Íslendingar. Neysla Íslendinga á fiski hefur samt sem áður minnkað á undanförnum árum. Ástþór Vilmar Jóhannsson vill stuðla að breytingum á því sviði með þessari frábæru uppskrift af steiktum fiski með súrsætri sósu.
Fiskur er ákjósanleg fæða fyrir margra hluta sakir. Má þar nefna að í fiski er gæðaprótein, neysla á fiski getur dregið úr offitu, fiskur er næringarrík fæða og tvímælalaust ein sú hollasta matvara sem völ er á. Fisk ættum við ekki að borða sjaldnar en 3 sinnum í viku.
Ástþór Vilmar skorar á Ingu Dóru Jóhannsdóttur, systur sína, að taka við keflinu og koma með næstu uppskrift áður en langt um líður.
600 gr. Ýsa eða þorskur
Hveiti
1-2 egg
Salt
Pipar
Matarolía eða smjör til steikingar
½ l vatn
100gr.sykur
9 msk vínedik
1 msk tómatkraftur
3 msk sojasósa
Maizena-sósu jafnari
100gr sveppir
1 græn paprika
1 rauð paprika
100 gr Laukur
100 gr blaðlaukur
100 gr ananasbitar
Berið réttinn fram með hrísgrjónum eða kartöflum.
Þessi sósa er einnig sérlega ljúffeng með steiktu kjöti.
Bæjarstjóri Akraness ríður á vaðið í nýjum fréttaflokki á skagafrettir.is. Markmiðið er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.
„Þetta er mjög vinsæll réttur á heimilinu en ég fletti upp uppskrift að honum sumarið 2018 þegar fótboltastrákunum var bjargað úr hellinum í Taílandi. Í einni fréttinni kem fram að Pad Krapow með kjúklingi var það fyrsta sem þeir báðu um að borða og ákvað ég að elda þennan rétt þeim til heiðurs daginn sem þeim var bjargað. Þessi réttur með salati dugar auðveldlega fyrir fjóra,“ segir Sævar Freyr Þráinsson.
Sævar Freyr skorar á Ástþór Vilmar Jóhannsson að taka við keflinu og koma með næstu uppskrift en verkefnið er hluti af „Heilsueflandi Samfélagi“ á Akranesi.
Hráefni (mæli með að gera hráefni tilbúið fyrirfram því það tekur bara um 12-15 mín að elda):
3 til 4 msk olía
3 chilli fræ hreinsuð og skorin í sneiðar (ég skar smátt. (hef fræin af einu chilli með til að hafa hann bragð sterkari)
3 skallottulaukar, skornir í þunnar sneiðar (ég skar smátt)
5 hvítlauksrif skorin í þunnar sneiðar
600-700 gr kjúklingalæri beinhreinsuð án skinns (set í matvinnsluvél og tæti kjúkling niður í hakk) Ekki henda kjúklingafitu hún bráðnar og gefur bragð)
1 msk sykur (pálma/kókossykur ef til)
3 msk soyasósa
1 1/2 msk fiskisósa
1/2 bolli kjúklingasoð (ég hitaði vatn í örbylgju og leysti upp 1/2 tening)
1 búnt Thai basil lauf (má sleppa og hefur ekki mikil áhrif á réttinn eða nota ferskt venjulegt. Thai basil er til í asísku búðunum í Rvk).
Sjóðið hrísgrjón á meðan. Hæfilegur skammtur fyrir fjóra ættu að vera 3 bollar af grjónum. Þarf töluvert með þessum rétt.
Setja stóra pönnu á hæsta hita, bætið við olíu, chilli, skallottulauk og hvítlauk, og steikið í 1-2 mínútur þar til búið að mýkjast og jafnvel farið að brúnast lítillega í endum. Bætið við kjúklinga ”hakkinu” og steikið í um 5 mín þar til farið að brúnast lítillega. Tryggið að kjúklingurinn loði ekki saman og reynið að brjóta niður stærri bita.
Bætið við sykur, soyasósu, og fiskisósu. Steikið í aðra mínútu og jafnvel lengur þar til soð hefur að mestu horfið. Bætið þá út í kjúklingasoði og eldið áfram þar til mest af soðinu er horfið og farið að hjúpa kjúklinginn. Þetta á ekki að taka langan tíma 5-7 mín því pannan er á hæsta hita. Bætið við basil laufum og steikið í stutta stund þar til þau hafa visnað og blandast réttinum.
