Pétur Steinn Gunnarsson er í æfingahóp U-15 ára landsliðs Körfuknattleikssambands Íslands.
Hópurinn mun undirbúa sig í vetur fyrir landsliðsverkefni næsta sumar.
Pétur Steinn er fæddur árið 2011 en árgangurinn hefur náð flottum árangri á undanförnum árum – og leikur í undanúrslitum bikarkeppni KKÍ í þessum aldursflokki.
U-15 ára landsliðshópurinn mun æfa saman um jólahátíðina.
Íbúar á Akranesi fá að að öllum líkindum leyfi til að tjútta og tralla með skipulögðum hætti á öðrum degi jóla og á nýársnótt.
Þetta kemur fram í nýjustu fundargerð bæjarráðs.
Svenbærinn Akranes – gæti því vaknað til lífsins á ný?
Katla Bjarnadóttir, sem rekur skemmtistaðinn Útgerðina við Stillholt, hefur sótt um leyfi fyrir viðburðum sem eiga sér langa sögu í skemmtanalífi Akurnesinga – viðburðum sem hafa ekki verið til staðar á undanförnum árum.
Um er að ræða ball á öðrum degi jóla og ball á nýársnótt – og er planið að halda þessa viðburði í íþróttahúsinu við Vesturgötu.
Bæjarráð Akraness hefur samþykkt að „ballið“ á öðrum degi jóla fái að standa fram til kl. 4 aðfaranótt 27. des. og áramótafögnuði ljúki kl. 4:30 aðfaranótt 1. janúar 2026.
Skagamaðurinn Ívar Orri Kristjánsson dæmir í kvöld leik í Sambandsdeild karla í knattspyrnu. Þar mætast Shkëndija frá Norður-Makedóníu og Slovan Bratislava frá Slóvakíu.
Leikurinn fer fram í höfuðborg Norður-Makedóníu, Skopje.
Dómarar leiksins eru allir frá Íslandi.
Birkir Sigurðarson og Gylfi Már Sigurðsson eru aðstoðardómarar og Vilhjálmur Alvar Þórarinsson er fjórði dómari.
Ívar Orri var valinn knattspyrnudómari ársins í Bestu deildar karla 2025 – en það voru leikmenn deildarinnar sem kusu en KSÍ stendur að kjörinu.
Þetta í annað sinn sem Ívar Orri fær þessa viðurkenningu. Árið 2021 var hann kjörinn besti dómarinn í efstu deild karla af leikmönnum deildarinnar.
Aðsend grein frá Hannesi S. Jónssyni.
Íþróttafólkið okkar á landsbyggðinni þarf að ferðast mun meira til keppni en þau sem eru höfuðborgarsvæðinu og þarf af leiðandi er ferðakostnaður og fjarvera frá heimili mun meiri hjá þeim. Íþróttafélögin og iðkendur félaganna á landsbyggðinni verða þannig fyrir töluverðum ferðakostnaði við að taka þátt í mótum eða einstaka leikjum. Einnig bætist við gisti og uppihaldskostnaður hjá þeim félögum og einstaklingum sem þurfa að leggja á sig þessi ferðlög.
Íþróttafélög utan höfuðborgarsvæðisins og þeirra sjálfboðaliðar leggja á sig mikla vinnu eingöngu við að fjárafla fyrir keppnisferðum ásamt því að sinna hinu hefðbundna íþróttastarfi.
Ferðasjóður íþróttafélaganna er því íþróttahreyfingunni, íþróttafólki á landsbyggðinni og fjölskyldum þeirra afar mikilvægur en því miður þá hefur verið lítið um hækkanir á framlögum ríkisins í þennan mikilvæga sjóð. Núna verður breyting á enda vinnur ríkisstjórn Kristrúnar Frostadóttir í því að draga úr ójöfnuði.
Meirihluti fjárlaganefnar lagði til á milli fyrstu og annarar umræðu fjárlaga 2026 að framlag ríksisvaldins verði hækkað um 100 milljónir eða næstum því 100% aukning á milli ára í þennan mikilvæga sjóð. Þessi tillaga meirhluta nefndarinnar var ein af mörgum góðum breytingartilögum sem samþykkt var á Alþingi síðasta föstudag að lokinni annarri umræðu um fjárlögin. Frá stofnum ferðasjóðsins hefur Íþrótta-og Ólympíusamband Íslands ÍSÍ séð um að setja sjóðnum reglur og úthlutun fyrir hönd ríkisins.
Þessi aukning mun skila sér beint til þeirra sem iðka íþróttir á landsbyggðinni og lækka þannig kostnað við íþróttaiðkun barna. Með þessari mikilvægu hækkun á framlagi ríksisvaldsins í ferðasjóð íþróttafélaga er stigið stórt skref í að jafna aðstöðumun fjölskyldna á landsbyggðinni til þátttöku í íþróttum og keppni.
Þessi mikilvæga hækkun á framlagi í ferðasjóð íþróttafélaga kemur til framkvæmda strax við fyrstu fjárlög ríkisstjórnar Kristrúnar Frostadóttir og sýnir þannig að ríkisstjórnin hlustar og skilur íþróttaheyfinguna og mun halda áfram að sýna það í verki á næstu árum
Höfundur er varaþingmaður Samfylkingarinnar í Norðvestur kjördæmi.
Markmiðið er einnig að hvetja ykkur lesendur góðir til þess að taka þátt í því að byggja upp öflugan bæjarfréttamiðil á Akranesi.
Alþjóðlegir samfélagsmiðlar skrifa ekki fréttir og beina kastljósinu að því sem hæst ber í nærumhverfinu.
Nánar neðst í þessum pistli.
Fréttavefurinn skagafrettir.is var settur á laggirnar fyrir tæplega níu árum.
Þann 10. nóvember 2016 var ýtt á „enter“ og skagafrettir.is varð aðengilegur á veraldarvefnum.
Þegar ákvörðunin var tekin að setja þetta verkefni af stað var lagt af stað án þess að hugsa mikið um þær hindranir sem voru á veginum.
Mikil þekking á fjölmiðlum var til staðar, samhliða brennandi áhuga á samfélaginu á Akranesi. Það var drifkrafturinn og lagt var í þessa vegferð.
Markmiðið var á þeim tíma að beina kastljósinu að fréttum og sögum af Skagamönnum nær og fjær.
Fréttum sem stóru fréttamiðlar landsins hafa ekki tök á að fjalla um eða falla utan áhugasviðs þeirra.
Jákvæður tónn hefur einkennt fréttaflóruna á skagafrettir.is – með einhverjum undantekningum þó. Og viðtökur lesenda hafa verið framar vonum. Kærar þakkir.
Í dag eru um 6000 fréttir aðgengilegar á skagafrettir.is – samhliða því hafa mörg þúsund ljósmyndir verið teknar sem eru aðgengilegar á ljósmyndavef Skagafrétta.
Frá því að fréttamiðlar á heimsvísu byrjuðu að setja fréttir á veraldarvefinn rétt fyrir síðustu aldamót hafa lesendur gengið að því vísu að geta lesið fréttir og greinar án þess að greiða fyrir það.
Á fyrstu áratugum veraldarvefsins gekk þetta viðskiptamódel upp upp þar sem að töluverð eftirspurn var hjá auglýsendum á slíkum miðlum.
Í dag er landslagið mun flóknara og tekjumöguleikar fjölmiðla á auglýsingamarkaði fara ört minnkandi.
Öflug og framsýn fyrirtæki hafa frá fyrsta degi tekið þátt í þessu verkefni með okkur. Einstaklingar hafa einnig lagt Skagafréttum lið með framlögum. Slíkur stuðningur er ómetanlegur. Kærar þakkir.
Þessi stuðningur dugir hinsvegar ekki til þess að að skagafrettir.is geti talist sjálfbær og staðið undir einu stöðugildi. Þar vantar töluvert upp á.
Eins kemur fram fyrr í þessum pistli er staðan á auglýsingamarkaði flókinn og erfið.
Sem dæmi úr nærsamfélaginu á Akranesi má nefna að stór og landsþekkt fyrirtæki nýta sér flest þjónustu birtingahúsa til að velja þá miðla þar sem auglýst er.
Birtingahúsin forgangsraða fjármagninu sem þau hafa til umráða frá viðkomandi fyrirtækjum til auglýsingakaupa á stóru miðlana og erlenda samfélagsmiðla.
Það færist í aukana að fyrirtæki og birtingahús kaupi auglýsingar hjá risafyrirtækjunum á borð við Facebook, Youtube, Tik Tok og Google.
Í þessu samhengi má benda á þá staðreynd að þessir aðilar skrifa ekki fréttir úr nærsamfélaginu – það gera aðrir sem hafa brennandi áhuga á því – án þess að fá sneið af auglýsingakökunni.
Það eru einnig stórfyrirtæki á Akranesi sem auglýsa nánast ekki neitt í þeim fjölmiðlum sem eru í nærumhverfinu (Skagafréttir, Skessuhorn).
Akraneskaupstaður hefur einnig bæst í þann hóp sem auglýsir nánast ekki neitt í bæjarfréttamiðlum á Akranesi.
Fyrirtæki og stofnanir nota í auknum mæli íbúasíður á samfélagsmiðlum, (Ég er íbúi á Akranesi) til þess að koma sínum vörum og þjónustu á framfæri.
Það má alveg setja spurningamerki við þessa þróun – og velta því fyrir sér hvort það sé eðlilegt að risafyrirtæki fá „hillu“ fyrir óbeinar auglýsingar á íbúasíðum á samfélagsmiðlum.
Samfélagsmiðlar sem notaðir eru sem upplýsingasíður fyrir íbúa hafa sína kosti.
Slíkt hentar vel fyrir félagasamtök, einyrkja og einstaklinga sem geta með einföldum hætti náð til margra á stuttum tíma.
Samfélagsmiðlar skrifa hinsvegar ekki fréttir og beina kastljósinu að því sem hæst ber í nærumhverfinu.
Lítil og meðalstór fyrirtæki á Akranesi nýta mörg hver samfélagsmiðla í auknu mæli til þess að koma sér á framfæri. Það er mjög skiljanlegt þar sem að sá gluggi er mun stærri en bæjarfréttamiðlar geta boðið upp á.
Einnig eru mörg fyrirtæki hér á Akranesi sjá engan tilgang í því að láta vita af sér með auglýsingum.
Staðan er því flókin, erfið og stundum óréttlát.
Bæjarfréttamiðlar víðsvegar um landið hafa á undanförnum árum verið lagðir niður þar sem að rekstrargrundvöllur þeirra var brostinn. Margir telja að slíkir miðlar séu í útrýmingarhættu.
Fréttamiðlar víðsvegar um veröldina hafa í auknu mæli farið þá leið að loka fyrir frían aðgang að fréttum.
Stærstu fjölmiðlar heims hafa fetað þá slóð að búa til lokað áskriftarkerfi – þrátt fyrir að vera með góða stöðu á auglýsingamarkaði.
Skagafréttir hafa ekki hug á því að læsa efninu og hefta aðgengi að vefnum.
Skagafréttir bera þá von í brjósti að þið lesendur, Skagamenn nær og fjær, íhugi þá stöðu sem bæjarfréttamiðlar búa við í harðri samkeppni á auglýsingamarkaði.
Þið kæru lesendur eru grunnurinn að því að bæjarfréttamiðlar á borð við Skagafréttir haldi áfram að beina athyglinni að því sem er að gerast í samfélaginu á Akranesi.
Það gerið þið með því að sýna stuðning ykkar í verki með frjálsum framlögum – sem má líta á sem áskrift að jákvæðum fréttum úr ört vaxandi samfélagi á Akranesi.
Bestu kveðjur og takk fyrir að nenna að lesa þetta;
Sigurður Elvar Þórólfsson, eigandi og ritstjóri Skagafrétta.