Berið fram með ríflegu magni af hrísgrjónum í skál þar sem hver og einn bætir ofan á réttinum og soyasósu að smekk hvers og eins.
Pad krapow með hrísgrjónum án salats stendur vel undir væntingum. Ef eldað er fyrir fleiri þá er auðvelt að tvöfalda allt í réttinum en gera þarf ráð fyrir lengri tíma í að sjóða niður vökva.
70 gr jöklasalat skorið smátt.
70 gr rauðkál skorið í þunnar ræmur.
1/2 appelsínugul papríka (eða rauð eða gul) skorin í þunnar sneiðar.
50 gr gulrætur rifnar eða sneiddar þunnt.
1 vorlaukur skorin í þunnar sneiðar.
1 msk steinselja skorin smátt.
80 gr edamame baunir (fást frosnar belg hreinsaðar í flestum búðum nú orðið).
1 /2 tsk ferskt engifer saxað smátt.
1 hvítlauksrif saxað smátt.
1/2 msk soya sósa.
1 msk hlynsíróp (eða hunang).
1 msk hrísgrjóna edik (eða sítrónusafi).
1 msk extra virgin olívu olía.
1/2 msk ristuð sesam olía.
1 msk sesam fræ (má sleppa).
Allt skorna hráefnið sett í skál og blandað vel saman. Fljótandi hráefnum blandað saman og svo sett út í salatskálina og öllu velt saman.
Kær kveðja, Sævar Freyr Þráinsson.
Séra Jónína Ólafsdóttir og Þóra Björg Sigurðardóttir eru nýkjörnir prestar við Garða- og Saurbæjarprestakall í Vesturlandsprófastsdæmi sem biskup Íslands auglýsti til umsóknar í desember s.l.
Kjörið fór fram mánudagskvöldið 17. febrúar s.l. á Akranesi.
Framvegis munu því þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.
Sr. Jónína Ólafsdóttir var kjörin í almennt preststarf en Þóra Björg Sigurðardóttir í preststarf með áherslur á barna- og æskulýðsstarf.
Alls bárust sjö umóknir um störfin en 17 manna kjörnefnd úr héraði valdi þær Jónínu og Þóru Björg úr hópi 4 umsækjenda eftir forval matsnefndar um hæfi umsækjenda sem skipuð var af Biskupi Íslands.
Þess má geta að tveir af sjö umsækendum drógu umsóknir sínar til baka.
Sr. Jónína Ólafsdóttir er fædd 14. ágúst 1984. Hún lauk prófi í guðfræði frá Háskóla Íslands 2017 og BA próf í íslensku með félagsfræði sem aukagrein frá Háskóla Íslands árið 2008.
Á liðnu ári lauk Jónína diplómanámi á meistarastigi í sálgæslu frá Endurmenntunarstofnun HÍ sem og 90 einingum af 120 til MA prófs í guðfræði.
Jónína hefur gengt ýmsum störfum innan kirkjunna frá árinu 2007 en hefur starfað sem settur prestur í Dalvíkurprestakalli frá 1 okt. 2019. Eiginmaður hennar er Eggert Þröstur Þórarinsson og eiga þau tvo syni.
Þóra Björg Sigurðardóttir er fædd 25. janúar 1989. Hún lauk prófi í guðfræði frá Háskóla Íslands árið 2019 og BS próf í sálfræði frá Háskóla Íslands 2016. Þóra Björg hefur starfað sem ritari og æskulýðsfullrúi við Grafarvogskirkju frá árinu 2011 en komið að kristilegum störfum frá árinu 2008 m.a. á vegum KFUM&K í sumarbúðunum í Vatnaskógi og Ölver. Þess má geta að Þóra Björg hefur enn sem komið er ekki hlotið vígslu sem prestur. Eiginmaður hennar er Geirlaugur Ingi Sigurbjörnsson. Eiga þau tvö lítil börn og eru búsett á Akranesi.
Eins og áður segir munu þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.