Krónan hefur nú valið þau fjórtán verkefni sem hljóta samfélagsstyrk þeirra í ár og hlaut foreldrafélag leikskólans Akrasels á Akranesi hæsta fjárstyrkinn þetta árið, eða 750 þúsund krónur. Upphæðin mun nýtast í uppbyggingu sparkvallar á lóð leikskólans. Þetta kemur fram í tilkynningu.
Styrkir vináttu og félagsfærni barnanna með sameiginlegum leik
Foreldrafélag Akrasels mun taka virkan þátt í vinnunni við uppsetningu vallarins, ásamt starfsfólki leikskólans og mun styrkupphæðin verða notuð í kaup á efni og aðföngum við undirbúning lóðar, umgjörð og nauðsynlegan öryggisbúnað.
„Við erum Krónunni afar þakklát fyrir að sjá hversu mikilvægt verkefnið er okkar samfélagi. Sparkvellinum er meðal annars ætlað að stuðla að aukinni hreyfingu og vellíðan barnanna okkar, skapa jákvætt samfélagslegt rými sem nýtist bæði í leik og skipulögðum íþróttum og síðast en ekki síst að styrkja vináttu og félagsfærni barnanna með sameiginlegum leik. Lokamarkmiðið er að búa til öruggan, aðgengilegan og skemmtilegan leikvöll sem börnin á leikskólanum og í nærsamfélaginu geta notið saman,“ segir Guðmundur Brynjar Júlíusson, foreldri í Akraseli.
Áhersla á umhverfisvitund, hollustu og hreyfingu
Krónan hefur frá árinu 2013 veitt samfélagsstyrki en á síðustu árum hefur áhersla verið lögð á að ýta undir verkefni sem stuðla að umhverfisvitund eða aukinni lýðheilsu þar sem sjónum er einkum beint að ungu kynslóðinni. Að auki veitir Krónan styrki til kaupa á svokölluðum Bambahúsum sem eru umhverfisvæn gróðurhús sem nýtist einna helst til að rækta grænmeti allt árið um kring, fræða um flest sem við kemur ræktun grænmetis og mikilvægi þess að vita hvaðan einstök matvæli koma.
Styrkhafar í ár eru:
Píluíþróttin er í sókn á Akranesi og á dögunum var í fyrsta sinn keppt í kvennaflokki hjá Pílufélagi Akraness. Alls tóku 17 konur þátt, leikið var í riðlum og úrslitakeppni tók við eftir riðlakeppnina.
Viktoría Viktorsdóttir stóð uppi sem sigurvegari.
Mótið var eins og áður segir það fyrsta hjá félaginu þar sem að keppt er í kvennaflokki og markar þetta mót tímamót í starfi félagsins.
„Skúrinn“ opnaði með formlegum hætti fimmtudaginn 4. desember í Breið nýsköpunarsetri.
Fjölmargir gestir komu á opnunarhátíðina – eins og sjá má í myndasyrpunni hér fyrir neðan.
Þar verður opið fyrir alla karlmenn 18 ára og eldri á þriðjudögum og fimmtudögum frá 13-16.
Skúrinn er samfélagsverkefni þar sem að karlar á ýmsum aldri vinna saman að ýmsum verkefnum.
Ástralir hófu þessa vegferð en verkefnið hefur slegið í gegn víðs vegar í Evrópu og í Bandaríkjunum.
Markmiðið er að rjúfa félagslega einangrun karlamanna.
Karlar í skúrum er eins og áður segir samfélagslegt verkefni og er komin ágæt reynsla á það hjá bæjarfélögum á borð við Hafnarfjörð.
Hörður Sturluson verkefnisstjóri hjá Rauða krossinum segir í viðtali á lifdununa.is að markmiðið sé að rjúfa félagslega einangrum hjá karlmönnum og þá sérstaklega hjá ellilífeyrisþegum.
Viðtalið í heild sinni er hér.
„Þeir sem komnir eru á eftirlaun hafa oft mun rýmri tíma en hinir. Staðreyndin er hins vegar sú að þegar menn fara á eftirlaun þá missa þeir oft tengst við félaga og kunningja og sumir hafa misst maka sinn.
Markmiðið er að rjúfa félagslega einangrun þeirra,“ segir Hörður og bætir við að verkefnið sé að erlendri fyrirmynd. Það byrjaði í Ástralíu en hefur slegið í gegn víðs vegar um Evrópu og í Bandaríkjunum. Þannig eru rúmlega 400 skúrar á Írlandi þar sem yfir 10.000 karlar hittast í hverri viku.
Fimm leikmenn kvennaliðs ÍA í knattspyrnu skrifuðu nýverið undir samning við félagið. ÍA lék í næst efstu deild á síðustu leiktíð og ætlar félagið sér stærri hluti á næstu misserum – Skarphéðinn Magnússon er þjálfari liðsins.
Nadía Steinunn Elíasdóttir, Hrafnhildur Helga Arnardóttir, Erla Karítas Jóhannesdóttir, Anna Þóra Hannesdóttir, og Selma Dögg Þorsteinsdóttir skrifuðu allar undir samning við félagið.
Nadía Steinunn er fædd árið 2010. Hún er sóknarleikmaður og skoraði 3 mörk í 20 leikjum s.l. sumar. Þetta er fyrsti samningur hennar við ÍA. Hrafnhildur Helga er markvörður sem er fædd árið 2009. Hún er einnig að skrifa undir sinn fyrsta samning.
Erla Karítas hefur leikið alls 191 KSÍ leiki með ÍA og skorað 65 mörk. Hún skorað 12 mörk í 25 leikjum á síðustu leiktíð.
Anna Þóra hefur verið í stóru hlutverki í vörn ÍA undanfarin misseri. Selma Dögg er einnig í vörn ÍA og leikur þar lykilhlutverk ásamt Önnu Þóru.
Erla Karítas, Anna Þór og Selma Dögg eru allar fæddar árið 2002.
Myndir: Jón Gautur photography
Ekki er gert ráð fyrir fjármagni til kaupa á nýjum listaverkum hjá Akraneskaupstað á næstu misserum. Kaupstaðurinn á fjölda útilistaverka og vegglistaverka, sem eru staðsett víðsvegar um bæinn.
Skóla – og frístundaráð samþykkti á dögunum að kostnaður við reglubundið viðhald á listaverkum í eigum bæjarins yrði sett á fjárhagsáætlun.
Í rökstuðningi ráðsins kom m.a. fram að til þess að tryggja að þessi listaverk njóti viðeigandi verndar og að almenningur hafi aðgang að þeim við góðar aðstæður, er nauðsynlegt að setja fast fjármagn í reglubundið viðhald.
Í fundargerð bæjarráðs kemur fram að ráðið telur rétt að til framtíðar litið sé rétt að veita fastri fjárhæð til að mæta viðhaldskostnaði og e.a. til endurnýjunar ljósa o.fl.
Vegna óhagstæðra rekstrarskilyrða sem stendur fellst bæjarráð þó ekki að erindið og beinir þeim tilmælum til menningar- og safnanefndar að fjárhæð sú sem ætluð er til nýkaupa á yfirstandi ári sem og hinu næsta verði nýtt til viðhalds og/eða endurbóta útilista- og vegglistaverka í eigu Akraneskaupstaðar.
Ágústa Rósa Andrésdóttir er nýr forstöðumaður íþróttamannvirkja á Akranesi.
Ágústa Rósa er frá Akranesi og hefur m.a. verið formaður karatefélags Akraness, setið í stjórn badmintfélags Akraness og í framkvæmdastjórn Íþróttabandalags Akraness. Ágústa hefur starfað sem æskulýðsfulltrúi í Hvalfjarðarsveit, og nú síðast sem Forstöðumaður Frístundasels Lágafellsskóla í Mosfellsbæ.
Bæjarstjórn Akraness samþykkti ráðningu Ágústu á síðasta bæjarstjórnarfundi. Alls sóttu 17 manns um starfið. Hörður Kári Jóhannesson hefur verið forstöðumaður íþróttamannvirkja á Akranes og var honum þökkuð góð störf á bæjarstjórnarfundinu.
Ágústa er fædd árið 1971 og hún er gift Herði Svavarssyni rafvirkja og þau eiga þrjú börn, Andrés Má, Aðalheiði Rósu og
Ólaf Elías.
Eftirtaldir sóttu um starfið:
Ágústa Rósa Andrésdóttir
Baldvin Bjarki Baldvinsson
Daisy Heimisdóttir
Ellert Baldur Magnússon
Eyrún Ída Guðjónsdóttir
Finnbogi Rafn Gudmundsson
Guðbjartur Máni Gíslason
Helena Rúnarsdóttir
Helgi Magnússon
Indriði Jósafatsson
Ingimar Elí Hlynsson
Magnús Gísli Sveinsson
Óli Þór Júlíusson
Pétur V. Georgsson
Ragnheiður Smáradóttir
Sturlaugur Sturlaugsson
Valdimar Leó Friðriksson
Eva Björg Ægisdóttir frá Akranesi fékk í dag afhent spennusagnaverðlaunin Svartfuglinn fyrir bókina Marrið í stiganum.
Eliza Reid, forsetafrú, afhenti verðlaunin.
Yrsa Sigurðardóttir og Ragnar Jónasson eru hugmyndafræðingarnir að baki verðlaununum sem ætluð eru höfundum sem ekki hafa áður sent frá sér glæpasögu. Þetta kemur fram í Fréttablaðinu í dag.
Eva er eins og áður segir frá Akranesi en foreldrar hennar eru Ægir Jóhannsson og Sigríður Björk Kristinsdóttir.
Í áliti dómnefndar um bókina segir meðal annars: „Sagan er grípandi og spennandi samhliða því að veita innsýn í myrkan og sáran veruleika. Fléttan er fagmannlega unnin, söguþráðurinn sterkur og sögulokin koma lesandanum á óvart.“
Verðlaunin nema 500.000 krónum auk hefðbundinna höfundarlauna. Sigurvegaranum býðst einnig samningur við umboðsmanninn David H. Headley en tímaritið Bookseller útnefndi hann sem einn af 100 áhrifamestu mönnum breskrar bókaútgáfu árið 2015.
Eva er með MSc gráðu í alþjóðamálum frá Tækniháskólanum í Þrándheimi og BA gráðu í félagsfræði frá Háskóla Íslands. Hún starfar hjá fyrirtækinu Maskína en hún hefur einnig starfað á þróunarsviði VÍS tryggingafélags, verið aðstoðamaður við viðskiptafræðideild Háskóla Íslands og sem starfsmaður á alþjóðasviði hjá utanríkisráðuneytinu í Noregi. Þá hefur hún starfað sem fyrsta flugfreyja hjá flugfélaginu Wow Air.
Skagafrettir.is hefur frá upphafi verið opinn fréttavefur og markmiðið er að halda áfram á þeirri vegferð.
Áhugi á efninu er til staðar. Mörg þúsund heimsóknir á hverjum degi á skagafrettir.is staðfestir að lesendur hafa áhuga á jákvæðum fréttum úr nærsamfélaginu.
Þú kæri lesandi getur tekið þátt í að efla fréttavefinn skagafrettir.is með þínu framlagi. Slíkur stuðningur er afar mikilvægur fyrir bæjarfréttamiðla.
Það er hart sótt að bæjar - og staðarfréttamiðlum á Íslandi - og slíkir miðlar eru í raunverulegri útrýmingarhættu.
Skagafréttir fóru í loftið í nóvember 2016 og frá þeim tíma hafa vel á fjórða þúsund fréttir verið skrifaðar á skagafrettir.is.
Skagafréttir ehf.