Fyrir er séra Þráinn Haraldsson en hann var kjörin sem sóknarprestur á liðnu ári. Þetta er í fyrsta skiptið sem konur eru kjörnar til prestembæta í Garða – og Saurbæjarprestakalli. Eru því um mikil tímamót að ræða.
Einnig er mjög áberandi hve verðandi prestateymi eru ung að aldri en þau eru öll vel undir fertugu. Það er engu líkarar en að kjörnefnd Garða- og Saurbæjarprestakalls séu að leggja áherslu að yngja verulega upp í sóknarstarfinu á komandi árum.
Auglýsing
Það er ekkert leyndarmál að Skagamaðurinn Ólafur Þórðarson segir það sem hann meinar – og hann liggur ekki á skoðunum sínum.
Ummæli Ólafs á ýmsum málum hafa verið til umfjöllunar í fréttamiðlum á landsvísu og vakið mikla athygli.
Á Þorrablóti Skagamanna lék Ólafur stórt hlutverk í skemmtiatriði 1978 árgangsins – og má sjá það hér fyrir neðan.
Ólafur Þórðarson er einn þekktasti knattspyrnumaður Skagamanna fyrr og síðar. Landsliðsmaður til margra ára og lykilmaður í hinu sigursæla liði ÍA sem mokaði inn titlum seint á síðustu öld.
Ólafur snéri sér að þjálfun eftir að ferlinum lauk og undir hans stjórn varð karlalið ÍA m.a. Íslandsmeistari árið 2001.
ÍA hefur ekki náð að landa Íslandsmeistaratitli í mfl. karla frá árinu 2001.
Auglýsing
Auglýsing
Auglýsing
Auglýsing
Auglýsing
Auglýsing
Í dag hófst formleg söfnun í minningarsjóð Arnars Dórs Hlynssonar. „Hjá okkur hjá Sansa verður þannig háttur á að í þessari pöntunarviku, sem stendur fram til miðnættis 10. janúar munu 750 kr. af hverjum matarpakka fara í minningarsjóð Arnars Dórs.
„Arnar Dór Hlynsson var topp náungi en ótrúlega óheppinn með veikindi. Hann kvartaði samt aldrei. Minningarsjóður Arnars Dórs er stofnaður af Sansa, Team ´79 og ÍA. Sjóðurinn mun í framtíðinni styðja við bakið á góðum málum sem tengjast uppáhaldsíþróttum Arnars Dórs,“ segir Þórður Már Gylfason eigandi Sansa við skagafrettir.is.
ÍA mun hafa umsjón með minningarsjóðnum og verður úthlutað úr sjóðnum einu sinni á ári.
„Arnar Dór vinur minn lést þann 14. september 2017, langt fyrir aldur fram. Á þeim tíma var ég að setja fyrirtækið á laggirnar og það gafst enginn tími til þess að gera það sem mig langaði að gera til að heiðra minningu hans. Með hjálp margra þá er þessi minningarsjóðurinn nú til. Árgangur 79 sem Arnar Dór tilheyrði á stóran þátt í þessu ásamt ÍA og foreldrum Arnars Dórs.
Niðurstaðan er sú að minningarsjóður Arnars Dórs mun styrkja þau aðildarfélög ÍA sem hann tengdist. Það eru golf, fótbolti og kraftlyftingar. Arnar Dór var mikill stuðningsmaður knattspyrnunnar, hann var á golfvellinum flesta daga og lyfti lóðum af krafti þess á milli.“
Fyrirtækið Sansa sem Þórður Már setti á laggirnar á Akranesi í fyrra sérhæfir sig í því að útbúa matarpakka fyrir einstaklinga og fjölskyldur. Óhætt er að segja að viðtökurnar hafi farið fram úr björtustu vonum Þórðar.
„Síðasta vika var sú besta frá upphafi, metvika, og ég vona að þessi vika verði ekki síðri til þess að efla minningarsjóð Arnars Dórs. Og að sjálfsögðu er einn af réttum vikunnar uppáhaldsfiskisúpa Arnars Dórs,“ bætti Þórður Már við.
Fyrir þá sem vilja leggja inn á minningarsjóð Arnars Dórs þá er þetta númerið á styrktarreikningnum:
552-14-350047
kt. 670169-2199