552-26-11875
440219-0550
Frjáls framlög frá lesendum eru styrkasta stoðin í rekstri Skagafrétta. Slíkur stuðningur er afar mikilvægur og hvatning til að halda áfram að miðla því öllu því jákvæða sem er í gangi á Akranesi og hjá Skagamönnum nær og fjær.
Frjáls framlög gefa jákvæða strauma og kraftmeiri fréttaflutning.
Kærar þakkir fyrir allar heimsóknirnar á skagafrettir.is og stuðninginn.
Skagafréttir ehf.
552-26-11875
440219-0550
Ungir og efnilegir leikarar með sterka tengingu á Akranes leika stórt hlutverk í nýrri kvikmynd sem frumsýnd verður þann 23. mars 2018. Myndin heitir Víti í Vestmannaeyjum og er fjölskyldumynd með vísun í sannsögulega atburði. Viktor Benóný Benediktsson, 12 ára, og Theodór Ingi Óskarsson, 11 ára, fengu að upplifa það að leika í þessari mynd og skagafrettir.is fékk þá félaga til þess að segja aðeins frá þeirra upplifun. Stiklu úr myndinni má sjá hér neðst í fréttinni.
Myndin verður að sjálfsögðu sýnd í Bíóhöllinni á Akranesi, laugardaginn 24. mars og sunnudaginn 25. mars.
Viktor og Theodór ætla sér að lesa meira en þeir hafa gert áður og leiklistinn hefur svo sannarlega fangað athygli þeirra.
Theodór og Viktor
Nafn: Viktor Benóný Benediktsson.
Aldur: 12 ára.
Skóli: Breiðagerðisskóli.
Bekkur: 7 bekkur.
Besti maturinn: Hamborgarahryggur og Sushi.
Besti drykkurinn: Vatn.
Besta lagið/tónlistin. Michael Jackson – Beat It.
Á hvað ertu að horfa þessa dagana? (sjónvarpsþættir)
Stranger things 2 og Friends.
Ættartréð:
Benedikt Steinar Benónýsson er pabbi minn og Íris Dögg H Marteinsdóttir er stjúpmamma mín, og systkini mín eru þau Tindur Marinó (5 ára) og Hafrún Embla (11 ára).
Auður Valdís Grétarsdóttir er mamma mín og stjúppabbi minn er Guðmundur Ingiberg Arnarsson, og systkini mín eru Elmar Benvý (4 ára) og Arnar Levý (6 ára). Og ekki má gleyma ömmu minni sem heitir Hulda Jónína Jónsdóttir
Theodór ásamt systkinum sínum.
Hvernig kom það til að þú fékkst hlutverk í myndinni?
„Ég mætti í nokkrar prufur fyrir myndina, mamma sá auglýsingu fyrir prufurnar á Facebook.“
Hefur þú leikið áður í kvikmynd?
„Já, en oftast bara í aukahlutverkum og í þáttum. T.d. Fyrir framan annað fólk og Loforði.“
Hefur þú áhuga á leiklist?
„Já mjög mikinn áhuga, ég ætlaði að verða lögga þegar ég yrði stór. En svo kynntist ég kvikmyndaheiminum og fann að þetta var ætlað mér.“
Ertu að æfa fótbolta og með hvaða liði þá?
„Nei, ég æfði fótbolta en er í pásu. Æfi í dag Handbolta með Víkingi og er markmaður.“
Framtíðardraumar þínir, hverjir eru þeir?
„Að það komi stjarna með nafninu mínu á Hollywood Boulevard.“
Hvað er það eftirminnilegasta sem gerðist við tökurnar á myndinni?
„Þegar var fyrsti tökudagurinn í Eyjum og það var brjálað veður.“
Hvert er vandræðalegasta atvikið sem gerðist við tökurnar á myndinni?
„Þegar ég fékk hiksta í miðri töku.“
Hvaða áhugamál hefur þú fyrir utan leiklist og fótbolta?
„Vinir mínir og snjóbretti.“
Lestu mikið, bækur og slíkt?
„Nei, en ég er að bæta mig í því.“
Hefur þú lesið aðrar bækur sem eru eftir höfundinn á Víti í Vestmannaeyjum?
„Já, Amma er Best (mæli með henni ;).“
Langar þig að taka þátt í fleiri slíkum kvikmyndaverkefnum?
„Auðvitað, ef þið viljið fá mig í verkefni hringið þá í mig.“
ÍA og Akranes, hvernig er tengingin þín?
„Ég fæddist á Akranesi og kom reglulega til pabba á Akranes. Ég var líka mikið í sveitinni hjá ömmu og afa. Ég var mjög ungur þegar ég átti heima á Akranesi en man mjög vel eftir því þegar eg fór á Langasand hjá Fríðu frænku og man líka þegar ég fór í Jaðarsbakkalaug með afa það var mjög skemmtilegt.“
Nafn: Theodór Ingi Óskarsson.
Aldur: 11 ára.
Skóli: Norðlingaskóli.
Bekkur: 6. bekkur.
Besti maturinn: Fajitas.
Besti drykkurinn: Vit-Hit og Sparkling ICE.
Besta lagið/tónlistin: Perfect með Ed Sheeran.
Á hvað ertu að horfa þessa dagana? (sjónvarpsþættir): Horfi lítið á sjónvarpsþætti en stundum á bíómyndir. Horfði síðast á Home Alone.
Ættartréð: Foreldrar mínir eru Óskar Örn Guðbrandsson og Áslaug Ósk Hinriksdóttir. Systkini mín eru Þuríður Arna (15 ára), Oddný Erla (13 ára), Hinrik Örn (9 ára) og Jóhanna Ósk (4 ára).
Hvernig kom það til að þú fékkst hlutverk í myndinni?
„Ég fór í prufur sem voru auglýstar og var svo valinn eftir þær.“
Hefur þú leikið áður í kvikmynd?
„Nei“.
Hefur þú áhuga á leiklist?
„Já og mig langar að leika meira.“
Ertu að æfa fótbolta og með hvaða liði þá?
„Já ég er að æfa með 5. flokki í Fylki.“
Framtíðardraumar þínir, hverjir eru þeir?
„Mig langar að vera fótboltamaður og leikari.“
Hvað er það eftirminnilegasta sem gerðist við tökurnar á myndinni?
„Þegar við vorum útá sjó og loftnet á bátnum rakst upp í kletta og datt af. Þá varð ég soldið hræddur.“
Hvert er vandræðalegasta atvikið sem gerðist við tökurnar á myndinni?
„Í sömu bátsferð átti ég að fara með langan texta en gleymdi honum alveg.“
Hvaða áhugamál hefur þú fyrir utan leiklist og fótbolta?
„Ég er líka að æfa badminton í TBR. Ég fylgist líka mjög vel með enska boltanum.“
Lestu mikið, bækur og slíkt?
„Nei ég er ekki mjög duglegur að lesa.“
Hefur þú lesið aðrar bækur sem eru eftir höfundinn á Víti í Vestmannaeyjum?
„Já ég hef lesið þær allar og þær eru mjög skemmtilegar. Hef líka lesið bækur eftir Þorgrím Þráinsson.“
Langar þig að taka þátt í fleiri slíkum kvikmyndaverkefnum?
„Já það væri gaman. Hef leikið smá eftir sumarið.“
ÍA og Akranes, hvernig er tengingin þín?
„Pabbi minn er frá Akranesi og amma og afi og systur pabba búa þar í dag ásamt fjölskyldum sínum.“
Myndin Víti í Vestmannaeyjum er byggð á fyrstu bókinni í vinsælum barnabókaflokki eftir Gunnar Helgason. Ár hvert er haldið stórt fótboltamót fyrir krakka í Vestmannaeyjum og þetta ár mætir hinn tíu ára Jón Jónsson til þess að keppa með Fálkum. En þegar hann kynnist Ívari, strák úr ÍBV sem á bágt heima fyrir, þarf Jón að vaxa hraðar úr grasi en hann óraði fyrir, bæði innan og utan vallar.
Bragi Þór Hinriksson leikstýrir en handrit skrifa Jóhann Ævar Grímsson, Gunnar Helgason og Ottó Geir Borg. Sagafilm framleiðir
Guli liturinn hefur verið einkennismerki ÍA í langan tíma en Íþróttabandalag Akraness var stofnað árið 1946.
En hvers vegna var guli liturinn fyrir valinu?, og kemur Dortmund í Þýskalandi við sögu í valinu á litnum?
Skagafréttir leituðu að sjálfsögðu í sagnabrunninn Jón Gunnlaugsson til þess að fá úr þessu skorið. Jón var leiftursnöggur að svara þegar hann var inntur eftir því hvort hann vissi eitthvað um valið á gula litnum.
„Söguna má rekja til ársins 1950 þegar Karl Guðmundsson, fyrirliði íslenska landsliðsins og leikmaður Fram, var í námi í íþróttafræðum í Köln í Þýskalandi,“ segir Jón en Karl hafði þjálfað lið ÍA árið 1948 samhliða því að hann lék með Fram.
„Þessi tenging Karls við ÍA varð til þess að Guðmundur Sveinbjörnsson þáverandi formaður ÍA hafði samband við Karl í Þýskalandi. Guðmundur óskaði eftir aðstoð við að útvega búninga fyrir ÍA. Áður en þessi búningur kom þá lék liðið í hvítum skyrtum og bláum buxum. Á þessum árum mættu leikmenn til leiks í hvítu spariskyrtunum sínum.“
Guðmundur hafði þá ósk að fá búninga sem skáru sig frá þeim litum sem voru notaðir af knattspyrnuliðunum í Reykjavík. Rauði liturinn var Valsbúningurinn, sá blái hjá Fram, og KR var með hvítar og svartar rendur á búningunum.
„Karl keypti búninga eins og óskað var eftir. Hann valdi gulan og svartan búning og þannig var liturinn ákveðinn,“ segir Jón.
Skagamenn klæddust þessum búningi fyrst vorið 1951 og þá var komið nýtt merki og urðu Íslandsmeistarar, fyrstir liða utan Reykjavíkur. Á sama tíma og nýji búningurinn kom var merki félagsins líka breytt í það sem enn er notað í dag.
Auglýsing
Auglýsing
„Það er hægt að nota ýsu eða þorsk í réttinn sem nýtur vinsælda á okkar heimili. Þetta er einfaldur réttur og sósan gerir fiskréttinn að sælkerarétti,“ segir Ástþór Vilmar Jóhannsson sem tók áskorun frá Sævari Frey Þráinssyni bæjarstjóra fagnandi. Bæjarstjóri Akraness reið á vaðið í nýjum fréttaflokki á skagafrettir.is. með uppskrift að áhugaverðum kjúklingarétti.
Markmiðið með þessum fréttaflokki er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.
Fiskur hefur verið mikilvæg fæða á Íslandi frá upphafi byggðar og fáar þjóðir borða jafnmikinn fisk og við Íslendingar. Neysla Íslendinga á fiski hefur samt sem áður minnkað á undanförnum árum. Ástþór Vilmar Jóhannsson vill stuðla að breytingum á því sviði með þessari frábæru uppskrift af steiktum fiski með súrsætri sósu.
Fiskur er ákjósanleg fæða fyrir margra hluta sakir. Má þar nefna að í fiski er gæðaprótein, neysla á fiski getur dregið úr offitu, fiskur er næringarrík fæða og tvímælalaust ein sú hollasta matvara sem völ er á. Fisk ættum við ekki að borða sjaldnar en 3 sinnum í viku.
Ástþór Vilmar skorar á Ingu Dóru Jóhannsdóttur, systur sína, að taka við keflinu og koma með næstu uppskrift áður en langt um líður.
600 gr. Ýsa eða þorskur
Hveiti
1-2 egg
Salt
Pipar
Matarolía eða smjör til steikingar
½ l vatn
100gr.sykur
9 msk vínedik
1 msk tómatkraftur
3 msk sojasósa
Maizena-sósu jafnari
100gr sveppir
1 græn paprika
1 rauð paprika
100 gr Laukur
100 gr blaðlaukur
100 gr ananasbitar
Berið réttinn fram með hrísgrjónum eða kartöflum.
Þessi sósa er einnig sérlega ljúffeng með steiktu kjöti.
Bæjarstjóri Akraness ríður á vaðið í nýjum fréttaflokki á skagafrettir.is. Markmiðið er að safna saman bragðgóðum, einföldum og hollum uppskriftum. Með tíð og tíma verður til staðar sarpur af góðum hugmyndum um notkun á hráefnum þar sem að hollusta og bragðgæði eru höfð að leiðarljósi.
„Þetta er mjög vinsæll réttur á heimilinu en ég fletti upp uppskrift að honum sumarið 2018 þegar fótboltastrákunum var bjargað úr hellinum í Taílandi. Í einni fréttinni kem fram að Pad Krapow með kjúklingi var það fyrsta sem þeir báðu um að borða og ákvað ég að elda þennan rétt þeim til heiðurs daginn sem þeim var bjargað. Þessi réttur með salati dugar auðveldlega fyrir fjóra,“ segir Sævar Freyr Þráinsson.
Sævar Freyr skorar á Ástþór Vilmar Jóhannsson að taka við keflinu og koma með næstu uppskrift en verkefnið er hluti af „Heilsueflandi Samfélagi“ á Akranesi.
Hráefni (mæli með að gera hráefni tilbúið fyrirfram því það tekur bara um 12-15 mín að elda):
3 til 4 msk olía
3 chilli fræ hreinsuð og skorin í sneiðar (ég skar smátt. (hef fræin af einu chilli með til að hafa hann bragð sterkari)
3 skallottulaukar, skornir í þunnar sneiðar (ég skar smátt)
5 hvítlauksrif skorin í þunnar sneiðar
600-700 gr kjúklingalæri beinhreinsuð án skinns (set í matvinnsluvél og tæti kjúkling niður í hakk) Ekki henda kjúklingafitu hún bráðnar og gefur bragð)
1 msk sykur (pálma/kókossykur ef til)
3 msk soyasósa
1 1/2 msk fiskisósa
1/2 bolli kjúklingasoð (ég hitaði vatn í örbylgju og leysti upp 1/2 tening)
1 búnt Thai basil lauf (má sleppa og hefur ekki mikil áhrif á réttinn eða nota ferskt venjulegt. Thai basil er til í asísku búðunum í Rvk).
Sjóðið hrísgrjón á meðan. Hæfilegur skammtur fyrir fjóra ættu að vera 3 bollar af grjónum. Þarf töluvert með þessum rétt.
Setja stóra pönnu á hæsta hita, bætið við olíu, chilli, skallottulauk og hvítlauk, og steikið í 1-2 mínútur þar til búið að mýkjast og jafnvel farið að brúnast lítillega í endum. Bætið við kjúklinga ”hakkinu” og steikið í um 5 mín þar til farið að brúnast lítillega. Tryggið að kjúklingurinn loði ekki saman og reynið að brjóta niður stærri bita.
Bætið við sykur, soyasósu, og fiskisósu. Steikið í aðra mínútu og jafnvel lengur þar til soð hefur að mestu horfið. Bætið þá út í kjúklingasoði og eldið áfram þar til mest af soðinu er horfið og farið að hjúpa kjúklinginn. Þetta á ekki að taka langan tíma 5-7 mín því pannan er á hæsta hita. Bætið við basil laufum og steikið í stutta stund þar til þau hafa visnað og blandast réttinum.
Berið fram með ríflegu magni af hrísgrjónum í skál þar sem hver og einn bætir ofan á réttinum og soyasósu að smekk hvers og eins.
Pad krapow með hrísgrjónum án salats stendur vel undir væntingum. Ef eldað er fyrir fleiri þá er auðvelt að tvöfalda allt í réttinum en gera þarf ráð fyrir lengri tíma í að sjóða niður vökva.
70 gr jöklasalat skorið smátt.
70 gr rauðkál skorið í þunnar ræmur.
1/2 appelsínugul papríka (eða rauð eða gul) skorin í þunnar sneiðar.
50 gr gulrætur rifnar eða sneiddar þunnt.
1 vorlaukur skorin í þunnar sneiðar.
1 msk steinselja skorin smátt.
80 gr edamame baunir (fást frosnar belg hreinsaðar í flestum búðum nú orðið).
1 /2 tsk ferskt engifer saxað smátt.
1 hvítlauksrif saxað smátt.
1/2 msk soya sósa.
1 msk hlynsíróp (eða hunang).
1 msk hrísgrjóna edik (eða sítrónusafi).
1 msk extra virgin olívu olía.
1/2 msk ristuð sesam olía.
1 msk sesam fræ (má sleppa).
Allt skorna hráefnið sett í skál og blandað vel saman. Fljótandi hráefnum blandað saman og svo sett út í salatskálina og öllu velt saman.
Kær kveðja, Sævar Freyr Þráinsson.
Í dag hófst formleg söfnun í minningarsjóð Arnars Dórs Hlynssonar. „Hjá okkur hjá Sansa verður þannig háttur á að í þessari pöntunarviku, sem stendur fram til miðnættis 10. janúar munu 750 kr. af hverjum matarpakka fara í minningarsjóð Arnars Dórs.
„Arnar Dór Hlynsson var topp náungi en ótrúlega óheppinn með veikindi. Hann kvartaði samt aldrei. Minningarsjóður Arnars Dórs er stofnaður af Sansa, Team ´79 og ÍA. Sjóðurinn mun í framtíðinni styðja við bakið á góðum málum sem tengjast uppáhaldsíþróttum Arnars Dórs,“ segir Þórður Már Gylfason eigandi Sansa við skagafrettir.is.
ÍA mun hafa umsjón með minningarsjóðnum og verður úthlutað úr sjóðnum einu sinni á ári.
„Arnar Dór vinur minn lést þann 14. september 2017, langt fyrir aldur fram. Á þeim tíma var ég að setja fyrirtækið á laggirnar og það gafst enginn tími til þess að gera það sem mig langaði að gera til að heiðra minningu hans. Með hjálp margra þá er þessi minningarsjóðurinn nú til. Árgangur 79 sem Arnar Dór tilheyrði á stóran þátt í þessu ásamt ÍA og foreldrum Arnars Dórs.
Niðurstaðan er sú að minningarsjóður Arnars Dórs mun styrkja þau aðildarfélög ÍA sem hann tengdist. Það eru golf, fótbolti og kraftlyftingar. Arnar Dór var mikill stuðningsmaður knattspyrnunnar, hann var á golfvellinum flesta daga og lyfti lóðum af krafti þess á milli.“
Fyrirtækið Sansa sem Þórður Már setti á laggirnar á Akranesi í fyrra sérhæfir sig í því að útbúa matarpakka fyrir einstaklinga og fjölskyldur. Óhætt er að segja að viðtökurnar hafi farið fram úr björtustu vonum Þórðar.
„Síðasta vika var sú besta frá upphafi, metvika, og ég vona að þessi vika verði ekki síðri til þess að efla minningarsjóð Arnars Dórs. Og að sjálfsögðu er einn af réttum vikunnar uppáhaldsfiskisúpa Arnars Dórs,“ bætti Þórður Már við.
Fyrir þá sem vilja leggja inn á minningarsjóð Arnars Dórs þá er þetta númerið á styrktarreikningnum:
552-14-350047
kt. 670169-2199
Auglýsing
Það er ekkert leyndarmál að Skagamaðurinn Ólafur Þórðarson segir það sem hann meinar – og hann liggur ekki á skoðunum sínum.
Ummæli Ólafs á ýmsum málum hafa verið til umfjöllunar í fréttamiðlum á landsvísu og vakið mikla athygli.
Á Þorrablóti Skagamanna lék Ólafur stórt hlutverk í skemmtiatriði 1978 árgangsins – og má sjá það hér fyrir neðan.
Ólafur Þórðarson er einn þekktasti knattspyrnumaður Skagamanna fyrr og síðar. Landsliðsmaður til margra ára og lykilmaður í hinu sigursæla liði ÍA sem mokaði inn titlum seint á síðustu öld.
Ólafur snéri sér að þjálfun eftir að ferlinum lauk og undir hans stjórn varð karlalið ÍA m.a. Íslandsmeistari árið 2001.
ÍA hefur ekki náð að landa Íslandsmeistaratitli í mfl. karla frá árinu 2001.
Auglýsing
Auglýsing
Auglýsing
Auglýsing
Auglýsing
Auglýsing
Séra Jónína Ólafsdóttir og Þóra Björg Sigurðardóttir eru nýkjörnir prestar við Garða- og Saurbæjarprestakall í Vesturlandsprófastsdæmi sem biskup Íslands auglýsti til umsóknar í desember s.l.
Kjörið fór fram mánudagskvöldið 17. febrúar s.l. á Akranesi.
Framvegis munu því þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.
Sr. Jónína Ólafsdóttir var kjörin í almennt preststarf en Þóra Björg Sigurðardóttir í preststarf með áherslur á barna- og æskulýðsstarf.
Alls bárust sjö umóknir um störfin en 17 manna kjörnefnd úr héraði valdi þær Jónínu og Þóru Björg úr hópi 4 umsækjenda eftir forval matsnefndar um hæfi umsækjenda sem skipuð var af Biskupi Íslands.
Þess má geta að tveir af sjö umsækendum drógu umsóknir sínar til baka.
Sr. Jónína Ólafsdóttir er fædd 14. ágúst 1984. Hún lauk prófi í guðfræði frá Háskóla Íslands 2017 og BA próf í íslensku með félagsfræði sem aukagrein frá Háskóla Íslands árið 2008.
Á liðnu ári lauk Jónína diplómanámi á meistarastigi í sálgæslu frá Endurmenntunarstofnun HÍ sem og 90 einingum af 120 til MA prófs í guðfræði.
Jónína hefur gengt ýmsum störfum innan kirkjunna frá árinu 2007 en hefur starfað sem settur prestur í Dalvíkurprestakalli frá 1 okt. 2019. Eiginmaður hennar er Eggert Þröstur Þórarinsson og eiga þau tvo syni.
Þóra Björg Sigurðardóttir er fædd 25. janúar 1989. Hún lauk prófi í guðfræði frá Háskóla Íslands árið 2019 og BS próf í sálfræði frá Háskóla Íslands 2016. Þóra Björg hefur starfað sem ritari og æskulýðsfullrúi við Grafarvogskirkju frá árinu 2011 en komið að kristilegum störfum frá árinu 2008 m.a. á vegum KFUM&K í sumarbúðunum í Vatnaskógi og Ölver. Þess má geta að Þóra Björg hefur enn sem komið er ekki hlotið vígslu sem prestur. Eiginmaður hennar er Geirlaugur Ingi Sigurbjörnsson. Eiga þau tvö lítil börn og eru búsett á Akranesi.
Eins og áður segir munu þrír prestar þjóna í Garða- og Saurbæjarprestakalli og munu þeir allir þjóna þeim sóknum er tilheyra prestakallinu sem eru Akranes, Saurbæjar, Leirár og Innra-Hólmssókn.
Fyrir er séra Þráinn Haraldsson en hann var kjörin sem sóknarprestur á liðnu ári. Þetta er í fyrsta skiptið sem konur eru kjörnar til prestembæta í Garða – og Saurbæjarprestakalli. Eru því um mikil tímamót að ræða.
Einnig er mjög áberandi hve verðandi prestateymi eru ung að aldri en þau eru öll vel undir fertugu. Það er engu líkarar en að kjörnefnd Garða- og Saurbæjarprestakalls séu að leggja áherslu að yngja verulega upp í sóknarstarfinu á komandi árum.
